بلوچستان ءِ ھستیں وھد ءِ جاور
نبشتہ کار: مھروز ھمّل
دی بلوچستان پوسٹ
بلوچستان دنیا ءِ یک سد ءُ نود ءُ پنچ ملکانی توک ءَ کساس یک سد ءُ سِی ملکاں مستریں ملک اِنت اگاں ھساب کنگ بہ بیت گڑا پاکستان وتی مستریں بھر ءَ بلوچستان ءَ لیک اِیت چوشکہ بزاں بلوچستان پاکستان ءَ لاپ دیگ ءُ رودینگ ءَ اِنت پہ ھمے ھاتر ءَ زمینی جاور ءُ رھبنداں بلوچستان وتی ھلک ءُ دمگ ءُ ھمساھگاں ھوار ایشیا ءِ واستا مزنیں ارزشتے دار اِیت ءُ اود ءَ راجی سیاست ءِ گپ کنوک کشگ ءُ گار کنگ بنت ءُ اود ءَ ھما سیاست وتی پاداں داشت کنت کہ آئی ءَ واجکار ھما وڑ ءَ ھکم دینت ءُ ھما وڑ ءَ آئی ءَ گپ پرماینت چرے سیاست ءَ ورنا گستائی ءِ نیمگ ءَ جنزان اَنت ءُ اے سیاست ءَ گوں وتی پجار ءِ نیزور بوگ ءِ گمان ءَ کنگ ءَ اَنت۔
بیا گوستانکی پژدر ءِ بارو ءَ گپ کن ایں: بلوچستان ءِ سیاسی گڑ ءُ منجی ءِ ریشگ برتانیہ ءِ ھاکمی وھد ءَ گوں ھمگرنچ بنت، وھدیکہ اے دمگ ءَ بازیں ریاست ءُ ٹکی دمگ بوتگ اَنت 1948 ءَ ریاست کلات ءِ گوں پاکستان ءَ ھوار بوگ ءَ پد دمگی سروک ءُ پاکستان ءِ وتگڑیں وفاق ءِ میان ءَ بگیرداری پیداک بوتگ بازیں بلوچ رھشوناں اے ھواری نہ منّ اتگ کہ چریشی ءِ سوب ءَ ھما بندات ءَ جھد بندات بوتگ کہ پد ءَ رند ءَ 1958، 1973 ءُ 2000 ءِ دھک ءَ ھم بازیں وھدے ءَ پوجی گھگیری گندگ بوتگ ھر رند ءَ آ زرمبشانی پژدر ءَ گیشتر وتواکی، مڈیانی سر ءَ واھندی ءُ سیاسی نمائندگی لوٹ ھوار بوتگ اَنت۔
زبھری ءِ مارشت ءُ مالی سوب : بلوچستان ءَ جھد ءِ یک دگہ مستریں سوبے مالی زبھری ءُ نابرابری اِنت اے سوبہ گیس، مادن، ٹیل، سھر ، آسن ءُ دگہ گرانھادیں مڈیاں چہ سر ریچ اِنت بلے دمگی مردماں چہ اے مڈیاں رس اتگیں نپ باز کم رس اِیت سوئی گیس کہ 1950 ءِ دھک ءَ دست کپتگ کہ پاکستان ءِ دگہ ھنداں روت سر بیت بلے بازیں بلوچ ھند ءُ دمگے چہ گیس ءَ زبھر اِنت ھمے وڑ دیمروی منسوبگ ھم دمگی مردماں کم رسگ انت کہ چریشی ءَ زبھری مارشت چد ءُ گیشتر بوان اَنت۔
سیاسی نمائندگی ءُ پاکستان ءِ وتگڑیں وفاقی : بلوچستان ءِ سیاسی گوستانک ءِ بنجاھی سرکار گوم ءَ سیادی مدام گڑ ءُ منج بوتگ سوبہ ءِ تہ ءَ ھر رند ءَ گورنر ءِ راج اَنت، اسمبلی آرگ بوتگ اَنت ءُ سیاسی پاٹیانی سر ءَ بندش جنگ بوتگ اَنت چریشی ءِ سوب ءَ بلوچ سروکانی اے گمان مھکم بوتگ کہ وفاق آیانی سیاسی وتواکی ءَ لپاشگ کنگ لوٹ اِیت ھستیں وھد ءَ ھژدھمی آئینی ترمیم ءَ سوبہ ءَ گیشتر واک دیگ بوتگ بلے آئی ءِ کارپد سست روی سوب ءَ راجی تک ءَ ستک آرگ نہ بوتگ۔
جھد ءُ پوجی بنشون:- بلوچستان ءَ جھد ءِ میان ءَ بازیں سلاہ بندیں ٹولی دیم ءَ اتکگ اَنت کہ آیاں بازیں لوٹ دیم ءَ آؤرتگ اَنت لھتے ٹولیاں سوبہ ءِ ھاتر ءَ وتواکی لوٹ اِتگ وھدیکہ بازینے آجوئی ءِ لیکہ سر ءَ انت اے ٹولیانی کارانی پسو ءَ ریاستی ادارھاں پوجی لشکر کشی ءُ پھازگی گامگیج چست کتگ چریشی ءَ بازیں ھند ءُ دمگاں ایمنی ءِ جاور نگیگ بوتگ انت، بلے انسانی ھکانی بگیری، زورانسری آوارجنی ءُ لس مھلوک ءِ تاوان ءِ الزام دیم ءَ اتکگ انت اے جاور ءُ سیاسی کرتن ءُ راجی ستکی چد ءُ گیشتر چیلنج جوڑ بوتگ۔
چاگردی ءُ دودمانی تک: بلوچستان ءِ بازیں دودمانی دمگ کہ اود ءَ بلوچ، پشتون ، ھزارہ دگہ مردماں بازیں وھدے بیت کہ جھمنند اَنت جھد ءُ بے ایمنی ءِ سوب ءَ ایوک ءَ مالی دیمروی سانمند نہ بوتگ بلکیں جانسلامتی، زانشت، ءُ روزگار ھم کم تر اِتگ انت ورنا کہ دیمروی ءِ زمہ دار زانگ بیت گیشتر بے روزگاری ءُ بے اوستی ءِ سوب ءَ یا درپہ در بوگ ءَ لاچار اِنت یا کہ گرگ ءُ گار ءُ بیگواہ کنگ بنت اے جاوراں چاگردی بنھشت نزور کتگ۔
بلوچستان ءَ یک ترندناکیں چیزے ھست اود ءَ ھمک ورنا اَچ وتی زندگی ءَ ترس ءِ دیمپان انت آ اگاں شپ ءَ وپس ایت گڑا اے جیڑ ات نہ کنت باندا من سلامت باں یا ناں یا تیرئے ءِ آماچ باں یا گرگ ءُ زندانی کنگ باں چوشیں روچانی میان ءَ ھمک دمگ ءَ پوجی آپریشن یا مردمانی گرگ یا لوگانی سر ءَ بیڑ برگ اے وَ لس بوتگ چرے سبب ءَ ورنا اَچ لوگانی نندگ ءَ وتی زند ءَ گیشتر کوھانی توک ءَ پھریزگی سرپد بنت-
اگاں ورنایانی زند اے داب ءَ ترسینگ ءِ جھد ءَ بیت گڑا اود ءَ ایشی ءَ ھچ شک نیست آیوکیں پدریچ پاکستان ءِ ھاتر ءَ ٹوھیں شوروی جوڑ بیت ءُ پراھی ءِ تباھی ءُ وتی رکینگ ءَ جنز ایت ، اگاں انگت ءَ وھد ءِ ھاکم ءُ زوراکاں بہ جیڑ اِت ءُ اے جیڑہ سیاسی دروشم ءَ گیش ءُ گیوار نہ کت گڑا اے میان ءَ انسانانی جان رو انت بلے آ زمین ءِ دیم ءِ ھونین بیت ءُ درامدیں مردم اَچ بلوچستان ءِ زمین ءَ لڈ انت ءُ رو انت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-