چار اُرشاں زورگریں پاکستانی پوج ءِ سے کارندھانی کوش سلاھانی دستیگ کنگ ءِ زمہ واری بی ایل اے ءَ منّ اِتگ

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مستونگ بالگتر، ءُ سوراب ءَ چار جتاجتائیں کاروائیاں زورگریں پاکستانی پوج ءُ آئی ءِ شریکدار نشانگ کتگ اَنت، وھدے کہ سوراب ءَ پوج کارندھاں چہ سلاہ پچ گپتگ اَنت، تیرگواری ءَ دو جنگولیں سرمچار شھید بیتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں 17 اکتوبر ءَ مستونگ ءِ دمگ دشت ءَ زورگریں پاکستانی پوج ءِ پیادگ کارندھانی سر ءَ سنگر گپتگ ءُ اُرش کتگ، اُرش ءَ زورگریں پوج ءِ دو کارندہ جاہ پہ جاھی مرتگ وھدے کہ یک کارندھے ٹپی بیتگ-

جارکش ءَ گوشتگ کہ بی ایل اے ءِ سرمچاراں مستونگ ءِ دمگ مَرو ءَ گونڈین ھند سر ءَ زورگریں پوج ءِ واستا چیک پوسٹ جوڑ کنوکیں شرکت سلاہ بندیں اُرش ءِ نشانگ کتگ ءُ گرانیں مشینری مانداشتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں بالگتر ءَ کرکی ھند سر ءَ زورگریں پوج ءِ کارندہ ھما وھد ءَ ریموٹ کنٹرول آئی ای ڈی ءَ چہ نشانگ کتگ اَنت وھدے زورگریں پوج ءِ کاروان ءَ پھازوکی دیگ ءَ سر بیتگ اَنت- تراک ءِ آسر ءَ یک کارندھے جاہ پہ جاھی مرتگ –

جارکش ءَ گوشتگ کہ بلوچ لبریشن آرمی ءِ سرمچاراں 16 اکتوبر شپ ءَ سوراب ءِ مل شاھورائی ھند سر ءَ لیویز فورس ءِ یک چوکی یے دستیگ کتگ- اے چوکی زر گرگ ءَ ھمگرنچ بیتگ اَنت، کہ سرمچاراں کاروائی کتگ- اے میان ءَ سرمچارانی یک ٹولی یے ءَ شال – کراچی ءِ بُنجاھی شھدگ سر ءَ یک کلاکے ءَ چہ گیش ناکہ بندی کتگ ءُ پٹ ءُ پول برجاہ داشتگ-

جارکش ءَ گوشتگ ناکہ بندی پولیس ءِ یک گاڑی یے ھمے دمگ ءَ سر بیتگ، سرمچاراں کارندہ ھچ وڑیں تاوان نہ دیگ ءِ زمانت سر ءَ سلاھانی چگل ءَ دیگ ءَ گوشتگ اَنت، سرجمیں کارندھاں وتی سلاہ سرمچارانی دست ءَ داتگ اَنت- بلے یک کارندھے ءَ سرمچارانی سر ءَ تیرگواری کتگ چریشی ءِ نشانگ ءَ آیگ ءَ سنگت مقبول بلوچ پنّام ءِ بالی شھید بیتگ ءُ سنگت کامران بلوچ پنّام ءِ ساروت سک ٹپیگ بیتگ ءُ پد راہ نیم ءَ ٹپّانی درد نہ سگ اِتگ شھید بیتگ-وھدے کہ سرمچارانی پسّھی تیرگواری ءَ ھمے پولیس کارندہ مرتگ-

جارکش ءَ گوشتگ شھید سنگت مک
مقبول محمد حسنی پنّام ءِ بالی ء مولابخش محمد حسنی ءِ نوشکی ءِ دمگ احمد وال ءَ چہ بوتگ۔ دلیریں ءُ ایمانداریں سنگت مکبول ھمے سال ءِ بندات ءَ بلوچ لبریشن آرمی ءَ ھوار بوتگ ۔ آئی ءَ وتی جھد ءُ جنگی ھنرانی سوب ءَ کمیں مدتے ءِ تہ ءَ سنگتانی تہ ھاسیں اگدھے رستگ۔ شور پارود، نوشکی ءُ ھاران ءِ جنگی پڑ ءَ وتی کرد پیلو کتگ اَنت-

جارکش ءَ گوشتگ شھید سنگت کامران سمالانی پنّام ءِ ساروت ءِ شھید جلال الدین ءِ سیادی گوں نوشکی ءِ دمگ احمد وال ءَ بوتگ۔ آ ھمے سال ءِ مارچ ءَ بلوچ لبریشن آرمی ءَ ھوار بوتگ ئے ۔ آ شور پارود، نوشکی ءُ ھاران ءِ جنگی پڑ ءَ راجی آجوئی ءِ ھاتر کرد پیلو کتگ۔ سنگت کامران ءَ وتی شپ ءُ روچ پہ راجی آجوئی ءَ ندر کُتگ اَت ءُ داں گُڈّی ساہ ءَ آجوئی ءِ لیکہ ءِ سر ءَ پہ مدامی نمیران بیتگ-

جارکش ءَ گوشتگ بلوچ لبریشن آرمی اے اُرشانی زمہ واری منّ اِیت – ما اے گپ ءَ پدّر کُتگ کہ لیویز ءُ پولیس پوج کہ گیشتر بلوچ اَنت پمشکا آ بلوچ لبریشن آرمی ءِ تچکی ءَ نشانگ ءَ نہ اَنت ، البت اگاں آ بلوچ سرمچارانی دیم ءَ اڑان جوڑ بہ بنت یا بلوچ راج ءِ سر ءَ زُلم ءُ زوراکیانی تہ ءَ بھر بہ زور اَنت گڑا آ ھم چو زورگریں پاکستانی پوج ءِ وڑ ءَ تچکی ءَ نشانگ جوڑ کنگ بنت۔