ماں کلات ءَ لیویز کارندھاں پولیس ءُ لیویز ءِ ھوار کنگ ءِ ھکومتی پسیلہ ءِ ھلاپ ءَ زھرشانی کنگ بیتگ۔
اھوالکارانی رِد ءَ ھکومتِ بلوچستان ءَ لیویز لشکر ءَ پولیس ءِ تہ ءَ ھوار کنگ ءِ نوٹیفکیشن شنگ کتگ، ایشی ءَ چے رند ماں سرجمیں اُستان ءَ لیویز لشکر ءِ کارندھانی زھرشانی اِنت۔
ماں چوشیں سلسلگ ءَ لیویز لشکر چہ کلات ءِ زھرشانی ریلی ءَ در اتکگ، ماں ریلی ءَ لیویز لشکر کلات ءِ اپسراں ءُ کارندھاں مزنیں کچّے ءَ بھر زُرتگ۔
ریلی ءِ بندات چہ لیویز ہیڈکوارٹر ءَ بوتگ کہ شاھی بازار، اسپتال روڈ، ھربوئی روڈ، دربار روڈ ءُ چہ دگہ مزنیں راہ ءَ گوستگ واتر لیویز ہیڈکوارٹر کلات ءَ آسر بیتگ۔
ریلی ءِ وھد ءَ بھر زیروکانی دستاں گوں پلہ کارڈ چست کُتگ بیتگ کہ آیانی سر ءَ لیویز لشکر ءَ پولیس ءِ تہ ءَ ھوارینگ ءِ نہ منّگ ءِ اوگام نبشتہ بیتگ اَنت۔
ھمے وھد ءَ لیویز لشکر ءِ اپسراں ءُ کارندھاں تران کتگ ءُ گوشتگ کہ لیویز لشکر یک مسالے ءُ 142 سال وھدیگیں لشکرے چوشکہ ماں بلوچستان ءَ ایمنی ءِ واستا کرد پیلو کتگ، لشکر ءِ ورناھاں وتی جانانی کربانی داتگ۔
آیاں گوشتگ کہ گوستگیں وھداں ھم لیویز لشکر ءَ پولیس ءِ تہ ءَ ھوار کنگ ءِ کتگ کاری ناکام بوتگ ءُ انی یک برے پد ءَ آئی ءِ ناکامیں جُھد دیم ءَ روان اِنت۔
تران کنوکاں چہ ھکومتِ بلوچستان ءَ مھکم دزبندی کُتگ کہ مزن آمیدگس زوتیں گامگیج سرجم ستکی کنگ بہ بیت ءُ چہ ھوارینگ ءِ شنگ بیتگیں نوٹیفکیشن زوتیں وڑاں واتر بہ بیت-