روکپتی بلوچستان ءَ تیر گواری ءَ ملا کمال صلاح زئی بیران

روکپتی بلوچستان ءِ دمگی رسانکدر ءِ رد ءَ یک شمبے ءِ روچ ءَ سرباز گرناگ ءِ جھمنند ءُ ٹکانی میان ءَ ایمنی ءِ کرد ءِ آرؤکیں نامی ئیں گچینی ءِ دھشت ملا کمال صلاح زئی ماں ایرانشھر ءَ ناشناسیں مردماں تیرگواری کتگ ءُ کشتگ-

دمگی مردمانی رد ءَ ملا کمال ایرانشھر ءِ مقدس دفاعی چوک ءَ گوں وتی زھگ ءُ ڈرائیور ءَ پرائیویٹ گاڑی یے ءَ سپر کنگ ءَ بوتگ کہ سلاہ بنداں آئی ءِ سر ءَ تیر گواری کتگ۔ ملا کمال ھما جاہ ءَ بیران بوتگ، وھدیکہ آئی ءِ چک ٹپی بوتگ۔ آئی ءِ ھمراھانی تہ ءَ یکے تیرگواری ءَ چہ رک اِتگ۔

یات بہ بیت کہ ملا کمال صلاح زئی یک ھاسیں مردمے بوتگ کہ آئی ءَ چہ 1981 ءَ بگر داں 2000 ءَ اسلامی جمھوریہ ءِ ھلاپ ءَ گھگیری کتگ ءُ آئی ءَ بازیں رند ءَ گوں ایرانی لشکر ءَ ھم ٹکر جتگ۔ ایران ءَ آئی ءِ سرکار ءِ بگیر ءِ سوب ءَ باز رند ءَ آئی ءِ کوش ءِ جھد کتگ ءُ آئی ءِ دزگیر ءُ یل کنگ ءَ پد ھم آئی ءِ نشانگ جوڑ کنگ بوتگ۔

ایشی ءَ پیسر 3 نومبر 1999 ءَ سرباز ءِ میتگ گرناگ ءَ مزنیں کچے ءَ لشکری ​​آپریشن کتگ ات کہ ایشی ءِ مول ءُ مراد میتگ ءِ مردمانی ایرموش کنگ ءُ ملا کمال ءِ دزگیر کنگ بوتگ ات۔ ایشاں ترندیں گھگیری کتگ کہ ایشی ءِ آسر ءَ بازیں کچے ءَ پوجی کشگ بیتگ انت-