ھاران، مستونگ ءُ پنجگور ءَ ھشت مردم زورانسری بیگواہ کتگ اَنت

بلوچستان ءِ جتاجتائیں دمگاں دگہ ھشت ورنا آوار جنگ ءُ بیگواہ کنگ بیتگ اَنت-

نوکیں ھالانی رِد ءَ ھاران ، مستونگ ءُ پنجگور ءَ ھشت ورنا آوار جتگ ءُ بیگواہ کتگ اَنت-

ھاران ءِ دمگ مسکان کلات، کلی ھسن آباد ءَ گوستگیں شپ ءَ کساس یک چل پنچ ملٹ ءَ پاکستانی پوج ءَ لوگانی سر ءَ بیڑبرتگ چار ورنا آوار جتگ ءُ بیگواہ کتگ اَنت-

آوار جنگ بیتگیں یک مردمے ءِ پجّار جھانگیر ء محمد حسن نام ءَ چہ بیتگ کہ بی این پی ءِ باسک نجیب حسن آبادی ءِ کستریں برات اِنت- زانگ بہ بیت کہ اشی ءِ لوگ ءَ چہ دوھزار سیزدہ ءَ ھم یک لشکر کشی یے میان ءَ دو برات آوار جتگ اَت، آیانی تہ ءَ نجیب ھپت ماہ ءَ رند وھدے کہ بابو حسن شش سال ءَ پد چہ آزارجاھاں یل کنگ بیتگ-

دومی احمد شاہ بیگواھیں محمود شاہ ءِ برات کہ دوھزار سیزدہ ءَ چہ بیگواہ ءَ اِنت-

سیمی بیگواہ بیتگیں میر غلام جان مینگل ءِ چُک اِنت ، کہ کلی تمپ جھمنند اِنت کہ ھمے کاروائی ءِ میان ءَ آوار جتگ-

دگہ یک کاروائی یے ھژدہ اکتوبر 2025 ءِ شپ ءَ مستونگ ءِ دمگ کلی کڑک ءَ ایف سی ءِ کارندھاں شپ ءِ کساس لوگانی سر ءَ بیڑبرتگ سے ورنا آوار جتگ ءُ بیگواہ کتگ اَنت-

بیگواھیں ورنایانی پجّار لیاقت ء محمد شریف کلی کڑک جھمنند اِنت ءُ عرفان پڑنگ آباد ءِ جھمنند ھوار اِنت-

کھول ءِ رِد ءَ ورنایانی چست کنگ ءَ پد آیانی ھچ وڑیں ھال نیست-

ھمے وڑ پنجگور ءِ دمگ چہ گرمکان ءَ ھم ھال اِنت پاکستانی پوج ءَ کاروائی کتگ – حمید ء حاجی ظفر آوار جتگ ءُ ناشناسیں جاھے ءَ برتگ-