پاکستان ءُ اوگانستان ءَ ترندیں جنگ بندی ءِ سر ءَ تپاک کتگ، خواجہ آصف ءَ گوں طالبان ءَ گپ ءُ تران برجاہ دارگ ءِ جار جتگ

نامی ئیں ھال رسان بی بی سی لندن ءِ رد ءَ قطری دری کارانی وزارت ءِ نیمگ ءَ شنگ بوتگیں بیان ءِ رد ءَ پاکستان ءُ اوگانستان ءِ نیام ءَ زوت جنگ بندی ءِ سر ءَ تپاک کنگ بوتگ ۔

پاکستان ءِ دفاعی وزیر خواجہ آصف ءَ ھم جنگ بندی ءِ مسام ءِ سر ءَ تپاک کتگ۔

قطر ءِ دری کارانی وزارت ءِ بیان ءَ گوشت کہ قطر ءُ ترکی ءِ میانجی ءَ گپ ءُ تران ءَ اے ھم پیسلہ کنگ بوتگ کہ ھردوک جنگ بندی ءِ برجائی ءِ واستا گپ ءُ تران ءَ برجاہ دار اَنت۔

قطر ءِ دری کارانی وزارت ءِ بیان ءِ رد ءَ ھردوکانی نیام ءَ اے گپ ءِ سر ءَ تپاک کنگ بوتگ کہ برجمیں امن ءُ ایمنی ءِ واست شَوربندی کارروائی ءِ منسوبگ جوڑ کن اَنت ایشی ءِ درچ ءَ دوئیں ملکانج تہ ءَ ایمنی ءَ را ستکی کنگ بیت۔

بیان ءِ تہ ءَ گوشگ بوت کہ اے منوگری ءَ چہ دوئیں ملکانی سیمسرانی سر ءَ جنگ ءُ چوپ ھلاس بیت ءُ دوئیں برادری ملک آیوکیں وھد ءَ امن ءُ برجائی ءِ بنیات ایر بیت۔

اے تپاک نامہ ءَ پد خواجہ آصف ءَ ایکس ءِ سر ءَ بیان شنگ کتگ کہ اے تپاک نامہ ءَ پد ’’اوگانستان ءَ چہ ناشرکاری‘‘ ءِ زنجیر زوت بند بیت ءُ دوئیں ھمساھگیں ملک یکے دومی ءِ سرزمین ءِ شرپ ءَ کن اَنت۔

خواجہ آصف ءِ رد ءَ 25 اکتوبر ءَ استنبول ءَ ڈلانی نیام ءَ دگہ گند ءُ نند بیت ءُ ایشی ءِ سر ءَ سرجمیں رنگ ءَ گپ ءُ تران بیت انت ۔

زانگ بہ بیت شمبے ءِ روچ ءَ قطر ءِ مزن شھر دوحہ ءَ بوتگیں گپ ءُ تران ءَ پاکستانی ڈل ءِ سروکی ءَ وزیر دفاع خواجہ آصف ءَ کتگ ۔ بی بی سی لندن ءَ پاکستان ءِ سرکاری ٹی وی پی ٹی وی ءِ درور دیان ءَ گوشتگ آئی ایس آئی ءِ سروک ءُ راجی سلامتی ءِ مشیر لیفٹیننٹ جنرل عاصم ملک ءَ ھم اے گپ ءُ تران ءَ بھر زرتگ۔

طالبان ءِ ڈل ءِ سروکی ءَ طالبان سرکار ءِ وزیر دفاع ملا یعقوب اِنت ءُ طالبان ءِ انٹیلی جنس ءِ سروک مولوی عبدالحق وسیک ءَ ھم بھر زرتگ بوتگ۔

اولی راؤنڈ ءِ گپ ءُ تران ءَ پاکستان ءَ اَچ تالبان سرکار ءَ لوٹ کتگ ءُ گوشتگ کہ آ ٹی ٹی پی ءُ بی ایل اے ءِ ھلاپ ءَ کاروائی بہ کنت-

دومی نیمگ ءَ اوگان سرکار یکشل ءَ پاکستان ءِ اے جتگیں بھتاماں رد کنگ ءَ گوشگ ءَ انت اوگانستان ءَ ھچ چوشیں گل جاڑیگ نہ انت کہ آ دگہ ملکے ءِ ھلاپ ءَ کارمرد بہ بیت انت-