شال : علی اصغر ءِ زورانسری بیگواھی ءَ بیست چار سال سرجم، کھول ءَ پریس کانفرنس یل کنگ ءِ لوٹ

بلوچ سیاسی کارکن علی اصغر ءِ زورانسری بیگواھی ءَ بیست چار سال سرجم بیگ ءَ آئی ءِ چُک غلام فاروق ءَ شال ءَ پریس کانفرنس کنان ءَ پت ءِ یل کنائینگ ءُ زورانسری آوار جنی ءِ ھلاس کنگ لوٹ کتگ-

غلام فاروق ءَ گوشتگ کہ آئی ءِ پت علی اصغر اولی رند ءَ دوھزار ءَ چہ شاھوانی دگ شال ءَ پاکستانی پوج ءِ کارندھاں زورانسری بیگواہ کتگ ءُ پد ءَ چاردہ روچ ءَ رند یل داتگ – بلے دومی رند ءَ ھژدہ اکتوبر 2001 ءَ آ دومی رند ءَ محمد اقبال نامیں مردمے ءِ ھمراھی ءَ ڈگری کالج شال ءِ دیم ءَ چست کتگ، محمد اقبال بیست چار روچ ءَ رند یل داتگ، بلے علی اصغر انگت ریاستی ادارھانی دست ءَ اِنت-

آئی ءَ گوشتگ ما گوستگیں بیست چار سالاں چہ وتی پت ءِ یل کنائینگ ءِ ھاتر ءَ آمیدگس، کمیشناں ءُ ھکومتی درّاں ٹُکگ ءَ ایں، بلے مارا انساپ نہ رس اِتگ- اے کار ءَ مئے زندمان تباہ کتگ-

غلام فاروق ءَ گوشتگ کہ دراجکشیں ودار ءُ انساپ ءِ نہ رسگ ءِ سوب ءَ آئی ءِ کھول سک زھنی ءُ مالی زور ءِ آماچ اِنت، آئی ءِ وانگ ھراب بیتگ ءُ آ نپسیاتی دلسیاھی ءِ آماچ اِنت-

آئی ءَ گوشتگ کہ زورانسری آوار جنی تھی ءُ میان استمانی کانود ءِ سنگین ءِ ھلاپ ورزی اِنت، کہ شھریانی بُنکی ھکانی لگتمالی اِنت -ھر دور ءِ ھکومت ءَ اے جیڑہ ءِ گشینگ ءِ کول کتگ، بلے کار نہ کنگ ءِ سوب ءَ بلوچستان ءَ اے دْرچ انگت ھم برجاہ ءَ اِنت-

آئی ءِ گوشگ اِنت کہ اگاں ریاست وت ءَ جمھوری گُرا آئی ءَ انسانی ھکانی شرپ ءَ دلجمی دیگ لوٹ اِیت- زورانسری آوار جنی تھنا بلوچانی جیڑہ نہ اِنت بلکیں انسانیت ،انساپ ءِ نزام ءُ ریاستی ادارھانی شرپ ءِ چکاس اِنت-

آئی ءَ ھکومت پاکستان، آمیدگس ءُ ریاستی ادارھاں چہ لوٹ کتگ کہ سرجمیں بیگواھیں مردمانی یل کنگ ءِ دلجمی، زورانسری آوار جنی ءِ ھلاپ ءَ سرجمیں کانودے جوڑ بہ کنت، ءُ گاں علی اصغر زندگ اِنت گُڑا آئی ءَ یل بہ کن، اگاں ناں آئی ءِ درگت ءَ سرپدی بدے اِت دانکہ کھول اے درد ءُ اندوھاں در بئیت-

پریس کانفرنس ءِ آسری ءَ غلام فاروق ءَ گوشتگ کہ بے تواری ایردست ءِ ھمراہ نہ اِنت، بلکیں سرجمیں انسانیت ءِ ھلاپ ءَ جرم اِنت ءُ میان استمانی ھکانی ادارھاں چہ دزبندی کن ایں کہ آ بلوچستان ءَ برجاہ زورانسری آوار جنی ءِ ھلاپ ءَ توار چست بکن اَنت-