پنجگور ءُ شال ءَ پاکستانی لشکر ءِ دست ءَ دہ مردم بیگواہ کنگ بوتگ اَنت

بلوچستان ءِ دو جتاجتائیں دمگ پنجگور ءُ شال ءَ پاکستانی پوج ءِ دست ءَ دہ مردم زورانسری بیگواہ کنگ بیتگ اَنت-

شال ءِ ھند عیسیٰ نگری بروری دگ ءَ ریاستی چیریں ادارھانی کارندھاں دو نودربر زورانسری آوار جتگ ءُ بیگواہ کُتگ اَنت

اھوالکار ءِ رد ءَ ھپدہ اکتوبر 2025 ءِ شپ ءِ ساھت سے ءِ نزیک ءَ ریاستی چیریں ادارھانی کارندھاں چہ عیسیٰ نگری ءِ یک لوگے ءِ سر ءَ بیڑ بُرتگ ءُ دو نودربر نظیر بلوچ ء شاہ محمد ءُ وھاب بلوچ ء عزیز بلوچ زورانسری آوار جتگ ءُ بیگواہ کُتگ اَنت۔

کھول ءِ گوشگ اِنت کہ پرندوشی شپ ءَ ساھت سے ءِ نزیک ءَ ریاستی چیریں ادارھانی کارندہ اتکگ ءُ دیم پوشیں مردم بیتگ اَنت نظیر بلوچ ءُ وھاب بلوچ زورانسری آوار جتگ ءُ بیگواہ کُتگ اَنت ۔

نظیر بلوچ ءُ وھاب بلوچ بلوچستان ءِ جتاجتائیں ھند ءُ دمگاں پہ وانگ ءُ زانگ ءِ ھاتر ءَ شال ءَ اتکگ اَنت کہ آ زوریں بیگواھیں آماچ بیتگ اَنت نظیر بلوچ مستونگ ءِ ھند اسپلنجی ءِ جھمنند اِنت ءُ وھاب بلوچ پسنی ءِ ھند سردشت ءِ جھمنند اِنت ۔

ھمے وڑ پنجگور ءَ ھال اِنت کہ پاکستانی پوج ءَ جتاجتائیں دمگاں بیڑبرتگ بازیں مردمے آوار جنگ ءَ پد بیگواہ کتگ-

دمگی اِھوالکار ءِ رِد ءَ کاروائی پنجگور ءِ بونستان چونگی سر ءُ عیسیٰ ءِ دمگاں کنگ بیتگ اَنت-

دمگی مردمانی رِد ءَ بونستان چونگی سر ءَ شپ وھد ءَ پوج ءَ لوگانی سر ءَ بیڑبرتگ ءُ زھیر، حاصل، احسان، سراج، سعیداللہ ءَ ھوار یک انچیں مردمے آوار جتگ کہ آئی ءِ پجّار انگت نہ بیتگ-

ھمے وڑ پنجگور ءِ دمگ عیسیٰ ءَ ھم پوج ءَ دو دگہ مردم آوار جتگ – آیانی پجّار ساکم ء الی جھمنند سورگ عیسیٰ ءُ جھانزیب ء علی جان جھمنند عیسیٰ سند سر ناماں چہ بیتگ اَنت – دمگی مردمانی گوشگ کہ دوئیں مردم چہ لوگ ءَ چست کنگ بوتگ اَنت-

آوار جنگ بیتگیں مردمانی کھولانی گوشگ اِنت مئے مردمانی ھچ وڑیں ھال نیست-

زانگ بہ بیت بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت ھمکروچ آوار جنی ءِ ھال نکش بیگ ءَ اَنت-