اوگانستان ءَ پاکستان ءِ سر ءَ اوگان اُستان پکتیکا ءِ سر ءَ اُرشانی وھد ءَ اوگان کرکٹزز ءِ کوش ءِ بھتام جتگ ءُ آیوکیں ماہ ءَ پاکستان ءَ شیڈول سے نیمگی سریز ءَ دزکشی ءِ جار جتگ-
افغان کرکٹ بورڈ ءَ وتی بیان ءَ گْوشتگ کہ افغان کرکٹ بورڈ ” اُستان پکتیکا ءِ ھند ارکون ءَ سیادی داروکیں بھادریں کرکٹرز ءِ بیرانی ءِ سر ءَ دلپدردی ءُ گم ءِ درشان ءَ کنت کہ آ مرچی شپ ءَ پاکستانی اُرش ءَ نشانگ جوڑ کنگ بوتگ اَنت۔“
اے درگت ءَ پاکستانی سرکار ءُ پوج ءَ ھچ وڑیں بیان دیم ءَ نیاؤرتگ انت۔
افغان کرکٹ بورڈ ءِ گوشگ انت کہ اے وئیل ءَ ارکون ءِ سئے کھلاڑء، کبیر، سبغت اللہ ءُ ہارون ءَ ھوار پنچ مردم بیران بوتگ انت ءُ ھپت ٹپی بوتگ انت۔
بورڈ ءِ گشگ انت کہ اے کھلاڑی پیسر ءَ دوستانہ کرکٹ میچ ءَ بھر زورگ ءِ ھاتر ءَ اُستان پکٹیکا ءِ بنجاھی شھر شرانہ ءَ شتگ انت ءُ ارکون ءَ واتر بوھگ ءَ پد یک مچی ءِ وھد ءَ نشانگ جوڑ کنگ بوتگ انت۔
اوگانستان ءِ آیوکیں ماہ ءَ نومبر ءَ پاکستان ءِ تر ءُ تاب کنگ بوتگ کہ آ سئے ملکی ٹی ٹوئنٹی سیریز ءَ بھر بہ زور انت، ایشی ءِ تہ ءَ سروکی کنوک پاکستان ءُ سری لنکا ءِ کرکٹ ٹیم ہم بھر زورگی بیتگ انت۔
اوگانستان ءِ کرکٹ ٹیم ءِ کپتان راشد خان ءُ پیسریگیں کپتان محمد نبی ءَ گوں دگہ کھلاڑیاں ھم اے اُرش ایر جتگ۔