پاٹی ءِ تہ ءَ جھد ءِ رھبند
نبشتہ کار : لیو شاؤ جی
رجانک : مھروز ھمّل
دی بلوچستان پوسٹ
سنگتاں! نوں جست تچک اِنت ءُ آ ایش اِنت کہ پاٹی ءِ تہ ءَ جھد ءِ شریں ءُ جوانیں وڑے ءَ چلائینگ کجام انت۔
اے جیڑہ سر ءَ سویت یونین ءُ دومی ڈیھانی کمیونسٹ پاٹیاں ھوار وتی چین ءِ کمیونسٹ پاٹی ءَ بازیں تجربہ ھست اِنت لینن، اسٹالن ءُ مئے وتی پاٹی ءِ بنجاھی پتر ءَ اے درگت ءَ بازیں سرپدی یے داتگ، مئے سنگتاں اے تجربہ ءُ سرپدی شریں وڑے ءَ وانگ لوٹ اَنت وھدیکہ ما پاٹی ءِ جوڑ کنگ ءِ جیڑہ سر ءَ بہ اِیں گڑا ما اشی ءِ سر ءَ ھم باوست کن ایں بلے مروچی ناں، من وتی سنگتانی ھاتر ءَ بس ھما شکاں زوراں کہ آیانی بنیاد چین ءِ کمیونسٹ پاٹی ءِ تہ ءِ جھد ءِ سر ءَ اِنت۔
درستاں پیش سنگتاں اے گپ پھمگ لوٹ اِیت کہ پاٹی ءِ تھ ءِ جھد ءِ جیڑہ سک باز سنگین ءُ زمہ داری یے جیڑہ اَنت مارا آ سک باز شریں وڑے ءَ پیلو کنگی اَنت، آیانی سر ءَ مارا ھچبر بے پرواھی کنگی نہ اِنت تھی جھد ءِ چلائینگ ءِ ھاتر ءَ مارا درستاں پیش پاٹی ءِ تچکیں (نقطہ نظر) وتیگی کنگ لوٹ اَنت آ ایش اِنت کہ ھرچی کہ پاٹی ءِ مپاد ءَ اِنت آ مارا سرجم کنگی اِنت، جوانیں وڑے ءَ کار کنگی اِنت، دومی سنگتانی ردیانی شر کنگ ءَ آیانی کمک کنگی اِنت جیڑہ شریں وڑے ءَ گیش ءُ گیوار کنگی اِنت، مارا وت ءَ ھم تچک بوگی اِنت ایشی ءِ ھاتر ءَ وانگ ءُ پٹ ءُ پول کنگ ھژدری اِنت اشی ءَ ھوار مارا شریں وڑے ءَ جوانیں رھشونے ءِ چیردستی ءَ پاٹی ءِ تہ ءَ جھد چلائینگ لوٹ ایت۔
سنگتاں اے گپ شریں وڑے ءَ پھمگ لوٹ اِیت کہ مارا وتی (نقطہ نظر) شر کنگ لوٹ اِیت گڑا ما دومی ءِ (نقطہ نظر) ءَ شر کت کن اِیں۔ وھدی کولے کہ“ دومیانی شر کنگ ءَ پیسر اول ءَ وت ءَ شر کن “ وھدیکہ شما وت گڑ ءُ منج ءِ تہ ءَ در اتک کن اِت گڑا دومیاں چہ گڑ ءُ منج ءِ درآیگ ءَ کمک کت کن اِت وھدیکہ شما وت تچکیں رھبند ءُ لیکھانی سر ءَ بہ بہ اِت گڑا دومیانی ردیں لیکہ ءُ رھبنداں تچک کت کن اِت اگاں شما رھبندی پاک ءُ پلگار اِت گڑا شما دومیانی ردیں ھیالاں پلگار اِت کن اِت اگاں شما ھاسیں جیڑوے ءِ درگت ءَ راستیں چیزے یکجاہ کتگ آ جیڑہ شریں وڑے ءَ ونتگ اَنت گڑا شما دومی سنگت ءُ پاٹی ءِ کمک ءَ کت کن اِت۔
اگاں یک سنگتے اے درسیں گپاں نہ کنت اگاں آ یکبرے وت ءَ شر نہ کنت وت تچکیں رھبند ئِے نہ گپتگ انت اگاں آئی ءَ دری جاور ءُ رھبندانی درگت ءَ نہ ونتگ یا جیڑہ شریں وڑے ءَ نہ ونتگ اَنت آئی ءِ تہ ءَ لھتے نزوری ھست اَنت ءُ بازیں شکّانی درگت ءَ وت تچک نہ اِنت گڑا اے وڑیں مردم تھی جھد ءِ میان ءَ دومیانی ردیاں شر کت نہ کنت اگاں آ اے درستیں چیزاں ابید ھم اے جھد ءَ ھورُّکاں بُستی چلائین اِیت گڑا گُڈّ سر ءَ آ ردیں راھے ءَ سر بیت اِنت۔
بس دری مھکمیں راستی بس ھنچیں تجربہ کہ کرتن بوتگ انت ءُ بس راستی ھر چیز ءِ سر ءَ سوبمندی ءَ گپت کنت مئے وت شرگداری ءُ پاٹی ءِ تھ ءِ جھد ءِ مول اے نہ اِنت کہ پاٹی ءِ گل ، یکجاھی ، نظم و ضبط ءَ نزور بہ کن اِیں ءُ ناکہ کارانی تہ ءَ اڈاند ودی بہ کن اِیں ایشی ءِ پشدر آئی ءِ مول پاٹی ءِ گل ءِ یکجاھی ءَ مھکم کنگ ءُ نظم و ضبط ءَ برز دارگ ءُ وتی کاراں تیز کنگ اِنت پاٹی ءِ تہ ءِ جھد اے وڑ چلائینگی نہ اَنت کہ آ ردیں راھے بہ گیپت ءُ ھد ءَ چہ گیش جمھوریت ءِ نیمگ ءَ بہ بارت۔ پاٹی ءِ تہ ءَ ناکہ ٹکی تْرام ءَ جاہ ھست ءُ ناکہ ھد ءَ گیش جمھوریت ءَ پاٹی ءِ تہ ءَ میانی زند ءِ دو گچینی نیمگ انت۔
پاٹی ءِ تہ ءَ جھد ءِ چلائینگ ءِ وھد ءَ پاٹی ءُ آشوب ءِ نیمگ ءَ وتی زمہ واری شریں وڑے ءَ پیلو کنگ لوٹ اَنت۔
دومی چیز ایش اِنت کہ سنگتاں پھمگ لوٹ اِیت کہ بنداتی ءَ پاٹی ءِ تہ ءَ وڑ وڑیں لیکہ ءُ رھبندانی میان ءَ جھد کنگی اِنت اے پاٹی ءِ تہ ءَ وڑ وڑیں لیکہ ءُ رھبندانی رد ءُ بدل ءَ دیم ءَ کار اِیت اے ھژدری اِنت کہ تاں ھمودا لیکہ ءُ رھبندانی سیادی اِنت آیانی ءُ دومی چیزانی میان ءَ شریں وڑے ءَ لکیرے کشگ لوٹ اِیت بلے تاں ھمود ءَ کہ گل ، جھد ءِ وڑ ءُ پیم ، گپ جنگ ءُ شرگداری ءِ سیادی اِنت سنگتاں لوٹ اِیت ھمینچو کہ بیت کنت آ وتی لھجہ ءَ نرم بہ کن اَنت بگیرداری ءِ رویش ءَ مہ دار اَنت شریں وڑے ءَ باوست ءُ دلیل دیگ ءِ جھد ءَ بہ کن اَنت۔
ھمینچو بیت کنت گلی پیسلہ بہ کن اَنت ءُ ناکہ گلی رزلٹ ءِ درکنگ ءِ جھد ءَ بہ کن اَنت پاٹی ءِ تہ ءَ جھد ءِ چلائینگ ءِ ھاتر ءَ سنگتاں سرجمی ءَ بے باک ، ایمانداری ءُ زانشتی رویشت برجم کنگ ءِ جھد کنگ لوٹ اِیت تاکہ لیکہ ءُ رھبندانی رد ءَ یکجاھی برجاہ دارگ بہ بیت بس ھنچیں جاہ ءَ کہ دگہ راہ ءُ در مہ بیت ءُ اے ھژدری بہ بیت گڑا مارا جھد ءِ جنگ جویانہ وڑے ءَ کنگ لوٹ اِیت درستیں پاٹی گلاں وتی ھَداں بوگی اِنت ءُ اے آیانی ھک اِنت کہ ھر وڑیں پاٹی ءِ باسک ءِ کہ یکشل ءَ ردی کنان اَنت آیانی سر ءَ پاٹی ءِ رھبند ءَ لاگو کنگ گلی گام گیج زورگ ھژدری اِنت بلے وتی من مانی ءَ اے وڑ کنگ مہ بیت پاٹی رھبندانی برجاہ دارگ بس اے نہ اِنت کہ پاٹی گل پاٹی باسکاں سزا بہ دنت۔ اے نہ اِنت پاٹی ءِ نظم ضبط ءُ پاٹی یکجاھی بس سنگتانی سزا دیگ اِنت اگاں اے وڑ بہ بیت بزاں پاٹی نیستی ھساب ءَ انت بلکیں پاٹی ءِ تہ ءَ لیکہ ءُ رھبندانی ھما راستی ءِ یکجاھی ھست اَنت آ پاٹی ءِ باسکانی زانشت ءِ سر ءَ ایر کنگ بیت اگاں ما لیکہ ءُ رھبندانی رد ءَ پلگار ایں اگاں ھژدری بہ بیت گڑا گل ءِ رزلٹ ءِ درکنگ ارزان بیت پاٹی ءِ باسکاں چہ پاٹی ءَ درکنگ یا وتی وڑ ءَ درآیگ ءُ روگ ءَ یک ملٹے ھم نہ لگّ اِیت تاں ھمود ءَ کہ جتا جتائیں لیکہ ءُ رھبندانی سیادی اِنت سنگتانی بگیری، باوست ءَ پاٹی گل ءِ باسکانی گیشی ءُ برزی پتر ءُ آیانی ھکم منگ ءَ جتا کنگ نہ بیت ءُ پد ءَ پاٹی ءِ تہ ءَ نا کہ یکجاھی بچّ اِیت ءُ ناکہ کرتن ۔ سنگت بس اے ھاتر ءَ گل ءِ بگیری ءَ نہ دار اَنت ءُ نا کہ گیشتریں بھر پاٹی ءِ برزی تک ءِ پتر ءِ بگیری ءَ دار اَنت آجوئی ءَ اے کدم ءَ چست کن اَنت کہ آ رھبندی بگیری دار اَنت ءُ ھمیشی سر ءَ بوگ لوٹ اَنت اے سر ءُ پر پاٹی ءِ بنکی رھبندانی بگیری بیت۔
پاٹی ءِ تہ ءِ جھد ءَ مارا تچکیں وڑ وتیگی کنگ لوٹ اِیت ھمود ءَ کہ لیکہ ءُ رھبندانی سر ءَ جنگ ءِ سیادی اِنت اود ءَ درستاں جنگولی جزبہ بوگ لوٹ اِیت بازیں سنگتاں ردی کتگ یک نیمگے کہ اود ءَ نا کہ لیکہ ءُ رھبندانی جنگے بوتگ ءُ نا کہ بگیرداری یے دومی نیمگ ءَ گل ءُ جھد ءِ وڑ ءُ پیمانی سر ءَ گیشتر جنگ بوتگ آیاں ھنچو ترندی ءَ گوں باوست کتگ کہ دیم اِش سُھر ترّ اِتگ آیاں یکے دومی بد ءُ رد کتگ زاھے داتگ وت ماں وت ءَ ھنچوش مڑ اتگ اَنت یکے ءُ دومی ءَ دُچار نہ کپتگ اَنت، وت ماں وت زھر بوتگ اَنت بلے ھیرانی ءِ گپ ایش اِنت کہ آیانی تہ ءَ رھبند ءُ لیکھانی سر ءَ ھچ وڑیں بگیرداری یے نہ بوتگ۔
سیمی چیز : پاٹی ءِ گل یا پاٹی ءِ سنگت یا آیانی کار ءِ سر ءَ کہ شرگداری یے بیت گڑا آ شریں وڑے ءَ کنگ بہ بیت بالشویک وتی نگداں بالشویک ءِ رد ءَ کن اَنت بازیں نگد، دومیانی ردیاں گیش کنگ ءُ پیشدارگ، بے سوب ءَ بد ءُ رد کنگ ھچ وڑ ءَ شر نہ اِنت چوش نہ اِنت کہ پاٹی ءِ تہ ءَ جھد تیز بہ بیت بلکیں تھ ءِ جھد میانی ھد ءَ بہ بیت میانی وڑے ءَ چلائینگ بہ بیت نشانگ ءَ سرگوز کنگ یا نشانگ سر بوگ ءُ ھچ نہ گرگ ھردو شر نہ اَنت وھدیکہ دومیانی ردی گوشگ بنت آیانی سر ءَ باوست بیت گڑا سنگتاں بنکی شک پھمگ لوٹ اَنت ءُ شرتریں شکانی سر ءَ زور دیگی اِنت۔ سنگتاں دومیانی دیم ءَ جوانیں وڑے ءَ جیڑہ ایر کنگی اِنت تا کہ سرجمیں گپ تچک بہ بنت ءُ جیڑہ گیش ءُ گیوار بہ بنت سنگتاں دومیانی کسان کسانیں ردی یکجاہ کنگی نہ اَنت آیانی تہ ءَ بلکہ لھتے راست بہ بیت ءُ ھمے بنیاد ءَ آئی ءَ پاشک کنگ بندات بہ کن اَنت چریشی ءَ مردم ھمے پگر کن اَنت کہ شما پہ زور ردی کشّگ ءَ اِت ءُ آیانی سر ءَ اُرُش کنگ ءَ اِت۔
وھدیکہ شما سنگتے ءِ سر ءَ شرگداری کنگ ءَ بہ اِت آئی ءِ کاراں چارگ ءَ بہ اِت گڑا بس آئی ءِ ردی ءُ نزوری گوشگ مہ بنت بلکیں آئی ءِ سوبمندی، شریں کار، شریں گپ ءُ ھبرانی ھم ستا کنگ بہ بیت اگاں آئی ءِ نیمگ ءَ کسانیں شری یے بوتگ مارا آ ھم گوشگی اِنت ھچ وڑ آئی ءِ اے شری بے ھیال کنگی نہ اِنت بس ھمے وڑ ءَ شما آئی ءِ کارانی سرجمی ءَ ٹپاسگ ءُ آئی ءِ سر ءَ شرگداری کت کن اِت ءُ آئی ءَ دیمروی کنگ ءَ کمک ءُ آئی ءَ وتیگی کت کن اِت ھمے وڑ ءُ پیم ءَ مارا پاٹی ءِ تھی جھد ءِ تہ ءَ کنگ لوٹ اِیت بزاں نشانگ ءِ سر ءَ پرگوزگ یا بے ھیال کنگ ءِ بدل ءَ مارا جوانیں رویش ءُ جوانیں وڑے ءَ نگد کنگ لوٹ اِیت۔
چارُمی چیز ایش اِنت کہ پاٹی ءِ تہ ءَ یا ڈن ءَ جھد ءِ نیاد بند کنگ لوٹ اَنت وڑ وڑیں نزوری ءُ ردی ٹپاسگ ءُ گوشگ بہ بنت اول سر ءَ مارا گوں کار ءُ پد ءَ گوں مردم ءَ دپ کپگی اِنت اول سر ءَ مارا وئیل، بگیرداری ءِ شک، ردی ءُ نزوریانی سوب کم کنگ لوٹ اَنت ءُ اے گوشگ لوٹ اِیت کہ کے زمہ دار اِنت کئی زمہ واری اِنت ءُ آئی ءِ کمی مارا چہ ھمائی ءَ بندات کنگ نہ لوٹ اَنت کہ اے ردی ءُ نزوریانی زمہ دار تو ئے وھدیکہ یک سنگتے ءِ دست ءَ نابزانتی ردی یے بیت ءُ آ وت شری ءَ سرپد اِنت ءُ ردی ءَ در کنگ ءَ اَنت گڑا مارا ھچ گوشگی نہ اِنت وھدیکہ ما پاٹی ءِ تہ ءَ جھد کن اِیں گڑا آئی ءِ مول وتی باسک ءُ سنگتانی سر ءَ وار کنگی نہ اَنت ءُ نا کہ دومیانی سر ءَ اُرُش کنگ اِنت اے پالیسی ڈُنگ، دز ءُ زالمانی اِنت کہ جپاکشّیں مھلوک ءِ بگیری ءَ کارمرز اِش کن اَنت مئے پالیسی وت ماں وت ءَ یکے ءُ دومی ءِ کمک ءُ یکے ءُ دومی ءِ نزوریاں ٹپاسگ ءِ پالیسی اِنت۔
لھتے سنگتانی دروشم ءَ کہ بار بار پیسلہ ، نظم ءُ ضبط ءُ کمیونسٹ رھبندانی بگیری ءَ کن اَنت ءُ رھبندانی رد ءَ آیانی ھچ دلیل کاری مہ بنت گڑا ایشی ءِ موکل ھست بلکیں ھژدری اِنت کہ دیوان کنگ بہ بیت ءُ آیانی ارزی نبشتہ بہ بیت بلے اے وڑیں کرتن کنگ بلاھیں ردی یے۔
پنچمی چیز : ھما سنگتانی سر ءَ نگد کنگ بیت یا سزا دیگ بنت، آئی ھم وتی ھک ءَ گپ جنگ ءِ موہ دیگ بہ بیت، آئی ءِ بارو ءَ کہ گل ءِ ھرچ پیسلہ بیت آ سرپد کنگ بہ بیت ءُ اے درستیں چیز آئی ءِ دیم ءَ کنگ بہ بنت اگاں گپ ءُ باوست ءَ پد آ ایشاں مہ منّ اِیت گڑا آ برزی تک ءِ پتر ءَ دیم دیگ بہ بیت اے وڑیں جاورے ءِ تہ ءَ کہ سنگتے سزا دیگ بوتگ ءُ آ ایشی ءَ مہ منّ اِیت گڑا ھمے پاٹی گل ءَ لوٹ اِیت کہ ایشی برزی تک ءِ پتر ءَ دیم بہ دنت آ توری منّوک مہ بیت ھر وڑیں پاٹی گل کہ آئی ءَ سنگتے سزا داتگ آئی ءَ برزی تک ءِ پتر ءَ وتی گزارش کنگ ءَ داشت نہ کنت ھچ وڑیں پاٹی باسکے ءَ چہ گزارش ءِ ھک پچ گرگ نہ بیت ھچ وڑیں پاٹی گل، گلے ءِ گزارش ءَ برزی ءِ تک ءِ پتر ءَ سربوگ ءَ داشت نہ کنت ھمود ءَ کہ لیکہ ءُ رھبندانی سیادی اِنت ھر یک پاٹی باسکے برزی تک ءِ پاٹی ءِ پتر یا بنجاھی پتر ءِ گور ءَ وتی پاٹی گل ءِ گزارش ءَ برت کنت اگاں دلگوش دیگ مہ بیت اے وڑیں گزارش ءَ برزی تک ءَ برگ ءَ ساری ھما سنگت ءَ وتی گپانی پدرائی وتی پاٹی پتر ءِ دیم ءَ کنگ لوٹ اِیت بگیرداری ءُ آئی ءِ سوب گوشگی اِنت اگاں بے زمہ داری ءَ وتی گپاں برزی تک ءِ پتر ءِ گور ءَ برگ ءَ اِنت ءُ آئی ءَ دگا دیگ ءِ جھد ءَ کنگ لوٹ اِیت گڑا آئی ءَ وتی گل ءِ تہ ءَ وتی دپ دارگی نہ اِنت یکبرے کہ وتی گزارش برزی تک ءِ پتر دیگ ءَ پد گڈی پیسلہ ھم ھما پتر ءِ دست ءَ بیت
برزی تک ءِ پتر جھلی پتر ءِ رھبندی کاراں رد کت کنت، سزایاں کم یا گیش کت کنت اگاں رھبندانی جیڑہ ءِ سر ءَ باوست ءَ پد ھم پاٹی گل ءِ ھچ رزلٹ دات مہ کنت گڑا اے جیڑہ ءِ پیسلہ ءَ اکثریت کنت ایشی ءَ پد کمیں مردماں کہ انگت بگیرداری بہ بیت گڑا وتی گپاں جت کت کن اَنت بلے شرت ھمیش اِنت کہ آ گلی جیڑہ ءُ وتی سُرپراں گیشیں مردمانی پیسلھے پابند کن اَنت اگاں برزی تک ءِ پتر یا برزی تک پاٹی باسکاں، یا جھلی تک ءِ پتر ھمے لوٹ ءَ کن اَنے کہ ایشی ءِ چار ءُ ٹپاس ءَ دیوان ءِ اڈ دیگ بہ بیت گڑا برزی تک ءِ پتر ءَ اے کارانی چار ءُ ٹپاس ءِ ھاتر ءَ دیوان اڈ دیگی اِنت۔
ششمی چیز: ایش انت کہ پاٹی ءِ تہ ءَ کہ ھما جھد کنگ بیت ءُ پاٹی ءَ ڈن کہ ھما جھد کنگ بیت آئی ءِ تہ ءَ یک لکیرے کشّگ لوٹ اِیت ءُ ایشی ءَ ھوار ھردوکانی میانی سیادی ءِ ھم برجاہ دارگ لوٹ اِیت ھما جھد کہ پاٹی ءَ ڈن کنگ بیت ایشی ءِ تہ ءَ ھما کار کنگ مہ بنت کہ پاٹی ءِ تہ ءِ جھد ءَ بنت ءُ نا کہ تہ جھد ءِ وڑ ءُ پیم ڈن ءَ کارمرز کنگ ءَ بہ بنت۔
اے ھیال شریں وڑے ءَ دارگ لوٹ اِیت کہ پاٹی ءِ بگیری ءَ جھد ءِ چلائینگ یا آئی ءِ ترسینگ ءِ ھاتر ءَ دری تاکت یا جاورانی نپ چست کنگ مہ بیت درستیں پاٹی ءِ باسکاں ایشی ءِ ھیال دارگی اِنت ءُ ھُژّار بوگی اِنت کہ ٹپ اِتگیں ٹراٹسکی ءُ آشوب دژمنیں مردم پاٹی ءِ تہ ءِ جھد ءُ جیڑیانی نپ چست مہ کن اَنت وتی پرشت ءُ پروشی کاراں بندات مہ کن اَنت پاٹی ءِ تہ ءَ جھد ءِ چلائینگ ءِ وھد ءَ پاٹی باسکاں لوٹ اِیت کہ اے وڑیں مردماں موہ مہ دے اَنت کہ جاورھالاں نپ چست بہ کن اَنت اے ھما وھد ءَ بوت کنت کہ پاٹی ءِ رھبندانی پابندی بہ بیت ءُ پاٹی ءِ تہ ءَ جھد راستیں رھبنداں گوں چلائینگ بہ بیت۔
پاٹی ءِ تہ ءَ بس پچیں جھد ءِ موکل ھست بلے اے جھد ءِ موکل ھچبر دیگ نہ بیت کہ چریشی ءَ پاٹی ءِ رھبند یا پاٹی ءِ نظم ءُ ضبط سانمند بہ بنت۔
ھپتمی چیز: پاٹی ءِ تہ ءَ بے رھبندیں جنگ ءِ دارگ ءِ ھاتر ءَ اے گام گیج زورگ ھژدری اِنت۔
1۔ ھر ھما پاٹی باسک ءَ کہ آئی ءَ گوں پاٹی ءِ برزی تک ءِ پتر یا پاٹی گلے ءَ گوں بگیرداری ھست گڑا آئی ءَ لوٹ اِیت کہ آ وتی گپاں یا نگداں دگہ پاٹی گلے ءِ گور ءَ دیم بہ دنت ءُ دگہ بے سر ءُ پادیں گپ مہ جنت۔
2۔ ھر ھما پاٹی باسکاں کہ دومی پاٹی باسک یا لھتے اگدہ دارنی گوم ءَ بگیرداری ءِ ھست گڑا ھمایانی دیم ءَ یا ھمائی ءِ پاٹی گل ءَ تنکید کت کنت آئی ءَ اے درگت ءَ بے پروائی ءَ گپ جنگ نہ لوٹ اِیت۔
3۔ اگاں پاٹی ءِ باسک یا پیسری پاٹی پتر ءَ گوں بگیرداری یے ھست گڑا اے جیڑہ ءَ برزی تک ءِ پتر ءَ ایرکت کن اِت چہ آئی ءَ لوٹ کت کن اِت کہ اے جیڑہ ءِ سر ءَ چمشانک دیگ ءَ دیوان یا آئی ءَ چہ مستریں پتر ءِ دیم ءَ برت کن اِت بلے لاپروائی کنگی نہ اِنت ءُ نا کہ آئی ءِ ھال کسانیں پتراں دیگ لوٹ اَنت۔
4۔ اگاں پاٹی ءِ یک باسکے سرپد بوت کہ دومی پاٹی ءِ باسکے ردی کنگ ءَ اِنت یا ھنچیں کارے کنگ ءَ اِنت کہ پاٹی ءِ مپادانی بگیری یے گڑا اشی ءِ رپورٹ پاٹی گلاں دیگ لوٹ اِیت۔
5۔ پاٹی باسکاں ھنچیں کار دیم ءَ برگ لوٹ اَنت کہ آ راستی ءِ سر ءَ بہ بنت، دگا پراڈیانی بگیری دارگی انت، ھر وڈیں دگائی ءُ وتگڑیں کار ایر جنگ لوٹ اَنت ھما کہ وتسریں باوست، گپ ءُ رپ کن اَنت یا دومیانی رازانی پچ گرگ ءِ جھد ءَ بنت، دروگیں ھال شنگ کن اَنت پاٹی ءِ برزی تک ءِ کمیٹی ءَ وھد وھد ءِ سر ءَ سرپدی دیگ لوٹ اِیت، باسکانی سر ءَ بندش جنگ بہ بیت کہ گچینی جیڑھانی سر ءَ ھچ باوست مہ کن اَنت۔
6۔ ھر یک پاٹی کمیٹی ءَ لوٹ اِیت کہ وھد وھد ءِ سر ءَ ھما سنگتاں بیار اِیت کہ بے نپیں گپ ءُ بے رھبندیں جنجالانی تہ ءَ اَنت آیانی گوم ءَ گپ بہ جن اَنت آیاں بہ گیشن اَنت آ سرپد کنگ بہ بنت ءُ آیانی تہ ءَ نظم ءُ ضبط پیداک کنگ بہ بیت۔
7۔ ھر یک پاٹی کمیٹی ءَ لوٹ اِیت کہ پاٹی باسکانی گپاں گوش بہ دار اِیت، آیاں وھد وھد ءِ سر ءَ دیوان کنگی اِنت، جیڑیانی سر ءَ باوست کنگی اِنت ءُ آیانی کار چارگ بہ بنت ءُ پاٹی باسکاں وتی رایہ زاھر کنگ ءِ موہ دیگ بہ بیت۔
بے رھبندیں جیڑہ ءُ جنجالانی سر ءَ بندش جنگ بہ بیت ءُ آیانی سر ءَ ھچ وڑیں پیسلہ دیگ مہ بیت پرچا کہ اے وڑینانی پیسلہ بوت نہ کنت کہ کے رد ءُ کے راست اِنت۔
وھدیکہ ما سنگتانی بے رھبندیں جیڑھانی گیش ءُ گیواری ءَ نند اِیں گڑا مارا ھما دمان ءَ گیشّینگی نہ اِنت بلکیں آیانی کار ٹپاسگی ءُ ھمود ءَ رزلٹ کشگ لوٹ اِیت ءُ دیمتر ءَ کہ ھما راہ ءَ کہ آیاں روگی اِنت گڑا رھبندانی رد ءَ شوکیں کارے پروگرام دیگ لوٹ اَنت، آیانی کارانی رزلٹ کشگ ءَ پد بازیں سنگتے ءِ ردیں گپانی سر ءَ نگد کنگ بیت کت کنت، گڑا چہ آیاں جست کنگ لوٹ اِیت کہ انگت آیانی لیکہ جتا اَنت؟ اگاں آیاں انگت بگیرداری بیت گڑا اے رھبندی جنگے۔
ھمے وڑ ءَ یک بے رھبندیں جیڑھے رھبندی جیڑھے جوڑ بیت اگاں آیاں رھبندانی سر ءَ ھچ جیڑہ نیست گڑا باوست ءَ پد ھرچ وڑیں رزلٹے در کیت ءُ پد ءَ ھما کار ءِ پروگرام کہ ھما کارانی سر ءَ آئی جوانی ءَ کار کنگی اِنت ءُ پد ءَ درستیں بے رھبندی جیڑہ ھلاس کنگ لوٹ اَنت گوستگیں کار ٹپاسگ ءُ آیانی رزلٹ کشگ بہ بیت۔
بے رھبندیں جیڑھانی گیش ءُ گیواری ءِ مارا جج بوگی نہ اِنت پرچا کہ آئی ءِ سر ءَ نا کہ پیسلہ دیگ بیت ءُ نا کہ گیشینگ بیت اگاں پیسلہ شر مہ بیت گڑا جنگ کنوکیں ھردوٹولی مطمئین نہ بنت ءُ جنگ برجاہ بیت اے وڑیں جیڑہ مسال ء ھبر ءَ پلاں سنگت دومی سنگت ءِ سر ءَ اوست نہ دار اِیت یا شکی نگاھاں چار اِیت اے باوست ءِ تہ ءَ آرگی نہ اِنت پرچاکہ اے وڑیں جیڑھانی ھچ رزلٹ در نئیت اے وڑیں جیڑہ ھنچوش گیش اَنت ءُ سنگت بس کار ءِ میان ءَ ءُ وتی جھد ءُ کرتن ءِ میان ءَ وت ءَ تچک بہ کن اَنت آئی ءِ سر ءَ وت شک دور کیت۔
اگاں بازیں سنگتے وتی رھبندی جھد ءِ تہ ءَ لھتے بے رھبندیں چیز بیار اَنت گڑا رھبندی جیڑھانی سر ءَ زور دیگ بہ بیت کہ بے رھبندیں جیڑہ دلگوش دیگ مہ بنت اگاں ناں رھبندیں جیڑہ ھمایانی پشت ءَ گار بنت اگاں یک سنگتے رھبندی جھد ءَ بے رھبندی چلائین اِیت گڑا آ گوشگ بہ بیت کہ رھبندانی رد ءَ باز جاہ ءَ آ شر اِنت مارا آئی ءِ رھبنداں بس اے واستا انکاری مہ بہ ایں کہ آ کارمرز اِش کنگ ءَ اَنت بلکیں مارا شریں وڑے ءَ آ گوشگ لوٹ اِیت کہ تئی پوزیشن ءُ وڑ ءُ پیم رد اَنت ھمے وڑ یک رھبندے جھد کنوکے بے رھبندی کنگ ءَ دارگ لوٹ ایت۔
بنکی ءَ پاٹی ءِ تھی جھد ءَ بچار ئے گڑا آ سرجمی ءَ لیکہ ءُ رھبندانی سر ءَ بگیرداری ءِ جنگ اِنت پاٹی ءِ تہ ءَ ھر چیز گوں دلیل ءَ بندوک بہ بیت ھر چیز ءِ سر ءَ باوست کنگ ءُ گیشینگ بہ بیت ھر یک چیزے ءِ سوبے بہ بیت اگاں ناں کار نہ بیت ما ھر کار ءَ بے وھد گوازینگ ءَ کت کن ایں بلے ھنچوش کہ مئے گور ءَ سرجمی ءَ دلیل بہ بیت پاٹی ءِ تہ ءَ مارا دلیلانی منّگ ءِ آدت وتی تہ ءَ آرگی اِنت آئی ءِ پجار کنگ ءَ کہ اے دلیل بلکل راست اِنت بزاں پاٹی ءُ پرولتاری جھد ءِ مپاد باندات ءِ مپادانی پابند بوگ ءُ درستیں مپاداں دراجیں وھدے ءِ مپادانی پابند بوگ درستیں چمشانک سھی اِنت ءُ پاٹی ءِ مپادانی تہ ءَ کاینت پرولتاری جھد ءُ سرجمیں پاٹی ءِ مپادانی سر ءَ مہ بنت گڑا اے دلیل بوچے ءِ ھساب ءَ اِنت ھر وڑیں جھد کہ دلیل ءَ مہ منّ اِیت ءُ آئی ءِ واست ءَ ھچ دلیل نیست گڑا آ بے رھبندیں جھد اِنت ھر وڑیں چیزے ءَ کہ دلیل مہ بیت یا آئی ءِ دلیل دیگ مہ بیت گڑا رد کنگ لوٹ اِیت اے وڑ ءَ نا کہ آئی ءِ گیشینگ ءِ راھے در کیت ءُ نا کہ گیشینگ بیت اگاں ما باوست ءَ پد ھم یکجاھے ءَ سر مہ بہ اِیں گڑا اے چیز تچک بیت کہ پاٹی ءُ پرولتاری جھد ءِ بگیری ءَ کے کنگ ءَ اِنت اے جاوراں ھما سنگتانی سر ءَ گلی گامگیج چست کنگ ارزان بیت ھما کہ وتی ردیانی سر ءَ اوشتاتگ اَنت
گوں دلیل ءُ باوست ءَ چیزانی گیش ءُ گیوای ءِ ھاتر ءَ اے الّمی اِنت کہ پاٹی ءِ تہ ءَ جمھوریت بہ بیت ءُ جیڑہ نرمی ءُ بید ء جاک ءُ سلوات ءَ گیشینگ بہ بنت مئے واست ءَ اے ھژدری اِنت کہ ما وتی کم زانتی ءَ مجگ ءِ تہ ءَ بہ دار ایں ءُ بوان ایں سنگتانی لیکہ ءَ مدامی برز بہ دار ایں جاوراں وتی دیم ءَ ایر بہ کن اِت ءُ وئیلانی شریں وڑے ءَ پٹ ءُ پول ءَ بہ کن اِت ۔جیڑہ گوں سنگینی ءَ وانگی اِنت ما چیزاں گوں دلیل ءُ باوست ءَ گشینت نہ کن اِیں اگاں ما بے پرواہ، جزباتی ءُ چو مٹو ءِ وڑ ءَ گوشتگیں چیزاں دوبر بہ گش اِیں کرتن ءَ چہ دور بہ بہ اِیں، وئیلانی شریں وڑے ءَ پٹ ءُ پول ءَ مہ کن اِیں اگاں ما دلیلاں نہ منّ اِیں چیزاں پہ باوست گیشینگ نہ لوٹ اِیں گڑا زاھر اِنت ما جیڑہ ءِ گیشینگ ءِ تاکت ءَ کارمرز کن اِیں، ھنر ءُ ھیلہ کن اِیں چہ پاٹی ءَ ھما سروکی کہ مارا رس اتگ ھمائی ءَ کارمرز کن اِیں گڑا چوشی ءَ پاٹی ءِ تہ ءَ جمھوریت ءِ ھم لوٹ نہ کپ اِیت پرچاکہ تھی جمھوریت ءِ ھاتر ءَ اے ھژدری اِنت کہ ما دراہ دلیل ءُ گوں باوست ءَ چیزاں بہ گیشین اِیں ءُ چریشی ءَ ما یکجاھیں گامگیج چست کرت بہ کن اِیں۔
اد ءَ دلیل ءَ منی مول ایوک ءَ دلیل نہ اِنت بلکیں راستیں وئیل ءُ راستی اِنت کہ کرتنی ثابت بہ بیت بازیں زانتکارے بے نپیں گپانی آماچ بنت ءُ گمراھیں دلیلانی تہ ءَ پنس اَنت آ بید ء راستیں وئیلے ءِ سر ءَ گپ جنگ ءَ پہ دیم گپ جن اَنت آجھان ءِ ھر چیز ءِ سر ءَ گپ جت کن اَنت آیانی گپ بس ھشکیں بٹاک اَنت آ پاٹی ءِ گپاں کارمرز کن اَنت آیانی گپ سرجمی ءَ بے نپ، بلکیں پہ پاٹی ءُ آشوب ءَ تاوان اَنت ھمے واست ءَ اے ھژدری اِنت کہ چشیں بکواس ءُ بٹاکانی بگیری دارگی اِنت ھنچیں دلیل دیگی اِنت کہ آیانی بُن ڈنی جاور ءُ راستیانی سر ءَ اِنت ھما کہ راستیں گپاں چہ پیداک بوتگ اَنت ءُ کرتن ءِ نیمگ ءَ بر اَنت مئے لیکہ ءَ راست بوگ لوٹ اِیت ھر چیز دلیل ءَ بندوک بہ بیت بید ء ایشی ءَ دگہ راہ نیست اگاں پہ وڑ دلیل دیگ بہ بیت پد ءَ ھم کار نہ بیت ءُ ردیں دلیل چد ءُ گنتر تاوان بار اَنت ایشی ءِ تہ ءَ ھچ شک نیست کہ اے گرانیں کارے بلے بس ھمے وٹ کنگ ءَ ما بالشویک گوشگ ءِ کابل بوت کن اِیں بالشویک واجبی چیزانی دیم ءَ سر ءَ جھل کن اَنت آ راستی ءِ منوگر اَنت آ ھما مردم اَنت کہ دلیل ءَ شری ءَ پھم اَنت، ءُ دومیانی گوما ھم راستیں دلیل دے اَنت آ ناسمجیں جھد ءَ ھچ نہ زان انت۔
سنگتاں ! پاٹی ءِ تہ ءَ جھد ءِ اے لھتے وڑ ءُ پیم اَنت کہ شمئے دیم ءَ ایرکنگ اِش لوٹ آں منی گپ ھمیش اِنت کہ مئے سنگتاں پاٹی ءِ تھی جھد ءِ چلائینگ ءِ وھد ءَ پاٹی ءِ تہ ءَ بازیں ردیں دھیان، پاٹی باسک ھاسکار باسکانی پاٹی ءِ جزبگ ھمے وڑ کنگ لوٹ اَنت تا کہ مئے پاٹی ءُ پاٹی ءِ (نقطہ نظر) چد ءُ گیشتر مھکم بہ بیت ھمے مئے مول ءُ مراد انت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-