بلوچستان ءَ زورانسری آوار جنی ءِ درچ یکشل ءَ گوں تیزی ءَ برجاہ ءَ برجاہ ءَ اِنت – انّیگاں چہ شال ءَ بازیں مردمے پاکستانی پوج ءَ آوار جتگ ءُ بیگواہ کتگ –
گیشیں ھالانی رِد ءَ کیچ ءِ دمگ چہ سرکی کرکی تجابان ءَ سیادی داروکیں دھمی تبک ءِ نودربر عبداللہ ء بائیان گوستگیں شپ ءَ شال ءَ آئی ءِ کمرہ ءَ چہ آوار جتگ ءُ بیگواہ کتگ کہ چریشی ءَ پد آئی ءِ ھچ وڑیں ھال نیست-
کھول ءِ رِد ءَ عبداللہ ء دزگیری ءَ پد پوج ءَ آئی ءِ دزگیری ءِ گپ پدر نہ کتگ-
دومی نیمگ ءَ چہ شال ءِ بلوچ کالونی جینٹ دگ ءَ چار اکتوبر 2025 ءِ شپ ءَ کساس ساھت سے ءَ ارشاد احمد سمالانی، تنویر احمد سمالانی، ءُ زھیر احمد سمالانی اے سئیں برات اَنت ءُ عزیز احمد سمالانی ءِ چُک اَنت-
ھمے روچ ءَ دگہ یک براتے نزیر احمد سمالانی ء عزیز احمد سمالانی ھم چہ شاھرگ کلی مینگل آباد ءَ پاکستانی پوج ءَ شپ ءِ وھد ءَ آوار جنگ ءَ پد بیگواہ کتگ کہ انگت بیگواہ ءَ اِنت-
دومی نیمگ ءَ پاکستانی پوج ءِ دست ءَ آوار جنگ بیتگیں دو مردم یل کنگ بیتگ اَنت –
چہ کیچ ءِ بُنجاھی شھر تربت ءِ ھند گلشن آباد ءَ دو اکتوبر 2025 ءَ چیریں ادارھانی دست ءَ آوار جنگ بیتگیں ممتاز ء صالح جھمنند دشت کاشاپ گوستگیں شپ ءَ چہ کیچ ءَ یل کنگ بیتگ ھمے وڑ دشت ءِ دمگ زریں بُگ ءَ ھشت اکتوبر 2025 ءَ پاکستانی پوج ءِ دست ءَ آوار جنگ بیتگیں خداداد ء محمد عمر جھمنند مند دو روچ ءَ گوستگیں روچاں یل کنگ بیتگ-