زھری ءِ گوات ءِ وشبوئیں آشوب- دلشان بزدار

زھری ءِ گوات ءِ وشبوئیں آشوب

نبشتہ کار: دلشان بزدار

گڈی بھر

دی بلوچستان پوسٹ

نی پانزدہ سال گوستگ اَت زھری آ میتگ نہ اَت کہ برے برے دگ ءُ دمکانی سر ءَ ایمنی ءِ چراگ اِت اَنت اسکول ءِ جاگہ ءَ پوجیانی بنجل اَت ءُ ھمک سال بس مردم یاتانی میان ءَ زندگ اِت اَنت-

روچ ءِ برانز ءَ پیسر مردم درست مُچّ اِت اَنت ءُ آیاں دگ ءِ سر ءَ چراگ روک کتگ اَت ءُ درست ھمے گپ ءَ کنگ ءَ اِت اَنت کہ ماسی نوری ءَ زمانگے نبشتہ کتگ یات کنگ ساھتے ءُ گلامی شموشگ لوٹ اِیت-

اسکول ءِ دیم ءَ انگت ءَ ماسی نوری ءِ کوھنیں اکس ٹنگوگ اَت کہ ماسی نوری کندگ ءَ اَت –

نوکیں نسل ءِ استاد ماجد نی پیر اَت ءُ آئی ءِ چماں ھما رژن اَت کہ ماسی نوری ءِ چمانی توک ءَ اَت آئی ءِ شاگرد گراناز، مھتاب، وسیم نوکیں نسل ءِ رھشونی ءَ کنگ ءَ اِت اَنت-آ بس کتاب درس دیگ ءَ اِت اَنت ءُ یک روچے ءَ گراناز ءَ وتی استاد ءَ جست کت کہ مردم گوش اَنت ماسی نوری مُرتگ؟ ماجد ءَ بچکندے جت ءُ گوشت اناں آ زندگ اِنت وھدیکہ تو زمین ءِ واستا جد ءُ جھد کن ئے، زیردستانی واستا توار چِست کن ئے آ تئی اندر ءَ یکشل ءَ گپ کنت ءُ یات مرت نہ کن اَنت ءُ ھمک موسم ءِ وشبو ءَ واتر بنت –

نی زھری ءِ وشبوئیں آشوب ھمک کنڈ ءُ دراں تالان اَت ءُ نودربر، مزدور ءُ دھکان درست ماسی نوری ءِ زرمبشت ءِ اوگام ءَ جنگ ءَ اِت اَنت ءُ یاتداریں زانشت، ماسی نوری ءِ رژن ءُ زمین ءُ مازگ-

مردماں درّائینت ماسی نوری ءَ ایوک ءَ زھری مَٹ نہ کتگ اَت بلکیں آئی ءَ زھری ءِ مردمانی سنچ ءُ زانت ھم مٹینتگ- یک روچے ءَ نوکیں نسل ءِ استاد ماجد زھری ءِ کوھانی دامن ءَ نندوک اَت گوات کوھانی شَماں لگان اَت ءُ آئی ءِ دست ءَ ھما کاپی اَت کہ ماسی نوری ءَ ھروھد ءَ گون بیتگ آئی ءِ گڈی تاک ءَ نبشتگ اَت وھدیکہ گوات ءِ وشبو کیت اِنت گڑا کوھانی دامن ءَ بہ نند ءُ آیانی سرکپگ ءَ بہ جیڑ ءُ ھمے دمان ءَ ماجد ءِ چم بند بوت اَنت ءُ ھنچش سما بوت ئِے زمین مئیگ انت ءُ مئیگ انت-

ھَے زھری تئی آشوبیں چَمانی ھَے زھری تئی تپلیں بچانی کہ ھون اِت ماں لدیگانی دستاں تلان اِنت ءُ پیداک اِنت ھمک روچ ءِ ٹک گوں یک دردناکیں کسھے ءَ بندوک اِنت ءُ ھمک ساھت پہ زھری ءَ گرانیں ساھتے ءَ توار کنت ءُ لدیگانی چماں ھمک ورنا آیانی چماں یک آسے ءِ برانز اَنت ءُ ھمے ھاتر ءَ آیانی دست نہ لرز اَنت پہ ورنایانی سینگ ءَ سھر سریں تیرانی پیوستگ ءَ –

ھَے زھری تئی مھلبیں دمکانی ءُ شھر ءِ میتابیں چار راھانی سر ءَ درامدانی سرمب دابیں بڈانی لگتمالی ءِ آماچی ءَ اَنت ءُ کسہ ھما اَنت بس آ وھد ءَ ماسی نوری ءَ درس داتگ ءُ نی تپلانی چُنڈ چنڈیں لاش مئے چمانی دیم ءَ ایر اَنت ءُ بس تھنا بژن ءُ درد مارگ ءَ اَنت بلے اندر ءَ بے وابیں تپے ءِ تورشت اِنت ءُ مارا واک بوگ ءَ نہ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-