سوراب : سلاہ بندیں مردمانی ناکہ بندی، پولیس کارمند بیران، چوکی سر ءَ دستیگ، سلاہ دستیگ

بلوچستان ءِ دمگ سوراب مل شاھورائی ءِ ھند سر ءَ شال کراچی بُنجاھی شھدگ سر ءَ سلاہ بندیں مردماں کساس یک کلاکے ءَ تاں ناکہ بندی ءُ پٹ ءُ پول کتگ ، چریشی ءِ میان ءَ یک بی سی کارندھے بیران بیتگ-

اِھوالکار ءِ رد ءَ سلاہ بندیں مردماں لیویز ءِ یک چوکی یے وتی دستیگ کتگ ءُ شال ءَ چہ آؤکیں پولیس کارندھانی سلاہ ھم دستیگ کتگ اَنت-

اے میان ءَ تیرگواری ءِ میان ءَ ھوالدار محمد جان ء محمد یوسف بیران بیتگ – چل ھپت سالی ئیں کارندہ ھُزدار ءِ جھمنند بیتگ-

اِھوالکار ءَ ٹی بی پی ءَ گوں گوشتگ کہ سلاہ بندیں مردماں بی سی کارندھانی سلاہ ءَ زیرگ ءَ بیتگ اَنت کارندہ آیانی سر ءَ تیرگواری کتگ ءُ پسھی تیرگواری ءَ کارندہ بیران بیتگ-

واکدار ءِ رِد ءَ وئیل اے وھد ءَ بیتگ وھدے کانسٹیبلری ءِ کارندہ ڈیوٹی ءَ سرجم کتگ کلات ءَ چہ ھُزدار ءَ واتر روگ ءَ بیتگ – تیرگواری ءَ پد اُرشکار جاہ پہ جاھی تتکگ اَنت-

زانگ بہ بیت اے وئیل ھمے وھد ءَ بیتگ کہ گوستگیں روچاں سروزیر بلوچستان سرفراز بگٹی کانیشنل یوتھ سمٹ ءَ چہ تران کنان ءَ ٹاہ داتگ کہ من وتی کول سرجم کتگ، بلوچستان ءَ ریاست ءِ رٹ بھال کتگ-

سرفرار بگٹی ءِ بلوچستان ءَ ریاستی رٹ ءِ ٹاہ ءِ سر ءَ درشان دیان ءَ ساجد ترین ایڈووکیٹ ءَ گوشتگ کہ سروزیر وت مستونگ ءَ چہ ھُزدار ءَ دگ ءِ سر ءَ سپر کت نہ کنت-

ھمے سال ءَ بلوچستان اسمبلی ءَ چہ تران کنان ءَ اسمبلی باسک ظفر اللہ زھری ءَ گوشتگ بلوچستان ءِ شھدگ مُھر نہ اَنت، وتی تران ءَ آئی ءَ گوشتگ کہ بلوچستان ءِ شھدگ سر ءَ نو بلوچ سلاہ بندیں گلانی رٹ برجم اِنت-

بلے اے بیتگیں وئیل زمہ واری ھچ گل ءَ نہ زرتگ-