ڈاکٹر ماہ رنگ بلوچ بید آمیدگسی ءِ کار ءِ بندیگ کنگ انساپ ءِ لگتمالی اِنت- ڈاکٹر صبیحہ بلوچ

بلوچ یکجھتی کمیٹی ءِ بُنجاھی رھشون ڈاکٹر صبیحہ بلوچ ءَ وتی درشان ءِ تہ ءَ گوشتگ کہ ڈاکٹر ماہ رنگ بلوچ ءُ دگہ بلوچ یکجھتی کمیٹی ءِ باسکاں درکانودی بندیگ کنگ ءَ یک پدریں سیاسی بیرگیری اِنت –

رھشون ءَ گوشتگ کہ شش ماہ ءَ چہ گیش اِنت ڈاکٹر ماہ رنگ بلوچ ءُ آئی ءِ ھمراہ بید آمیدگسی مات ءُ انساپ ءِ گوشدارگ ءِ ھک ءَ بندیگجاہ ءَ داشتگ-

آئی ءَ گوشتگ کہ آئی ءِ جرم تھنا اش اِنت کہ آ بلوچستان ءَ زورانسری آوار جنی ءُ ریاستی زوراکی ءِ ھلاپ ءَ پُرایمنیں توار چست کنگ ءَ اِنت-

درشان ءِ تہ ءَ گوشگ بیتگ کہ وتی مستری ءِ دزگیری ناں تھنا انسانی انساپ ءِ بُنیادی راھبندانی ھلاپ ورزی اِنت بلکیں اکوام متھدہ ءِ انسانی ھکانی جار ءُ میان استمانی مھاد ءِ شھری ءُ سیاسی ھکانی ھم لگتمالی اِنت کہ اشی ءِ سر ءَ پاکستان دستھت کنوکیں ڈیھ اِنت-

رھشون ءَ اے گپ ءِ سر ءَ سک دلپدردی درشان اِتگ کہ بندیگجاہ ءِ تہ ءَ آمیدگسی کاروائی کنگ ءِ کار ءَ پلگار، بے رھبندی ءُ شرپ ءَ چہ زبھر کنت ءُ اشی ءَ چہ پدر بیت کہ آمیدگسی نزام ءِ زور ءُ تُرس ءَ چہ کارمرز کنگ ءَ اِنت-

درشان ءِ تہ ءَ گوشگ بیتگ کہ ڈاکٹر ماہ بلوچ ءُ آئی ءِ ھمراہ اے راج ءِ ھما مھکمیں توار ءِ نمائندگی ءَ کنت کہ راستی ءُ چُست ءُ پُرس ءِ لوٹ ءَ کنگ ءَ اِنت ، آیانی یکشلیں بندیگ کانودی ناانساپی ءِ ھمراھی ءَ ریاستی اکلاک ءِ بے سوبی ءَ ھم پیشدارگ ءَ اِنت-

گُڈی ءَ بلوچ یکجھتی کمیٹی ءِ بُنجاھی رھشون ڈاکٹر صبیحہ بلوچ میان استمانی ادارھاں چہ دزبندی کتگ کہ آ بلوچستان ءَ پُرایمنیں سیاسی باسکانی ھلاپ ءَ برجاہ اے ریاستی زوراکی ءِ سر ءَ توار چست بہ کن اَنت ءُ ڈاکٹر ماہ رنگ بلوچ ءَ ھوار سرجمیں دزگیریں بلوچ باسکاں زوت یل کنگ ءِ دلجمی ءَ بدے اَنت-