زھری ءِ گوات ءِ وشبویں آشوب
نبشتہ کار: دلشان بزدار
چارُمی بھر
دی بلوچستان پوسٹ
شپ ءِ سیمی پاس اَت زھری ءِ سرگواتیں آشوبی آزمان جمبراں مانپوش کتگ اَت، گوات ءِ وشبو ھاک ءِ دنزانی ھواری ءَ تالان اَت اسکول ءِ دیم ءَ چراگ روک اَت بلے آئی ءِ نزیک ءَ نشتگیں مردمانی چماں انگت ءَ رژن ھست اَت ماسی نوری بے تواری ءَ نشتگ اَت ءُ کاپی ءِ تاکاں لیٹینان اَت کہ آئی ءِ سر ءَ نبشتگ اَت “ یات کنوک ھچ پروشی ءَ نہ من اَنت تُوری آیانی ساہ در بئیت۔
لھتے اداراں پیش ھال اتکگ اَت کہ سردار میرو ءَ پوج لوٹائینتگ ءُ باندا سھب ءَ زھری ءِ مردماں لڈ ءُ بار ءَ لاچار کنت ءُ یاگی ءِ بھتام ءَ درستاں آوار جنت ءُ بیگواہ کنت۔
مھلوک ءِ دل ءُ لاپاں ترسے ھست بلے نزوری نیست اَت پرچا کہ ماسی نوری ءِ گپ ءُ گشتانکاں مھلوک تمرد ءُ تیار کتگ اِت اَنت۔
شپ ءِ دیوان ءَ گراناز ءَ گوشت مارا جنگ کنگی اِنت آ توپک کار اَنت ما لٹاں زیریں۔ ماسی نوری ءَ سر چنڈینت ءُ گوشت ناں زھگ ما جنگ کن ایں بلے توپک ءَ گوں اناں گوں راستی ءَ جنگ کن ایں آ مئے ساہ ءُ جاناں کُشت کن اَنت بلے مئے نمیرانیں یاتاں کشت نہ کن اَنت۔
زھری ءِ پیرزال نشتگ ءُ دست اِش زمین ءَ سک داتگ ءُ ھاک ءَ وتی پیشانیگ ءَ جنگ ءَ اِت اَنت ءُ آیانی واستا اے یک سوگندے اَت آ نی وتی نمیرانیں یاتاں پھریز اَنت۔
ھمے دمان ءَ اسکول ءِ دروازگ کسے ءَ گوں لگتاں پچ کت ءُ سردار میرو گوں سپاھیگاں رس اِت ءُ آئی ءِ کوپگ ءَ ھونواریں توپک اَت ءُ گرور اَت آئی ءَ گوشت ھمیش اِنت شمئے یاگی ءِ اسکول ایش اِنت پیر ءُ کماشیں امداد شمئے دل ءُ لاپاں یاگی بوگ ءِ سکین ءَ دنت۔
ھمے دمان ءَ ماسی نوری پاد اتک ءُ اوشتات گوشگ ءَ لگ اِت ما شیتان نہ ایں ما آدینک ایں ما بس ترا تئی چھرگ ءَ پیشدارگ ءَ ایں تو زُلماں گوں داگدارے ئے، سردار میرو زھر گپت ءُ آئی ءَ توپک چِست کت ءُ گوشت نی شمئے آدینک نہ بچ اِیت ءُ ھاکاں ھوار بیت اِنت۔
توپک ءَ توار کت تیر ءِ توار ءَ مھلوک ءَ واہ ءُ زار بندات کت چراگ جھل ءَ کپت ماسی نوری زمین ءِ سر ءَ ھاکاں گوں بوسگ ءَ اَت آئی ءِ لنٹانی سر ءَ شوک ءُ ڈولڈاریں بچکندے ءِ ندارگ اِت اَنت ءُ ماسی نوری ءَ گڈی ءَ گشت ھاک آں ءُ ھاک ءَ ھوار باں، بلے چرے ھاک ءَ رژن چِست بیت اِنت۔
سھب ءَ سرجمیں مھلوک سرپد بیت ءُ ھرکس ءَ وتی لوگانی دروازگ ءَ سھریں پچے بستگ اَت ءُ یاتانی بگچھیں درد ءُ یات ھمے پچ ءَ گرنچ اِت اَنت۔ ءُ اسکول ءِ دروازگ بند اَت ءُ آئی ءِ دیوالانی سر ءَ ماسی نوری ءِ گڈی لبز نبشتگ اَت من یاتاں ءُ یات ھچبر نہ مر اِیت۔
یک ھنچیں پِکرے اَت ھاک ءِ پیم ءَ نرم اَت بلے چو البرزیں تلار ءَ مھکم اَت وھدیکہ گوات ءَ کشگ بندات کت گڑا درچکانی تاکاں گپ کنگ بندات کت من ماسی نوری آں دانکہ کسے وتی ھک ءَ یات کنت آ ھروھد ءَ زندگ بیت اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-