اوگان ءِ میڈیا ءِ گوشگ ءِ رد ءَ اوگان ھکومت ءَ پاکستان ءِ وزیر دفاع خواجہ مھمد آصف، انٹرسروسز انٹیلیجنس (آئی ایس آئی) ءِ کارمستر لیفٹیننٹ جنرل آسم ملک ءُ دگہ دو پاکستانی جرنل ماں اوگانستان ءَ آیگ ءِ واستا ویزا ءِ لوٹ رد کتگ ۔
اوگانیانی گوشگ ءِ رد ءَ، گوستگیں سے روچانی تہ ءَ اسلام آباد ءِ نیمگ ءَ سے جتا جتائیں لوٹ راہ دیگ بیتگ آ کابل ءَ رد کتگ اَنت ۔
اوگان ءِ ڈنی وزیر ءَ یا تالبان ءِ ھکومت ءَ اے باوست ءِ سر ءَ گیشیں بیان شنگ نہ کتگ ۔
ھمے ماہ ءَ پاکستان ءُ اوگانستان ءِ سیادی ءَ ناوشی ءِ توک ءَ گیشی کندگ ءَ اتکگ ۔ اسلام آباد ءَ باز براں بھتام جتگ کہ تھریک تالبان پاکستان (ٹی ٹی پی) اوگان سرزمین ءَ پاکستان ءِ ھلاپ ءَ کارانی واستا کارمرز کنگ ءَ اِنت ۔ تالبان ءِ ھکومت اے بھتاماں یکشل ءَ رد کنگ ءُ آیگ اِنت ءُ سوبینی وتی دست ءِ کتگ ءُ آ ھچ کس ءَ اے اجازت ءَ نہ دنت کہ وتی زمین ءِ سر ءَ دگر ءِ ھلاپ ءَ کارمرز ئِے بہ کنت۔
ھمے انیگاں پاکستان ءِ نیمگ ءَ چہ اوگانستان ءِ بنجاھی شھر کابل ءَ ھوار دگہ دگہ ھنداں برزی اُرشانی ھال دیم ءَ اتکگ ۔ اے اُرشاں رند اوگان ءِ پوج ءَ سیمسری ھنداں پاکستانی پوج ءِ سر ءَ پسھی ارش کتگ ، چریشی ءِ سوب ءَ پاکستانی لشکر ءَ جانی تاوانانی ھال ھم راست کتگ انت۔
انگت چریشی ءَ چہ رند اوگان ءِ پوج ءَ جنگ بندی ءِ جار جتگ ۔بھارت ءَ ھستیں وھد ءَ اوگان ھکومت ءِ ڈنی وزیر ءِ منّ اِتگیں جنگ بندی ءِ پیسلہ سئودی ارب، گتر ءُ متھدہ ارب امارات ءِ لوٹ ءِ پد ءَ کتگ ۔
خواجہ آصف، ھما اِنت کہ گوست ءَ ھم اوگان ءِ رھشونانی ملاکات ئِے کتگ ، تالبان ھکومت ءَ گچینی نمایندگانی ھمراھی ءَ سکیورٹی سر ءَ گپ ءُ رپ ءِ واستا کابل ءَ روگ ئِے لوٹ اِتگ ئِے ۔ انگت اوگان ھکومت ءِ نیمگ ءَ چہ بار بار انکار دوئیں ملکانی درمیان ءَ ھستیں سپارتی ناوشی گیشتر زاھر کتگ ۔
سیاسی مھلوک ءِ رد ءَ کابل ءِ نیمگ ءَ چہ پاکستان ءِ گچینی باسکانی ویزا ءِ لوٹاں رد کنگ درورداریں گامے، ھمے اے گپ ءِ پدراھی ءَ کنت کہ تالبان ھکومت نوں اسلام آباد ءِ زور پر کنگ ءَ دیم ءِ جُکگ تیار نہ اِنت ۔