بلوچ یکجھتی کمیٹی ءِ سروک ڈاکٹر ماھرنگ بلوچ ءُ ایندگہ رھشونانی بگیری ءِ ارزی ءِ نوکیں پیشی انسداد دھشتگری امیدگس ءِ بدل ءَ شال ءِ ڈسٹرکٹ جیل ءَ برجم کنگ بوتگ ۔ اے گپ یکشمبے ءَ دیم ءَ اتکگ کہ گل ءَ اے ”ادارتی زوراکی ءِ درور “ گوشتگ ۔
بلوچ یکجھتی کمیٹی ءَ چاگردی ترامجاہ ایکس ءَ وتی شنگ کرتگیں درشان ءِ تہ ءَ گوشتگ کہ بندیگ کنگ بوتگیں رھشونانی آمیدگسی ریمانڈ ءَ دگہ دھ روچ پِر کنگ بوتگ ۔ ڈاکٹر ماھرنگ بلوچ ءَ ھوار ایندگہ رھشون سبگت اللہ بلوچ ، بیبو بلوچ ، بیبرگ بلوچ ءُ گل زادی بلوچ مارچ ءِ ماہ ءَ ایم پی او ءِ رد ءَ دزگیر کنگ بوتگ انت ءُ تنی وھدی بندیگ انت، باز براں آیانی ریمانڈ گیش کنگ بوتگ انت ۔
شمبے ءِ روچ ءَ ڈاکٹر ماھرنگ بلوچ ءِ وکیل اسرار بلوچ ءَ گوشتگ کہ ارزی انسداد دھشتگردی ءِ امیدگس نمبر 1 ءِ جج محمد علی مبین کیس گوشداشتگ ۔
آئی ءِ گوشگ ات کہ بی وائی سی رھشون ATC 1 پیش بوگ ءِ بدل ءَ بی وائی سی ءِ کانودی ٹولی شال ءِ ڈسٹرکٹ جیل ءَ لوٹارینتگ انت کہ ھمودا پیشی بوتگ ۔
اسرار بلوچ ءَ گوشتگ کہ پیشی ءَ پراسیکیوٹر چالان ءِ جمع کنگ ءَ بےسوب بوتگ چریشی ءَ ناکہ بھتام جنگ بوتگ انت ءُ ناکہ شریں وڈی ءَ آساپ (ٹرائل) بندات بوتگ ۔
پیشی 18 اکتوبرءَ داں دارگ بوتگ ءُ جج مبین ءَ دیمیگ ھمے رمس ءَ تاں چالان جمع کنگ ءَ گوشتگ ۔
اشی ءَ پیسر بی وائی سی ءَ وتی ایکس ءِ درشان ءِ تہءَ گوشتگ کہ جیلءِ تہ ءَ پیشی کنگ بزاں راستی ءَ چیر ترینگ ، مھلوک ءِ دیم ءَ بوگ ءَ ھلاس کنگ ءُ بلوچستان ایمنیں سیاسی بگیرداراں جرمے نامو دیگ انت ۔
درشان ءِ تہ ءَ گوشگ بوتگ پیشی ھمے واست ءَ جیل ءِ دیوالانی پشت ءَ کنگ بوتگ کہ سانمندیں کھول ، اھوالکار اے کرتن ءَ چمشانک دات مہ کن انت ءُ پاکستان وتی رھبند ءُ میان استمانی منصفانہ ٹرائل ءُ کانودی وڈ ڈول ءِ رھبندانی بگیری دارگ ءَ انت ۔