امریکہ ءِ سروک ڈونلڈ ٹرمپ ءَ اسرائیل ءِ ھاتر ءَ ایئر فورس ون ءِ سر ءَ سوار بوھگ ءَ پیسر رسانکدر ءَ گوں گپ ءُ تران کتگ ءُ گشتگ من پہ انسانیت ءِ ھاتر ءَ جنگانی ھلاس کنگ ءَ بلداں-
ٹرمپ ءَ گشتگ کہ ’غزہ ءِ جنگ ھلاس بوتگ‘ ءُ جنگ بندی برجاہ مان ایت۔
آئی ءَ گیش کرتگ: ‘من جنگانی ھلاس کنگ ءَ بلداں ءُ من ایمنی ءِ آروکیں مردمے آں’۔
ٹرمپ ءَ گشتگ کہ آئی ءِ گوں اسرائیل ءِ مزن وزیر نیتن یاھو ءَ ’’باز جوانیں سیادی‘‘ ھست انت کہ آئی ءَ آئی ءَ را “جنگ ءِ وھد ءِ مزن وزیر‘‘ گشتگ۔ ٹرمپ ءَ گشتگ ‘آئی ءَ مزنیں کارے کتگ۔ منی گوں آئی ءَ لھتیں جیڑہ بوتگ اَنت بلے زوت گیش ءُ گیوار بوتگ اَنت۔”
آئی ءَ قطر ءِ بابت ءَ گوشت کہ ’قطر ءَ را نوں لھتیں کریڈٹ رسگی اِنت‘۔ یات بہ بیت کہ 2017 ءَ آئی ءَ قطر ءِ سر ءَ ناشرکاری ءِ گوں سیادی ءِ بھتام جتگ۔ نوں آئی ءَ گْوشتگ: ‘قطر ءَ مئے کمک کتگ آ باز گچین انت۔’
ٹرمپ ءَ کہ باز رند ءَ نوبیل ایمنی داد ءِ ھاتر ءَ دلگوشی ءِ درشانی کتگ آئی ءَ غزہ ءِ جیڑہ ءَ را وتی “ھشتمی جنگ کہ من گیش ءُ گیوار کتگ” لیک اِتگ آئی ءَ گْوشتگ: “من اے کار پہ نوبیل ءَ نہ کتگ، من اے کار پہ مردمانی جان ءِ رکّینگ ءَ کتگ۔”
آئی ءَ اے ھم گْوشتگ کہ آ پاکستان ءُ اوگانستان ءِ میان ءَ جیڑہ ءِ بابت ءَ سرپد اِنت بلے “من پد ءَ ھمے گپ ءِ سر ءَ کایاں گپ جناں”-