بلوچستان ءِ جتاجتائیں دمگاں پاکستانی پوج ءِ دست ءَ پنچ مردم بیگواہ

بلوچستان ءِ جتاجتائیں دمگ کیچ ءُ شال ءَ پاکستانی پوج ءِ دست ءَ پنچ مردم آوار جنگ ءُ بیگواہ کتگ اَنت-

گیشیں ھالانی رِد ءَ کیچ ءِ دمگ گوگدان ءَ پاکستانی پوج ءِ مزنیں کچے ءَ یک لوگے ءِ سر ءَ بیڑبرتگ سے ورنا آوار جتگ ءُ بیگواہ کتگ اَنت-

اِھوالکار ءِ رِد ءَ بیڑ محمد عمر دشتی ءِ لوگ ءِ سر ءَ برتگ ، اود ءَ آئی ءِ نماسگ یحیٰی ء وحید احمد ءُ یک مھمانے شیر جان ء محمد انور پوج ءَ آوار جتگ اَنت – ھمے وڑ دگ سر ءَ ناکہ بندی ءِ وھد ءَ نزیکیں لوگ ءَ چہ واتر آؤکیں بلال عزیز ء حاجی عبدالعزیز ھم آوار جتگ-

دمگی اِھوالکار ءِ گوشگ اِنت کہ دزگیریں ورنایانی کھولاں تنی وھدے ھچ وڑیں سرپدی نداتگ-

ھمے وڑ شال ءِ ھند پاک تُرک اسکول اسپینی دگ ءَ شش اکتوبر 2025 ءَ پولیس ءُ چیریں ادارھانی کارندھاں دو ورنا عبدالکریم ء عبدالسلام ءُ اسحاق شاہ ء ابراھیم شاہ جھمنند کلی محمد حسنی بروری شال آوار جتگ ءُ بیگواہ کتگ اَنت-

زانگ بہ بیت بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت ھمکروچ زورانسری آوار جنی ءِ کیس دیم ءَ آیگ ءَ اَنت-