اوگانستان ءُ پاکستانی میان ءَ سیمسراں جنگ ءُ چوپ

گوستگیں شپ ءَ اوگانستان ءُ پاکستان ءِ سیمسراں دویں لشکرانی میان ءَ جنگ ءُ چوپ بیتگ چریشی ءَ اوگان وزیر دفاع ءَ پاکستانی پوج ءِ پوزیشنزانی سر ءَ اُرش ءُ پاکستانی پوی ءَ ترندیں پسو دیگ ءِ ٹاہ داتگ ءُ سیمسراں داں دیراں ترندیں جنگ ءُ چوپ برجاہ بیتگ انت-

پاکستان ءُ اوگانستان ءَ طالبان ءِ لشکر ءَ سیمسر ءِ بازیں جاھاں تیر گواری کتگ۔

طالبان ءِ وزارت دفاع ءِ گشگ انت کہ اوگانستان ءِ سرزمین ءِ سر ءَ پاکستانی لشکر ءِ گوستگیں کارروائیانی پسو ءَ پاکستانی لشکر ءِ سر ءَ سیمسراں دگہ نیمگ ءَ مزنیں کچے ءَ پسھی اُرش کنگ بوتگ انت۔

پاکستان ءِ پوج ءِ بنشون ءَ اے آپریشن ءِ ھال کتگ ءُ ٹاہ داتگ کہ آھاں اوگان اُرشانی زوراکی ءَ پسو داتگ ءُ بازیں چیک پوسٹ تباہ کتگ انت۔

اوگانستان ءِ وزارت دفاع ءَ آدینگ ءِ روچ ءَ پاکستانی پوج ءِ نیمگ ءَ برزی سیمسرانی پروشگ ءُ کابل ءَ دو جاھاں اُرشانی بھتام جتگ-

طالبان ءِ دفاع ءِ وزارت ءَ گشتگ اگاں اے کارانی پد ءَ جاور گیش ناگیگ بوت انت گڑا ایشی ءِ آسر ءِ زمہ وار پاکستانی فوج بیت۔

طالبان ءِ وزارت دفاع ءَ کابل ءَ بی بی سی ءَ گوں تران کنان ءَ گشتگ کہ شمبے ءِ شپ ءَ اوگانستان ءِ رودرآتکی استان کنڑ، رودراتکی گوریچانی استان خوست، پکتیا، پکتیکا ءُ زرباری ھلمند ءِ ڈیورنڈ لائن ءِ سر ءَ پاکستانی پوجی پوسٹانی سر ءَ ھمگرنچیں اُرش کنگ بوتگ انت۔

چم دیستگیں مردماں ھال سر کنوکیں ادارہ بی بی سی ءَ گوں تران کنان ءَ گْوشتگ کہ شپ ءِ وھد ءَ طالبان ءِ لشکر ءَ گوں کسان ءُ مزنیں سلاھاں اُرش کُتگ ءُ پد ءَ دوئیں نیمگانی میان ءَ مزنیں جنگ ءُ چوپے بیتگ۔

پاکستان ءِ پوج ءِ بنشون ھم اوگانستان ءِ نیمگ ءَ چہ اُرشانی پدرائی کتگ ءُ گْوشتگ کہ اوگان لشکر ءَ انگور اڈہ، باجوڑ، کرم، دیر، چترال ءُ ایشی ءَ ھوار بلوچستان ءِ بارام چاہ ءَ بے سوبیں تیرگواری کتگ۔

پاکستانی پوج ءِ بنشون ءَ ٹاہ داتگ کہ آپریشن ءِ وھد ءَ اوگانستان ءِ بازیں پوسٹ نشانگ جوڑ کنگ بوتگ انت۔

پاکستان ءِ دمگ کرم ءَ کہ چہ سیمسر ءَ لھتیں کلومیٹر ءَ دور ، پولیس ءِ کارمندے ءَ بی بی سی اردو ءِ ھال رسانکی عزیز اللہ خان ءَ گوں تران کنان ءَ گْوشتگ کہ دوئیں نیمگاں چہ مزنیں تیرگواری بوگ ءَ اِنت ءُ تاں انوگ ءَ دو مردم ٹپیگ بوتگ اَنت۔

دمگی مردمانی گشگ ءِ رد ءَ ضلع کرم ءِ سر ءَ اوگان لشکر ءَ چہ سئے نیمگ ءَ اُرش کتگ انت۔

کرم ءِ بنجاھی شھر پاڑہ چنار ءَ ڈسٹرکٹ ھیڈ کوارٹر ہسپتال پاڑہ چنار ءِ ڈاکٹر ءَ گشتگ کہ یک ٹپی یے آئی ءِ گور ءَ آرگ بوتگ ءُ آئی ءِ الاج بوھگ ءَ انت ءُ نوں چہ جاورے شر انت-

بلوچستان ءِ اوگانستان ءِ سیمسر ءَ چاگی ءِ سیمسر ءِ دمگ برابچہ ءَ ھم پاکستان ءُ اوگانستان ءِ لشکر ءِ نیام ءَ تیرگواری بوتگ۔

رخشان ڈویژن ءِ انتزامیہ ءِ کلانیں واکدارے اے گپ ءِ پدرائی کتگ ءُ بی بی سی اردو ءِ محمد کاظم ءَ گوں تران کنان ءَ گشتگ کہ شمبے ءُ یک شمبے ءِ شپ ءَ اوگان لشکر ءَ پاکستانی پوزیشنانی سر ءَ تیرگواری کتگ۔

آئی ء گْوشتگ کہ تیرگواری ءَ تاں انوگ ءَ ھچ وڑیں تاوان ءِ ھال سر نہ بیتگ انت-

دومی نیمگ ءَ اوگانستان ءِ وزیر دفاع محمد یعقوب مجاھد ءَ گوشتگ اے اُرش شمبے ءُ یک شمبے ءِ میانی شپ ءَ وتی بیرگیری ءَ پد داشتگ ءُ اگاں پاکستان ءِ نیمگ ءَ اوگانستان ءِ سیمسرانی لگتمالی کت گڑا اوگان سلاہ بندیں لشکر دفاع ءُ پسھی کاروائی کنگ ءَ جاڑیگ انت ءُ اے دابیں کاروائیانی ترندیں پسو دیگ بیت انت-