بلوچستان ءَ گرینڈ ٹورازم فیسٹیول گوادر ءِ جاہ ءَ اسلام آباد ءَ کنگ بیتگ

سے روچی ئیں بلوچستان گرینڈ ٹورازم فیسٹیول گودار ءَ کنگ ءِ جاہ ءَ پاکستان ءِ بُنجاھی شھر اسلام آباد ءَ برجاہ ءَ اِنت-

فیسٹیول ءِ بندات بلوچستان ءِ سر وزیر سرفراز بگٹی ءَ کتگ، آئی ءَ ٹاہ داتگ کہ سے روچی ئیں گرینڈ ٹورازم فیسٹیول ءَ بلوچستان ءِ دود ءُ ربیدگ ءَ جھان ءِ دیم ءَ پیش دار ایں-

آئی ءَ دیمتر ءَ گوشتگ راجدپتر ءَ اولی رند اِنت وزیر ءِ سیل ءُ سواد، دود ءُ ربیدگ، پی ٹی ڈی سی، دست ھُنر ءَ چہ بلوچستان ءِ دود ءُ ربیدگ ءَ تالان کنگ ءُ آئی ءَ جھان ءِ دیم ءَ پیش کنگ ءِ ھاتر ءَ سے روچی ئیں بلوچستان گرینڈ ٹورازم فیسٹیول کنگ بیگ ءَ اِنت-

زانگ بہ بیت کہ اے فیسٹیول ءِ مول ءُ مراد گوادر ءَ باپاری کنگ ءِ ھاتر ءَ دری ءُ ڈیھی باپاریاں گوادر ءِ نیمگ ءَ آرگ اِنت- بلے پھازوکی ءِ تُرس ءِ سوب ءَ اے فیسٹول گوادر یا کہ بلوچستان ءِ جاگہ ءَ اسلام آباد ءَ کنگ بیگ ءَ اِنت-

زانگ بہ بیت اشی ءَ ساری پھازوکی تُرس ءَ چہ نیو گوادر ءِ انٹرنیشنل ائیرپورٹ ءِ جوڑ بیگ ءِ مراگش ھم گوادر ءِ جاہ ءَ اسلام آباد ءَ اونلائن کنگ بیتگ، اود ءَ پاکستان ءِ سر وزیر شھباز شریف ءُ چین ءِ سر وزیر چیانگ ءَ بھر زرتگ اَت – ءُ تاں انّو گوادر ءَ چہ ھمگرنچیں مراگش اسلام آباد ءَ کنگ بیتگ اَنت-

زانگ بہ بیت کہ گوادر ءَ سیل ءُ سواد، باپاری ءَ تلان کنگ ءِ ھاتر ءَ برجم اے مراگش سی پیک پروجیکٹ ءِ بھر اَنت، سی پیک بلوچ سیاسی ءُ سلاہ بندانی نیمگ ءَ چہ پُلپانچیں شوربندی ءِ نام دیگ بیتگ اَنت کہ ایشی ءِ پشدر ءَ سیاسی پارٹیانی نیمگ ءَ چہ تھی ءُ دری ڈیھاں جتاجتائیں پڑ ءَ زھرشانی کنگ ءُ بلوچ سلاہ بندیں آجوئی لوٹوکانی نیمگ ءَ سی پیک ءُ دگہ شوربندیاں نشانگ کنگ ءَ اَنت-