زھری ءِ گوات ءِ وشبویں آشوب- دلشان بزدار

زھری ءِ گوات ءِ وشبویں آشوب

نبشتہ کار: دلشان بزدار

دومی بھر

دی بلوچستان پوسٹ

زھری ءِ کوھانی ٹُل ءَ روچ ءِ روژنائی ءِ برانز نوکی درایان اَت زھگ وانگجاہ ءِ روگ ءَ ابید ڈگارانی نیمگ ءَ جنزگ ءَ اِت اَنت، زالبول چاتاں آپ کشگ ءُ رَزاناں شودگ ءَ اِت اَنت ءُ مردین بے تواری ءَ گوگ ءُ پسانی پشت ءَ گران اِت اَنت درست ایمنی ءِ رنگ ءَ سما بوگ ءَ اَت بلے لھتے مٹ بوتگ اِت اَنت-

گوستگیں شپ ءِ گپ آسمان ءِ استاراں گواز کنان اِت اَنت ءُ چِلیم کشوکیں جنک پد ءَ مُچ بوان اِت اَنت بلے اے رندی آیانی میان ءَ بے تواری نیست اَت بس جُست اِت اَنت باتن ءَ چِست بوگ ءَ اِت اَنت-

آیاں گوشت کج اِنت ماسی نوری کہ آئی ءَ گوشتگ آشوب یات ءَ گوں بندات بیت اِنت، اے چونیں بنگپے آ ھرچی گوشگ ءَ اَت ھمے وڑ ءَ گمان بوگ ءَ اَت آ درست راستی اَنت-

ھمے گپانی اشکنگ ءَ ماسی نوری اتک ءُ سر بیت ھماوانگجاہ ءِ دیم ءَ ماسٹر اشرف ءَ زھگ وانینتگ اَنت ھما وانگجاہ کہ آئی ءِ دیوال ءِ یک نیمگے لُمبگی اَت ءُ کپگ ءَ دلمانگ ءَ اَت ءُ ماسٹر اشرف ءَ ھر روچ میتگ ءِ مردماں گوں دلگرانی اَت اے وانگجاہ ءِ ترانگ ءَ نہ کپ اَنت آئی ءِ دیوالاں مِیس کش اتگ ءُ یک روچے چوشیں کزاھے مہ کپات ءُ زھگے ءَ وتی ارجان مہ جنت-

وانگجاہ اے بَری بے توار اَت ھالیگ اَت کس آئی ءِ دیوالانی میان ءَ نیست اَت بس تند ءُ دنزاں گپتگیں وانگجاہ ءِ سر ءُ آئی ءِ پرشتگیں دروازگ اِت اَنت ءُ آئی ءِ دیوالانی چَک ءَ کوھن ءُ آشوبی نبشتانک اِت اَنت ھنچش گندگ بیتگ اَت اد ءَ یک زمانگے آشوبی ورنایے ءَ بنجل کتگ بیتگ-

گوش اَنت اِلم روژنائی اِنت بلے وھدیکہ بُج بہ بیت گڑا ھچ گندگ نہ بیت اِنت-ماسی نوری ءِ لُنٹانی سر ءَ یک بچکندی چھرگ گندگ بیت بلے آئی ءَ ھچ گپ نہ کت آ بے توار بوت- ھنچش سما بوت آئی ءَ کوھن ءُ دردناکیں یاتے ءَ امبازاں زرت-

ماسی نوری وتی زمانگ ءَ برے آشوب ءِ نام ءَ زانگ بیتگ اَت برے آشوبی نودربرانی رھبر زانگ بیتگ اَت ماسی نوری ءَ لوگانی دیوالانی چَک ءَ نبشتگ کتگ اَت کہ زھری ءِ مردماں یات ءَ بہ پِرین اِت شما کَے اِت شما کئی پرزند ءُ پُسگ اِت زھری نورز خان ءُ دگہ مڑاھداریں براھندگانی شھر اِنت اد ءَ ھرکس اگاں کیت آئی ءَ الم نورز خان ءُ دگہ مردمانی کرد یات بنت ، اد ءَ ھرکس کیت گڑا آ دلو ءُ باسد ءَ الم پجاہ کار اِیت-

ماسی نوری ءِ گپ سرکار ءَ گوشگ ءَ چُنڈگ پاچگ ءَ اِت اَنت اگاں آئی ءَ کتابی گپ کت ھم آشوبی اِت اَنت اگاں آئی ءَ ھنچشیں لس گپ کت ھم آئی ءِ گپانی توک ءَ آشوب ءِ جلکشیں مان اِت اَنت-

ماسی ءِ نوری ءِ شھر درامداں وتی ارجان جت ھرچ نیمگ ءَ آئی ءِ انگر کنگ ءُ چراگانی توسینگ ءَ دژمن زوراک ءُ زالم اَت ھرچ ورنا ءُ نوک بروتیں مردمے کہ درامدیں لدیگاں دیست گڑا آیاں اے نہ چار اِت کہ ماتے ءِ نوک بروتیں ورنایے بلکیں آیاں چِست کت ءُ وتی زنداناں برت ءُ ھرکس آیانی وَج ءَ اتک آیاں کُشت ءُ کنڈ کت۔

یک روچے درامدیں لدیگاں گشت نوری ترا ھم پاھو ءِ ساد ءَ دراتکیں دانکہ تئی ارواہ پادانی پنچ ءَ در بہ اتکیں بلے ماسی نوری ءَ آیانی جگر بریں گپ ھچ وڑ ءَ کمار نہ کت اَنت، آئی ءَ چراگ روک کت ءُ وتی گِس ءِ کنڈ ءَ آشوبی گپ کنگ بندات کت۔
روان انت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-