بلوچ یکجھتی کمیٹی ءِ جارکش ءَ وتی بیان ءَ گْوشتگ کہ بی وائی سی ءِ بنجاھی سروک گوستگیں شش ماھاں بے کانودی رویشانی دیمپان انت کہ ایشی ءِ سبب ءَ سروکانی ناجائزیں بندیگ کنگ ءِ وھد یکشل ءَ گیش کنگ بوگ ءَ اَنت۔
جارکش ءَ گشتگ کہ بنجاھی آرگنائزر ڈاکٹر ماہ رنگ بلوچ، بنجاھی رھشون بیبگر بلوچ، سبغت اللہ شاہجی، بیبو بلوچ ءُ گلزادی بلوچ دراجیں جسمانی ریمانڈ ءَ پد شال ءَ ھدا جیل ءَ دیم دیگ بوتگ انت، اود ءَ آ جوڈیشل ریمانڈ ءِ سر ءَ بندیگ انت۔ بلے انسداد ناشرکاری ءِ مھکمہ ءَ آمید گس ءِ گوشگ ءَ ابید انگت ءَ پسھی ءِ رپورٹ پیش نہ کتگ۔
جارکش ءَ گوشتگ کہ آمید گس ءِ نیمگ ءَ رپورٹ ءِ جم کنگ ءِ وھد ءِ بار بار گیش کنگ ءَ چہ اے گپ پدر بیت کہ عدلیہ ءُ ریاستی ادارگ تچک ءَ بی وائی سی ءِ سروکانی ھلاپ ءَ کیس ءَ را زانت ءُ زانگ ءَ دیر کنگ ءَ انت تانکہ سروکاناں گیش ءَ چہ گیش وھد ءِ واستا بندی جاہ ءَ دارگ بہ بیت۔
جارکش ءَ گیش گْوشتگ کہ انوگیں وھد ءَ جیل ءِ کارمستر ءَ دزگیریں سروکاں ھال داتگ کہ آیانی آیوکیں گوشدارگ آمیدگس ءِ بدل ءَ جیل ءِ تہ ءَ بیت کہ گمان اِنت کہ ”سیکورٹی ءِ جیڑہ“ ءِ سبب ءَ بیت۔ جارکش ءِ گشگ ءِ رد ءَ اے گامگیج بنیاتی انسانی ھکانی سکیں لگتمالی ءُ راجی ءُ میان استمانی کانود ءِ ھاسیں لگتمالی اِنت۔
بی وائی سی ءِ جارکش ءَ گشتگ کہ مازوریں سوشل ورکر بیبگر بلوچ ءِ جان سلامتی ءِ ھال ھساب ءَ ھراب بوتگ۔ آئی ءِ پیشاب ءِ راہ ءِ سکیں بندش ءِ آماچ اِنت ءُ آئی ءَ را زوتیں آپریشن ءِ زلورت اِنت بلے جیل ءِ کارمستر آئی ءَ را المی ئیں دوا ءُ درمان ءِ آسراتی دیگ ءَ نہ اَنت۔ جارکش ءَ گشتگ کہ اے رویش انسانیت دوستی ءُ زندانیان ءِ ھکانی ھلاپ انت۔
جارکش ءَ اقوام متحدہ ، میان اُستمانی انسانی ھکانی گل ءُ سول سوسائٹی ءَ چہ دزبندی کتگ کہ آ بی وائی سی ءِ سروکانی ناجائزیں بندیگ ءُ انسانی ھکانی لگتمالی ءِ سر ءَ زوت نوٹس بہ زور اَنت ءُ پاکستانی سرکار ءِ سر ءَ زور بہ دنت کہ آ میان اُستمانی کانود ءِ رد ءَ ساپ ءُ پلگاریں کانود ، جانسلامتی ءُ رھبند ءِ بنیاتی ھکاں دلجمی بہ کنت۔