ڈیرہ مراد جمالی ءَ پٹ فیڈر ریل ءِ پھاٹک ءِ سر ءَ بمب تراک

بلوچستان ءِ دمگ ڈیرہ مراد جمالی ءَ فیڈر ریل پھاٹک ءِ نزیک ءَ ریل ٹریک پھل ءِ سر ءَ ناشناساسیں مردماں تراکے کتگ-

اھوالانی رد ءَ تراک ھما وھد ءَ بیتگ پورسز پھل ءِ سر ءَ ایریں شورواں بے سوب کنگ ءَ دزبند بیتگ – واکداراں تراک ءَ تاوانانی بارو ءَ دگہ اھوال نداتگ انت-

دومی نیمگ ءَ بلوچ ریپبلکن گارڈز ءِ جارکش دوستین بلوچ ءَ اے اُرش ءِ زمہ واری من اتگ-

جارکش دوستین بلوچ ءَ گوشتگ بلوچ ریپبلکن گارڈز ءِ سرمچاراں ڈیرہ مراد جمالی ءَ بمب ڈسپوزل اسکواڈ ءَ را ریموٹ کنٹرول ءِ آئی ای ڈی تراک ءَ گوں نشانگ جوڑ کتگ۔

جارکش ءَ گوشتگ ڈیرہ مراد جمالی پٹ فیڈر ریل ءِ پھل ءِ سر ءَ تراکناکیں شورو ایر کتگ انت۔ اے میان ءَ پاکستانی زور گیریں لشکر ءِ یک ٹیمے ایشی ءِ بے سوب کنگ ءِ جھد ءَ بیتگ۔ تراک ءِ آسر ءَ یک کارندھے مرتگ ءُ دو سک ٹپی بوتگ ءُ ٹریک ءُ پُل ھم سک باز تاوان بوتگ۔

اے اُرش ءِ زمہ واری ءَ مئے گل بی آر جی من ایت ءُ اے وڑیں اُرش داں بلوچستان ءِ آجوئی ءَ برجاہ مان اَنت۔

زانگ بہ بیت ھمے ھپتگ ءَ اے دومی رند انت کہ ریل ٹریک نشانگ کنگ بوگ ءَ انت ءُ اے اُرشانی زمہ واری بی آر جی ءَ من اتگ انت-

سرجمیں بلوچستان ءَ ھمے سال ءَ ریل ءِ سر ءَ سیزدہ اُرش بیتگ انت کہ اے اُرشانی توک ءَ جعفر ایکسپریس ءِ دستیگ کنگ ھم ھوار انت-