بلوچستان ءِ جتاجتائیں دمگاں بیگواھیں مردمانی لاشانی درو دیگ درچ، پوج ءَ ھپت مردم ءِ جنگ ٹاہ داتگ، بیگواھیں نودربرانی یل کنائینگ ءِ ھاتر ءَ نندانک برجاہ

بلوچستان ءِ جتاجتائیں دمگ شیرانی ءَ پاکستانی پوج ءِ ھمگرنچیں ادارہ آئی ایس پی آر ءَ ھپت مردم ءِ جنگ ءِ ٹاہ داتگ ، بارکھان ءَ بیگواھیں مردمے ءِ لاش دزکپتگ ، اسلام آباد ءَ بیگواھیں نودربرانی یل کنائینگ ءِ ھاتر ءَ نندانک برجاہ-

ھمے وڑ بلوچستان ءِ دمگ شیرانی ءَ پاکستانی پوج ءِ ھمگرنچیں ادارہ آئی ایس پی آر ءَ ٹاہ داتگ کہ چیریں ھالانی بُنیاد ءَ آپریشن کتگ ھپت سلاہ بندیں مردم جتگ-

پوج ءِ جارکش ءِ رِد ءَ پوج ءَ چیریں ھالانی بُنیاد ءَ کاروائی کنان ءَ ناشرکارانی ساڑی بیگ ءَ کتگ-

جارکش ءِ رِد ءَ پوج ءَ اوتاک نشانگ کتگ اَنت ءُ تُرندیں تیرگواری ءَ پد ھپت مردم ءِ جنگ ٹاہ داتگ-

واکدار ءِ رِد ءَ آپریشن ءِ میان ءَ سلاہ، گولہ بارود ءُ تراکناکیں شورو دزکپتگ اَنت، بیران بیتگیں مردم دمگ ءَ سلاہ بندیں کاروائی ءَ ھوار بیتگ اَنت-

دومی نیمگ ءَ بلوچستان ءِ دمگ چہ بارکھان ءَ یک مردمے ءِ تیرسُپتگیں لاشے دزکپتگ کہ آئی ءِ پجّار محمد نواز ء شھسوار خان نام ءَ چہ بیتگ-

دمگی اِھوالکار ءِ رِد ءَ ، محمد نواز دہ ستمبر ءَ چہ رکنی بارکھان ءِ دمگ ءَ پاکستانی پوج ءَ آوار جتگ –

کھول ءِ گوشگ اِنت کہ آئی ءِ یل کنائینگ ءِ ھاتر ءَ تچ ءُ تاگ کتگ بلے واکدار ءَ دزگیری یا آوار جنی ءِ پدری نہ بیتگ- سی ستمبر ءَ آئی ءِ لاش دزکپتگ آئی ءِ سر ءَ تیرانی نشان بیتگ اَنت-

زانگ بہ بیت کہ گوستگیں روچاں ھم بلیدہ ءَ چہ اوتھل ءَ زورانسری آوار جنی ءِ نشانگ بیتگیں مردمانی لاش دزکپتگ اَنت وھدے کہ یک مردمے چہ بلیدہ کراس ءَ پاکستانی ھکومت پلامرزی ٹولیاں بیگواہ کتگ اَنت-

کُشگ بیتگیں مردم نیک سال ء دلوش جھمنند ماچی کلگ بلیدہ، عبدالقدوس ء حمید علی جھمنند ماچی کلگ بلیدہ ءُ نزر محمد ء عرض محمد جھمنند پروم ھوار اَنت-

دومی نیمگ ءَ بلوچ کونسل ءِ نیمگ ءَ نسلی پرستی، زورانسری آوار جنی ءُ چہ بلوچستان ءَ بیگواھیں مردمانی یل نہ کنگ ءِ ھلاپ ءَ گوستگیں پنچ روچ ءَ چہ زھرشانی نندانک داتگ-

بلوچ نودربر کونسل اسلام آباد ءِ رِد ءَ اے زھرشانی مول ءُ مراد زورانسری آوار جنی ءُ بلوچ نودربر ءِ پٹ ءُ پول کنگ ھلاپ ءَ توار چست کنگ اِنت-

آیاں گوشتگ کہ اے پُرایمنی زھرشانی بُنجل ءَ چہ ما تچک کنگ لوٹ ایں کہ اگاں ما وتی لوٹانی سنجیدگی ءَ چہ نہ زرتگ گُڑا ما وتی زرمشبت ءَ گیش دیم ءَ برگ ءَ لاچار کنگ بیت، چریشی ءِ سنگین آسر بنت-

بلوچ نودربرانی اے نندانک مروچی پنچمی روچ ءَ پُترتگ-

بلوچ نودربرانی گوشگ اِنت کہ ھور ءُ یکشل ءَ زور ءَ اَبید اوشتاتگ اَنت، کجام وڑیں اڑان مئے جزبگ ءَ پروشت نہ کنت یک انچے ءَ ھم پُشت نہ کنز ایں پرچاکہ وھدے پھاز ءُ پدریچ ءِ سر ءَ ھترہ بیت گُڑا گھگیری یکیں راھے پش کپ اِیت-

کونسل ءَ یونیورسٹی انتظامیہ ءُ ھمگرنچیں ھکومتی ادارھاں چہ لوٹ کتگ کہ آ اے لوٹانی سر ءَ دلگوش گور بکنت ءُ بلوچ نودربراں دیمپان انسانی ھکانی ھلاپ ءَ گامگیج بزور اَنت-