زورگپتگیں کشمیر ءِ مھلوک ءِ سر ءَ پاکستان ریاست ءِ زوراکی ءِ ھلاپ ءَ ڈاکٹر اللہ نزر بلوچ ءُ بی این ایم ءَ ایر جتگ اَنت-
بلوچ آجوئی لوٹوکیں رھشون ءُ بلوچستان لبریشن فرنٹ ءِ ( بی ایل ایف) ءِ سروک ڈاکٹر اللہ نزر بلوچ ءَ زورگپتگیں کشمیر ءَ پاکستان ءِ برجاہ زُلم ءُ زوراکی گوں تُرندی ءَ ایر جتگ ءُ پاکستانی زورگپتگیں کشمیری راج ءِ جُھد ءَ گوں وتی ھمدردی درشان کتگ-
ڈاکٹر اللہ نزر بلوچ ءَ گوشتگ کہ کشمیری زرمبشت ءِ دلیریں کارکنانی مھکمیں جزبگ ءَ دروت ندر کن آں- من اے شھیداں سُھرچکیں دروت ندر کن آں کہ آیاں شرپ، وتواجھی ءُ وتی سرڈگار ءِ ھاتر ءَ دیمونی داتگ – ایانی دیمونی راجدپتر ءَ نکش بنت، پرچاکہ کشمیری ورنایاں وتی ھون ءَ چہ توکل یک بے مٹیں گوستانکے نکش کنگ ءَ اَنت – وتی کھول، وتی راج ءُ چہ سر گوستگ ءُ پہ وتی آجوئی ءِ ھاتر ءَ-
ٍڈاکٹر اللہ نزر ءَ زور داتگ کہ گوشتگ کہ راستی، سرپدی، زانت ءُ شئور ءِ ھمگرنچیں زرمبشت ءَ گوں تاکت ءَ ایرموش کنگ نہ بیت – اے شئور ءَ چہ ودی بیتگیں جُھد راجدپتر ءِ تہ ءَ یک بے مٹّیں درے نکش کنگ ءَ اِنت- کشمیریانی ھون پاکستان ءِ دو دیمی چھرگ پدر کتگ – برے اسلام ءِ براتی ءُ وتگڑیں دو راجی لیکہ دروگیں کول ءِ پردگ ءِ پُشت ءَ چیریں پاکستان ، نو یک زورگریں توانمندی دروشم ءَ دیم ءَ اَتکگ، کہ بے میاریں کشمیریانی ھوناں ریچگ ءُ وتی ءِ زوراکی ءَ پیشدارگ ءَ اِنت-
ڈاکٹر ءَ ھمدردی کنان ءَ آئی ءَ گوشتگ کہ بلوچ راج کشمیری زرمبشت ءِ دلیریں گھگیری کنوکانی ھمکوپگ ءُ اوشتاتگ ایں- شمئے جُھد مئے جُھد اِنت، شمئے درد مئے درد اِنت- راستی آشوب ءَ بودناکی ءُ شوبندی ءَ گوں پہ سوبمندی ءَ یکشلیں گھگیری ھژدری اِنت-
کشمیری راج ءَ دلگوش گور کنان ءَ ڈاکٹر اللہ نزر بلوچ ءَ گوشتگ کہ کشمیری مات، گھار، جنین ءُ ورنایاں – شما تھنا نہ ئے – بلوچ راج ءُ مئے آجوئی ءِ سپاھیگ زی ھم شمئے ھمراہ بیتگیں ءُ مروچی ھم شمئے ھمراہ ءَ ایں-
ھمے وڑ بلوچ نیشنل موومنٹ ( بی این ایم ) ءَ وتی شنگ کتگیں درشانے ءَ گوشتگ کہ پاکستان ءِ زورگپتیں کشمیر ءَ چہ پاکستان ریاست ءِ زوراکیانی آسر ءَ کم چہ کم دوازدہ پر ایمنیں زھرشانی کنوک شھید بیتگ۔ چہ وتی پالیسی ءُ رویشگانی رد ءَ پاکستان ریاست یکبرے پد ءَ پیش دارگ ءَ اِنت کہ اے وتگڑیں ریاست تھنا پہ پہ پنجاپیانی نپانی پھریزگ ءَ برجاہ اِنت۔ آدگہ درسیں راج ایردست اَنت۔
آئی ءَ گوشتگ کہ کشمیر ءِ انوگیں جاوردو راجی لیکہ ءِ دروگ ءَ پاشک کنگ ءَ اَنت کہ چہ ھمے نیمون ءَ پاکستان جوڑ کنگ بیتگ۔ راستی ھمیش اِنت ایشی مول گوستانکی راجانی ڈگار ءُ مڈیانی دستیگ کنگ اِنت۔
آئی ءَ گوشتگ کہ بی این ایم کودکیں کشمیریانی سر ءَ زوراکیاں گوں ترندیں دانکاں ایر جنت ۔ کشمیریانی سر ءَ بیوکیں زوراکیانی چیر دیگ ءِ درگت ءَ دامگ بند کنگ بیتگ اَنت کہ میان استمان ءَ زوت دلگوش دیگ لوٹ ایت۔
آئی ءَ گوشتگ کہ بی این ایم ءَ ھمک وھد ءَ ھمے گپ ءِ سر ءَ زور داتگ کہ ایردستیں راجانی میانءَ کمک ءُ ھم سنتی ھژدری اِنت۔ مارا وتی ھواریں دژمن ءِ بگیری ءَ یکجاہ اوشتگ ءُ پہ آجوئی، وتواکی ءُ شرپ ءَ جھد کنگ لوٹ ایت۔