بلیدہ ءُ اوتھل ءَ چار بیگواھیں مردمانی لاش دزکپتگ انت

بلوچستان ءِ جتا جتائیں جاھاں چار بیگواھیں مردمانی لاش دزکپتگ انت کہ ھر چاریں مردم ھمے ستمبر ءَ بیگواہ کنگ بیتگ انت-

دزکپتگیں لاش کیچ ءِ دمگ بلیدہ ءُ اوتھل ءَ دزکپتگ انت کہ اود ءَ بیگواھیں مردمانی تیر سپتگیں لاش دزکپتگ انت-

دزکپتگیں لاشانی پجار نیک سال ء دلوش، قدوس ء امید جھمنند بلیدہ گردانک ءُ پروم ءِ جھمنندیں نظر مھمد ء عرض محمد ءِ ناماں زانگ بیتگ انت ءُ دگہ یک لاشے اوتھل زیروپوائنٹ ءَ دزکپتگ کہ آئی ءِ پجار جھانزیب ء روشن جھمنند پسنی ببر شور ءِ نام ءَ زانگ بیتگ انت-

ایشانی توک ءَ نیک سال، نظر محمد ءُ قدوس 30 ستمبر ءَ چہ بلیدہ ءَ بیگواہ کنگ بیتگ انت ءُ جھانزیب چہ پسنی ءَ بیست ءُ ھشت ستمبر ءَ آوار جنگ ءُ بیگواہ کنگ بیتگ-

بلوچستان ءَ بندیگیں مردمانی لاشانہ دزکپگ یکشل ءَ برجاہ انت کہ گوستگیں ھپتگ ءَ کیچ ءَ ھوار بلوچستان ءِ دگہ جاھان ھم بندیگیں مردم دروگیں میڑاں کشگ ءُ چگل دیگ بیتگ انت-