بلوچستان ءِ دمگ لسبیلہ ءَ مساپر کوچ ءُ ٹرک ءِ ٹکر ءَ شش مردم بیران ءُ ھبدہ ٹپی بوتگ انت۔
ایس ایس پی لسبیلہ ءِ رد ءَ مساپر کوچ چہ پنجگور ءَ کراچی ءَ روگ ءَ بوتگ کہ زیرو پوائنٹ ءِ نزیک ءَ آؤکیں ٹرک ءَ گوں ٹکرے وارتگ۔ ٹپیانی تہ ءَ مردین، جنین ءُ چُک ھوار اَنت کہ آ ایمبولینس ءِ سر ءَ نزیکیں نادراھجاہ ءَ سر کنگ بوتگ اَنت۔ بازیں ٹپیانی جاور ھال سک نگیگ انت۔
ریسکیو ءِ کارندھانی گشگ انت کہ ویل ءَ پد مزن شھدگ ءِ سر ءَ ٹریفک ءِ روانی ءِ سر ءَ سان کپتگ کہ پولیس ءِ کمک ءَ چہ ٹریفک ءِ روانی پچکنگ بیتگ-
زانتکارانی رد ءَ بلوچستان ءِ شھدگانی سر ء ویلانی کچ ءُ کساس ءِ تہ ءَ گیشی بیتگ ءُ باز براں دراجیں دوری ءِ سبب ءَ مسافر گاڑیانی ڈرائیور واب کپ انت ءُ تھنائی ءِ آماچ بنت ءُ ویلانی سبب پیش کاینت-
لس مھلوک ءِ گوشگ انت سرکار زوت سڑکاں جوڑ بہ کنت، ٹریفک ءِ کانونانی سر ءَ ترندی ءَ گوں امل بہ کنت ءُ ڈرائیورانی ھیلکاریاں المی بہ کنت دانکہ گران بھائیں ساہ رک ات کت بہ کن انت-