کیچ ءَ آئی ای ڈی تراک ءَ پاکستانی پوج ءِ سَے کارندہ بیران، بلوچستان دگ پہ وزیراں سپر کنگ ءَ ترس آماچ جان مھمد جمالی

بلوچستان ءِ دمگ کیچ بلیدہ گلی ءَ گوستگیں شپ ءَ ناشناسیں مردماں پاکستانی پوج ءِ پرپٹ سواریں کارندہ یک آئی ای ڈی تراکے ءِ نشانگ کتگ انت کہ چریشی ءِ آسر ءَ سَے کارندہ مرتگ انت-

واکداراں سَے کارندھانی بیرانی ءِ ھال راست کتگ ءُ گشتگ اُرش ءَ نائیک ساد، سپاھی اسمائیل کہ یک سد ءُ سَے ونگ ءِ انجنیئرے بیتگ ءُ سپاھی اسد کہ شست ءُ یک ونگے کارندہ بیتگ-

زانگ بہ بیت بلوچستان ءَ پاکستانی پوج یکشل ءَ اُرشانی نشانگ کنگ بوگ ءَ انت کہ گوستگیں روچ ءَ بلوچ لبریشن آرمی ءُ بلوچستان لبریشن فرنٹ ءَ جتا جتائیں اُرشانی زمہ واری من اتگ انت-

بلوچ لبریشن آرمی ءِ جار جیئند بلوچ ءَ گوستگیں روچ ءَ شنگ کتگیں درشان ءَ گوشتگ سرمچاراں زھری ءِ دمگ انجیرہ ءُ گزان ءَ پیشگامی کنوکیں پوج اُرش ءِ نشانگ کتگ-

جارکش ءَ گوشتگ اے اُرش ءِ زد ءَ اتکگیں دو گاڑی سرجم ءَ تباہ بوتگ انت ءُ گاڑیاں سواریں پانزدہ کارندھاں گیش مرتگ انت-

آئی ءَ گوشتگ زھری چہ یازدہ اگست ءَ سرمچارانی کنٹرول ءَ انت ءُ چل ءُ ھپت روچاں پاکستانی پوج ءِ پیشگامی بازیں براں بے سوب کتگ انت-

ھمے وڑ ءَ بلوچستان لبریشن فرنٹ ءِ جارکش گوھرام بلوچ ءَ شنگ کتگیں درشان ءَ گوشتگ سوراب ءُ واشک ءِ بنجاھی شھدگ ءِ سر ءَ ناکہ بندی کتگ ءُ کسٹم ءُ پولیس کارندھانی سرکاری سلاہ ءُ گاڑی پچگپتگ ءُ برتگ انت-

دومی نیمگ ءَ بلوچستان عوامی پارٹی ءِ بین پارٹی گچینکاریانی وھد ءَ پیسریگیں سر وزیر ءُ پیسریگیں اسپیکر جان محمد جمالی ءَ گْوشتگ کہ بلوچستان ءِ شھدسگ مئے واستا پھریزی نہ اَنت ھمے ھاتر ءَ آ ءُ دگہ بازیں سیاست دان سڑکاں سپر کنگ ءَ بے سوب اَنت۔

آئی ءَ وتی تران ءِ تہ ءَ گوشتگ کہ جاور ھال انچو نگیگ اَنت کہ ھچ وزیر سڑکاں سفر کنگ ءِ وس ءَ نہ کنت ءُ لھتیں رھشون لھتیں دمگانی تہ ءَ چہ گوزگ ءَ ترس ءُ بیم ءِ مارشت ءَ دار اَنت۔

آئی ءِ گشگ ءِ رد ءَ ترس ءِ سوب ءَ من چہ بولان ءَ گوست نہ کن آں ۔ آئی ءَ یک مسالے داتگ ءُ گشتگ کہ صادق سنجرانی ھم نوشکی ءَ سپر کت نہ کنت، ءُ کلات ءُ ایندگہ دمگانی جاور ھم پریشان کنوک انت۔

زانگ بہ بیت گوستگیں وھداں بلوچستان ءِ مزن شھدگانی سر ءَ بلوچ آجوئی دوستیں سلاہ بندیں گلانی زور گیش بوتگ۔ چیک ءُ تانی کنگ ھمک روچ رپورٹ بوگ ءَ انت-