تربت : بیگواھیں رفیق اومان ءِ کھول ءِ پریس کانفرنس، دو بیگواھیں مردمانی لاش دزکپتگ اَنت، یک ورنایے زورانسری بیگواہ،فدائی الطاف ءِ لوگ ءِ سر ءَ بیڑ برتگ

بلوچستان ءِ جتاجتائیں دمگ آواران ءَبدو بیگواھیں مردمانی لاش دزکپتگ اَنت ،شال ءَ یک ورنایے آوار جنگ بیتگ ، تربت ءَ بیگواھیں رفیق اومان ءِ کھول ءَ یازدہ سال سرجم بیگ ءَ پریس کانفرنسے کتگ ، بلیدہ ءَ فدائی الطاف ءِ لوگ ءَ پوج ءَ بیڑبرتگ-

بیست یک ستمبر 2025 ءَ زورانسری بیگواھیں بلوچ گُشندہ رفیق اومان ءِ بیگواھی ءَ یازدہ سال سرجم بیتگ، ھمے درگت ءَ آئی ءِ جنکو ءَ وتی مات ءُ بلُّک ءِ ھمراھی ءَ تربت پریس کلب ءَ پریس کانفرنس کنان ءَ گوشتگ کہ رفیق اومان ءِ زورانسری آوار جنی ءَ یازدہ سال سرجم بیتگ بلے تاں مروچی آئی ءِ ھچ وڑیں ھال دز نہ کپتگ-

آیاں گوشتگ کہ رفیق اومان کہ گورنمنٹ بوائز ھائی اسکول بل ءِ ھیڈماسٹر بیتگ ءُ بلوچی زُبان ءِ گُشندھی ھم کتگ آ یازدہ سال ءَ ساری 21 نومبر 2014 ءَ یک سرکاری کارے ءِ واستا تربت ءِ واتری ءَ پد بلنگور ءَ روگ ءَ بیتگ کہ کیچ گرائمر اسکول ءِ نزیک ءَ زورانسری بیگواہ کتگ-

آیانی گوشگ اِنت مارا تاں مروچی ھچ سرپدی نیست کہ منی پت زندگ اِنت یا اناں ، آ نزانت کہ آئی ءِ مات جنوزام اِنت یا کہ آئی ءِ لوگ واجہ ھست اِنت، آئی ءَ گوشتگ آئی ءِ کستریں گھار ءِ زورانسری آوار جنی ءَ لھتے ءَ پد ودی بیتگ آئی وتی پت ندیستگ ھم ءُ آئی ءِ یات ءُ آیگ ءِ ودار ءِ سھارگ ءَ زندگیں وھدے کہ آئی ءِ پیرزالیں بلُّک گرماگ ءَ لوگ ءَ وپس اِیت ءُ سارتیاں ڈن ءَ وپس اِیت پرچاکہ آ نزانت آئی ءِ چُک کجام وڑیں گم ءُ رنجانی تہ ءَ اِنت-

کھول ءِ گوشگ اِنت کہ اینچو دراجیں مدتے ءَ آئی ءَ انساپ نہ رس اِتگ ءُ آ یکشل سسّائی ءُ مالی ازیت ءِ تہ ءَ اِنت- آیاں گوشتگ کہ رفیق اومان ءِ یل کنائینگ ءِ ھاتر ءَ ھرچ در ٹُکّ اِتگ ، آمیدگس ، کمیشنز ءُ ھکومتی ادارھاں گوں دزبندی کتگ بلے ھچ وڑیں گامگیج زیرگ نہ بیتگ-

آیاں گوں ھکومتی ادارہ ءُ انسانی ھکانی گلاں چہ لوٹ کتگ کہ رفیق اومان ءَ زوت یل کنگ ءِ گامگیج ءَ بزور اِت ءُ بیگواھیں مردمانی جیڑہ ءِ جوانیں پالیسی یے جوڑ بہ کن اِت-

ھمے وڑ بلوچستان ءِ بُنجاھی شھر شال ءَ پاکستانی پوج ءَ یک نودربرے آوار جتگ ءُ ناشناسیں جاھے ءَ برتگ-

گیشیں ھالانی رِد ءَ پاکستانی پوج ءَ شیرزمان ء غلام قادر ڈگری کالج سریاب ءِ ھسٹل ءَ آوار جتگ ءُ بیگواہ کتگ- کھول ءُ سنگتیں نودربراں آئی ءِ یل کنائینگ ءِ لوٹ کتگ-

دومی نیمگ ءَ بلوچستان ءِ دمگ آواران ءِ ھند چہ جھاؤ مجد پیرکراس ءَ پاکستانی پوج ءِ دست ءَ زورانسری بیگواھیں دو ورنایانی لاش دزکپتگ اَنت-

دمگی اِھوالکار ءِ رِد ءَ دوئیں ورنا لھتے روچ ءَ ساری زورانسری آوار جنی ءِ نشانگ کنگ بیتگ اَنت-

دوئیں کُشگ بیتگیں ورنایانی پجّار فھیم ء قاسم ءُ باقر بلوچ ء اللہ بخش نام ءَ چہ بیتگ اَنت، کہ وت ماں وت سیاد ءُ آواران ءِ دمگ چیدگی ءِ جھمنند بیتگ اَنت-

اِھوالکار ءِ رِد ءَ فھیم یازدہ ستمبر ءَ آواران بُنجاھی بازار ءَ وھدے کہ باقر دوازدہ ستمبر ءَ چہ جھاؤ ءَ پاکستانی پوج ءَ آوار جنگ ءَ پد بیگواہ کتگ اَنت-

گوستگیں روچ اے دوئینانی لاش جھاؤ ءَ مجد پیرکراس ءَ چگل داتگ اَنت-

زانگ بہ بیت گوستگیں روچ ءَ ھم پاکستانی پوج ءَ دشت ءَ چار بیگواھیں مردمانی لاش دور داتگ اِت اَنت کہ آیانی تہ ءَ دو ءِ پجّار ستار ءُ تارک ءِ نام ءَ چہ بیتگ اَنت کہ دشت ءِ دمگ شولیگ ءِ جھمنند بیتگ اَنت-

ھمے وڑ یکشمبے ءِ روچ ءَ پاکستانی پوج ءِ مزنیں کچے ءَ بلیدہ ءِ دمگ الندور ءَ فدائی الطاف ءِ لوگ سر ءَ بیڑبرتگ – اے میان ءَ لوگ لوگ ءَ پٹ ءُ پول کتگ ءُ کھول ءِ زورانسری ویڈیو نکش کتگ-

دمگی اِھوالکار ءِ رِد ءَ پاکستانی پوج ءِ ھمراھی ءَ دیم پوشیں چاریگ ھم گون بیتگ اَنت- پوج ءِ کارندھاں فدائی الطاف ءِ پت ءُ برات تُرسینتگ اَنت ویڈیو جوڑ کتگ اَنت الطاف ءَ گوں کے ھال اھوال ءَ بیتگ ھمایانی درگت ءَ جُست ءُ پُرس ءَ بیتگ اَنت-

دمگی مردمانی گوشگ اِنت کہ پوج ءَ کھول پاتھہ ءُ دگہ رمسانی نہ کنگ ءِ کڈن کتگ اَنت ءُ سنگین ءِ بیھار داتگ اَنت-

زانگ بہ بیت کہ فدائی الطاف انّگیں روچاں دشت ءَ بلوچ لبریشن آرمی ءِ نیمگ ءَ چہ پاکستانی پوج ءِ سر ءَ بیتگیں مزنیں اُرش ءَ ھوار بیتگ-

یات بہ بیت گوستگیں روچ ءَ پنجگور ءِ دمگ پروم ءَ ھم پاکستانی پوج ءَ فدائی گوھرام بلوچ ءِ لوگ سر ءَ بیڑبرتگ ءُ اے میان ءَ آئی ءِ ناکو کریم جان آوار جتگ ءُ ناشناسیں جاھے ءَ برتگ کہ انگت بیگواہ ءَ اِنت-

زانگ بہ بیت کہ گوستانک ءَ ھم پاکستانی پوج بلوچ جُھدکارانی لوگانی سر ءَ بیڑبرتگ ءُ آیانی سیاد زورانسری بیگواہ کتگ اَنت-