بگرام بالی پٹ ءِ امریکہ ءِ گوم ءَ ڈیل بوت نہ کنت ۔ اوگان تالبان

اوگانستان ءَ تالبان سرکار ءِ یک اگدہ دارے ءَ مروچی یکشمبے ءِ روچ ءَ گوشتگ کہ بگرام بالی پٹ ءِ درگت ءَ امریکہ ءِ گوم ءَ ھچ وڈیں معاہدہ بوت نہ کنت ۔ اے گپ تالبان سرکار ءِ اگدہ دار ءَ ھما وھد ءَ جتگ کہ امریکہ ءِ سروک ڈونلڈ ٹرمپ ءَ ھمے واھشت درشان اتگ کہ اوگانستان ءِ گوستگیں امریکی بیس واپس کنگ بہ بیت ۔

ٹرمپ ءَ شمبے ءِ روچ ءَ اوگانستان بیھار داتگ ۔ اے بیھار آئی ءَ برتانیہ ءِ سرکاری ترءُ تاب ءِ وھد ءَ بگرام بالی پٹ ءَ دوبر کنٹرول کنگ درشان ءِ لھتے روچ پد داتگ ۔

ھپتاد ءُ نھ سالی ٹرمپ ءَ وتی ٹرتھ سوشل پلیٹ فارم ءَ نبشتگ کہ اگاں اوگانستان بگرام بالی پٹ ءَ واپس نہ کنت گڈا شر نہ بیت ۔

مروچی یکشمبے ءَ اوگان ءِ وزارت دفاع چیف آف اسٹاف فصیح الدین فطرت ءَ گوشتگ کہ لھتے مردم سیاسی ڈیل ءِ نامءَ اڈہ واپس پچ گرگ لوٹاں ۔

آئی ءَ ھندی رسانکدراں وتی داتگیں چمشانک ءِ تہ ءَ گوشتگ کہ ھمے زوتاں لھتے مردماں گوشتگ کہ آیاں بگرام بالی پٹ وتیگی کنگ ءِ ھاتر ءَ اوگانستان ءِ گوم ءَ گند ءُ نند بندات کتگ انت ۔

آئی ءَ گوشتگ کہ اوگانستان ءِ یک چُنڈے زمین ءِ سرا ھم ڈیل بیت نہ کنت مارا آئی ءِ زلورت نہ ایں ۔

بگرام ، اوگانستان ءِ مستریں بالی پٹ ایں کہ امریکہ ءِ تالبانی بگیری ءَ جنگی بنجاہ بوتگ ۔

امریکہ ءُ نیٹو پوج ءَ جولائی 2021 ءَ بگرام یل داتگ کہ ٹرمپ ءِ تالبان باگی آنی گوم ءَ معاہدہ ءِ بھر ءِ بوتگ ۔ امریکہ ءُ نیٹو پوج ءِ درآیگ ءِ لھتے ھپتگاں پد تالبان دوبر اقتدار ءَ اتکگ انت ۔