بلوچ آجوئی لوٹوکیں سلاہ بندیں گلانی ھم سنتیں گل بلوچ راجی آجوئی سنگر (براس) ءِ جارکش بلوچ ھان ءَ وتی شنگ کرتگیں درشان ءِ تہ ءَ گوشتگ کہ مستونگ ءُ زامران ءَ زورگریں پاکستانی پوج ءِ گوم ءَ دو جتائیں میڑاں زورگریں پوج ءِ ھپت کارمند کشتگ انت وھدیکہ اے میڑاں بلوچ راجی آجوئی سنگر ءِ چار سرمچار نمیران بوتگ انت ۔
جارکش ءَ سرجمیں ھال داتگ گوشتگ کہ مستونگ ءِ دمگ دشت ءَ 12 ستمبر 2025 ءَ زورگریں پاکستانی پوج ءَ ڈرون ارش ءَ پد بالگردانی سرا کمانڈو ایرگپتگ ءُ دیما آیگ ءِ جھد کتگ ۔ ھمے میان ءَ سرمچار ءُ زورگریں پوج ءِ میان ءَ میڑ بندات بوتگ ءُ سرمچاراں پوج دیم ءِ آیگ ءَ نہ اشتگ ءُ سَے کارمند کشتگ انت وھدیکہ دو سرمچار ابوبکر پنام مجید ءُ ابدل ھد پنام ءِ ازمان نمیران بوتگ انت ۔
آئی ءَ گوشتگ کہ زامران ءِ دمگ کوتان ءَ 13 ستمبر 2025 ءَ براس ءِ سرمچار ءُ زورگریں پاکستانی پوج ءِ میان ءَ میڑ ھما وھد ءَ بندات بوتگ کہ سرمچار تر ءُ تاب ءَ بوتگ انت ۔ اے میڑاں زورگریں پوج ءِ چار کارمند مرتگ ءُ بازینے زدگ بوتگ انت وھدیکہ دو سرمچار سدیر پنام ءِ برمش ءُ اسلام پنام ءِ سگار نمیران بوتگ انت ۔
آئی ءَ گوشتگ کہ نمیرانیں سنگت ابوبکر کرد پنام ءِ مجید ء پتھ مھمد مستونگ ءِ دمگ دشت ءِ نندوک بوتگ ۔ آئی ءَ سال ءِ بوتگ کہ بلوچستان لبریشن پرنٹ ءَ بوتگ ءُ مستونگ ءُ شال ءِ کوھاں وتی کرد ءَ پیلو کنگ ءَ بوتگ ۔
نمیرانیں سنگت ابدل ھد مینگل پنام ءِ ازمان ء ھاجی موسی کلات ءِ دمگ جوھان ءِ نندوک بوتگ ۔ آئی ءَ سال ءِ بوتگ کہ بلوچ لبریشن آرمی ءَ بوتگ ءُ مستونگ ءِ کوھاں ایردستی ءِ بگیری ءَ وتی کرد ءَ پیلو کنگ ءَ بوتگ ۔
آئی ءَ گوشتگ کہ نمیرانیں سنگت اسلام پنام ءِ سگار ء اتاء مھمد مشکے ءِ دمگ تنک ءِ نندوک بوتگ ۔ لومز یونیورسٹی اتل ءِ وانند اسلام پنام ءِ سگار ھمے سال ءَ بی ایل اے ءَ ھوار بوتگ ءُ پنجگور ءِ کوھاں وتی کرد ءَ پیلو کنگ ءَ بوتگ ۔
بلوچ ھان ءَ گوشتگ کہ نمیرانیں سنگت سدیر پنام ءِ برمش ء پیر جان تمپ ءِ دمگ سری کھن ءِ نندوک بوتگ وھدیکہ آ بنکی ءَ زامران ءِ جھمنند بوتگ ۔ آ گوستگیں سال ءِ نومبر ماہ ءَ بلوچستان لبریشن پرنٹ ءَ ھوار بوتگ ءُ آئی ءَ تمپ ، مند ءُ زامران ءِ کوھاں وتی کرد پیلو کتگ ۔
درشان ءِ گڈسر ءَ بلوچ راجی آجوئی سنگر (براس)ءِ جارکش بلوچ ھان ءَ گوشتگ کہ مئے نمیرانیں سرمچاراں وتی جانانی دیمھونی داتگ ءُ اے گپ تچک کتگ کہ ایردستی منّگ تچکیں راہ نہ انت ۔ اے دیمھونی مارا ھمے مارشت ءَ دئینت کہ مئے ھر گام آؤکیں پدریچ ءَ گوں بندوک انت ۔ ھمے کول ءِ ھمراھی ءَ ما وتی جھد ءَ برجاہ داریں تاکہ بلوچستان وتی جتائیں آجوئیں سرڈگار ءِ پجار ءَ برجم بہ دار ایت ۔