آڈیشن پہ مرگ ءَ
نبشتہ کار: جیئند سادک
دی بلوچستان پوسٹ
Audition for the Death
پُشت ءَ شونز، سبز ءُ سُھر رنگیں چادرے دیوار ءِ دیم ءَ لِچ اِتگ اَت راستی نیمگ ءَ یک دلیر ءُ نتُرسیں شھیدیں کماندارے ءِ اکس اَت کہ بچکندگ ءَ اَت ، چپی نیمگ ءَ سُتکگیں شھر ءِ گُڈی بنیادم اَت۔ دیم ءَ نوکیں دَور ءِ کیمرھے اَت نھاد ئِے ھم سک گران اَت، نیام ءَ شکر ورنائیں نوک سبز اِتگیں ریش ءُ بَروتاں گوں چِلّ ءَ ششتلیں پُچ ئےِ گوْر ءَ اَت باریں چینچک روچ ئِے بیتگ اَت کہ ناں آئی ءِ جان ءَ آپ دیستگ اَت ناں کہ آئی ءِ گُداں ۔
دوئیں دستاں گوں داشتگیں ایم 16 یے اَت دلبند ءَ کوھن ءُ کلنڈیں جاٹا گوں چار میگزین تیر ءَ جاٹا ءِ راستی نیمگ ءَ لونجانیں واکی ٹاکی اَت، گُٹ ءَ لونجانیں سوھان کُتگیں تیرے اَت ، مات ءِ دم جتگ ءُ پُرکتگیں تبزی ءِ مُھرگانی نیام ءَ جاگہ اِش داتگ اَت، ھمے لونجانیں تیر ءِ روچ ھم ھسابی اِت اَنت چو ھمے شکر ورنا ءِ روچاں۔ ما درُستاں وھدے چم چار اِت ءُ مار اِت اَنت تاں تھنا یک چیزے دیست Audition For the Death
Audition for modeling
2
کوھنیں ریلیّ ءَ تچکیں پیریں کارستے اَت ۔ھپتاد ءِ باریں ھشتاد ءِ دھک ءِ بے رنگیں اکسے ءَ گوں شھرستان ءِ مستریں چار راہ ءَ چو مِکیں کمبہ ءَ بے ساہ، بے جان ءُ بے سُر پُر ءَ یکشلا اوشتاتگ اَت ۔
کشی نیمگ ءَ نوک سیر کتگیں جنکے اَت ، آئی ءِ دیم ءَ ایریں دو تیلی پُچ اِت اَنت ، یک جوڈی یے جنینی سیاہ رنگیں پُچ اِت اَنت دومی تیلی ءَ مردینی اسپیتیں کاٹن۔ آئی ءِ جند ءِ گْور ءَ سُھریں دوچی اِت اَنت کہ چو انسانے ءَ ملور ءُ ابیتک ءُ مونجان اَت ۔
رُمب ءُ ریچ اَت ، گوش ئے کہ میتگ ءَ کسے ءِ سیر ءِ روچ اَت دْراھیں چک ءُ چوریگ مزن داں کسان جنین داں مردین دْراہ، کسے ءَ پلیٹے دست ءَ اَت، کسے ءَ زرد رنگیں گْونڈیں بالٹی یے کسے ءَ کار بستگیں تیلی یے کسے ءَ وتی چادر ءُ گُشان دست ءُ دلان اِت اَنت مئے بھر ءَ ھم بہ دے اِت۔
ھمے توک ءَ چیزے تِپل گوں وتی لیبوکاں مزن دگ ءِ سر ءَ ھَور ءِ دْرَد ءَ چہ میسّ اِتگیں پُچاں گوں لرزوکیں جان ءَ سارت ءُ پلگاریں گوات ءِ تہ ءَ وت وت ءَ گوں گیروشگ اَت ، پِت کیت لالا کیت ، مات کیت ،ادّا کیت ، واجو کیت۔ ۔ ۔ ۔بندیں پیتی ءَ بیت ءُ کیت یا گوں وتی پاداں۔ ۔ ۔بلے کیت۔ ھمے ھپتاد دھک ءِ بے رنگیں اکسانی دیم ءَ ایریں نوکیں جوڑی ءِ گُدانی ھمراھی ءَ پلیٹ ءَ پُرّیں بٹ مان اِنت ءُ یک گلاسے آپ۔
ریلّی ءَ تچکیں پیریں کارست ءَ گُمان بیگ ءَ اَت کہ چُک شُدیگ اِنت چک تُنیگ اِنت۔ ۔ ۔پُشت ءَ لونجانیں پوسٹر ءِ تہ ءَ دگہ اکسے کہ جنینی سریگے اَت چہ ورنائی ءِ ھوناں گوں میس اِتگ اَت، پد ءَ ھمے سریگ ءَ گوں آئی ءِ بے ساھیں کُنٹ پتاتگ اَت، جارے اَت کہ پہ میان اُستمانی دُنیا ءُ آئی ءِ مردماں چیزے دیم دیگی اَت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-