سپارتی بے سوبی
ٹی بی پی شونگال
پاکستان ءُ چین ءَ میان اُستمان ءَ بلوچستان ءِ آجوئی ءِ واستا پرکاریں بلوچ لبریشن آرمی ( بی ایل اے) ءُ آئی ءِ پدائی ونگ مجید بریگیڈ ءَ را سلامتی کونسل ءِ 1267 ءِ القاعدہ ءِ بندش ءِ کمیٹی ءِ درچ ءَ “ ناشرکاریں گل” ءِ دروشم ءَ نامینگ ءِ واستا یک ھواریں کراردادے پیش کتگ – بلے میان اُستمان ءِ 1267 ءِ کمیٹی ءِ بندش ءِ نزام ءَ بلوچ لبریشن آرمی ( بی ایل اے) ءُ مجید بریگیڈ ءَ ناشرکاریں ٹولی ءَ نامینگ ءِ ھوارینگ ءِ لیکہ امریکہ، برطانیہ ءُ فرانس ءَ رد کتگ – بی ایل اے القاعدہ ءُ داعش ءَ ھوارینگ ءِ کمیں شاھدانی درور دیان ءَ کرارداد رد کتگ-
چین ءُ پاکستان بازیں سالاں بلوچ لبریشن آرمی ءَ میان اُستمانی فورمز ءَ ناشرکاریں گل گوشگ ءِ جھد ءَ انت – شنگھائی کمکی گل ءُ میان اُستمانی سلامتی کونسل ءِ ھواریں کرارداد ھما جھدانی بھر انت دانکہ بلوچ زرمبشت ءَ نیکراھی ناشرکاری ءَ ھوار کنگ ءُ میان اُستمانی ادارھانی نیمگ ءَ بندش جنگ ءُ بلوچ راجی آجوئی ءِ سرپروشیں ادارھاں زور دیگ ءَ گیش بہ کن ایں – بلے اے گوستانکی راستی یے کہ بلوچ زرمبشت ءَ ھچبر نیکراھی گلاں گوں سیادی نہ بیتگ ءُ اے جیڑہ ءَ کس انکاری کت نہ کنت بلوچ راجی آجوئی ءِ جد ءُ جھد وتی بنکی ءَ دیمروئی ءِ پکر ءَ ھوار انت-
میان اُستمانی سلامتی کونسل ءَ سپارتی بے سوبی ءَ ابید ھم چین ءُ پاکستان آیوکیں وھداں ھم میان اُستمانی پتر ءَ بلوچ سلاہ بندیں گلاں ناشرکاری ءَ ھوار کنگ ءُ آیانی سر ءَ بندش جنگ ءِ جھد ءَ کن انت – بلے بلوچستان ءَ زمینی جاورھالانی مٹ بوگ ءُ سپارتی ءُ پوجی جھداں ابید آجوئی ءِ واستا پرکاریں سلاہ بندیں گل چین ءِ زرکاری ءُ پوجی پریامانی سر ءَ ٹوھیں کچے ءَ اُرش اش برجاہ کتگ انت، چریشی ءَ چین وتی اقتصادی ءُ پوجی پریاماں سرجم کنگ ءَ زِدی انت- پاکستان ءُ سعودی عرب ءِ میان ءَ ھواریں پھریزی مسام ءِ روچ ءَ کیچ ءِ ھند دشت ءَ چین – پاکستان اقتصادی راھداری ءِ راہ ءَ پاکستانی ہوج ءِ کاروان ءِ سر ءَ بی ایل اے مجید بریگیڈ ءَ پدائی اُرش ءَ کلوہ تچک کتگ کہ میان اُستمانی پتر ءَ بیوکیں سپارتی ءُ پھریزی پیسلہ بلوچ سلاہ بندیں گلانی جنگی تاکت ءَ سان دات نہ کنت-