شال ءِ شھر ءَ گوستگیں شپ ءَ آجوئی لوٹوکاں ناکہ بندی کتگ، پولیس کارندہ دزگیر ءُ سلاہ اش برتگ انت

بلوچستان ءِ بنجاھی شھر شال ءَ بلوچ آجوئی لوٹوکیں مردماں شھدگ بند کتگ ءُ پولیس ءِ کارندھے ءِ سلاہ ءُ دگہ سامان دستیگ کتگ انت۔

گوستگیں شپ ءِ ادار 9 ءِ نزیک ءَ بلوچ آجوئی لوٹوکیں مردماں شال ءِ شھر شیخ زاھد اسپتال ءِ نزّیک ءَ بنجاھی شھدگ ءِ سر ءَ ناکہ بندی کتگ۔ ھمے وھد ءَ گْوشگ بیتگیں جاھ ءَ ھستیں پولیس دزگیر کنگ بیتگ ءُ آیانی سلاہ پچگرگ بیتگ اَنت۔

چمدیستگیں مردمانی رد ءَ سلاہ بندیں سرمچار نیم کلاک ءَ شھدگ ءِ سر ءَ بوتگ ءُ اسنیپ چیکنگے کتگ ءُ پولیس ءِ کارندہ پد ءَ یل کنگ بوتگ۔

بلوچ آجوئی لوٹوکیں مردمانی نیمگ ءَ شھدگانی بندگ یکشل بوگ ءَ انت کہ ایشی ءِ سبب ءَ شھدگانی سر ءَ پورسز، سرکار ءِ باسک ءُ سرکار ءِ کمک ءَ مردمانی سپر کنگ بے پھریزی انت-

دو روچ پیش بلوچ لبریشن آرمی ءِ مجید بریگیڈ ءَ کیچ ءِ دمگ دشت ءَ مزنیں اُرشے ءَ پاکستانی لشکر ءِ سواریں بسانی کاروان نشانگ جوڑ کتگ ءُ جانی تاوان دیگ بیتگ انت۔

دومی نیمگ ءَ میان اُستمانی تکاں بلوچ آجوئی لوٹوکیں گلاں ناشرکاری ءِ بھتام جنگ ءَ پاکستان ءُ چین یکشل ءُ جھد ءُ انت بلے ھمے درچ ءَ بلوچستان ءَ بلوچ آجوئی لوٹوکانی اُرش ترندی ءَ گیش بوان انت-

چریشی ءَ پدر بیت کہ بلوچ آجوئی لوٹوکیں گل گیش توان ءُ مھکمی ءِ نیمگ ءَ جنزگ ءَ انت ءُ آیانی راہ گیشتر گِشگ ءِ نیمگ ءَ جنزگ ءَ انت-