لبزانک ءُ آشوب
نبشتہ کار: محمد حسن عسکری
بلوچی رجانک: تابش امیر
دی بلوچستان پوسٹ
لبزانک ءُ آشوب ءِ میان ءِ سیالی چی اِنت؟ لبزانک ءَ آشوب ءِ کارانی تہ ءَ کارمرز یا کُمکّار بوگی اِنت یا بوگی نہ اِنت؟ اگاں بوگی اِنت گڑا کجام کساس ءَ بوگی اِنت؟ اِے جُست انچیں جُست اَنت کہ اِیشانی پسّھانی جیڑگ ءَ پِیش مارا آشُوب ءِ جند پرّیچگی اِنت ، پرچا کہ گیشتر ھما مردم کہ آشوب دوست اَنت آوان اَنت وت اِے سما نہ اِنت کہ آشوب چی ءَ گُش اَنت ءُ ما آشوب ءَ چے پیم سما کنگ ءَ ایں، تھنا لبزانک ءِ تہ ءَ ناں، سیاست ءِ تہ ءَ ھم گیشتر رَدی ھمے لبز ءِ شرّیں رنگے ءَ سرپد نہ بوگ ءَ چہ دِیم ءَ اتکگ اَنت، پد ءَ مستریں جیڑہ اِیش اِنت کہ کُلّیں گالبندانی وڑ ءَ اے لبز ءِ مانا گوں یک مردمے ءِ سرگوست ءَ گوں اِینچو ھوار کنگ نہ بیت، اِینچو کہ چاگردی ءُ سیاسی سِتکانی یا کہ بیسھانی بنیاد ءَ جوڑ بوتگیں ٹولیانی لوٹ ءُ باز بر ءَ آوانی آسراتیانی ھساب ءَ ھوار کنگ بیت۔اے ھساب ءَ گُڑا لبز آشوب ءَ اِینگو بجن آنگو بجن اِیشی ءِ سک باز مانا گندگ ءَ کیت۔
چہ درستاں پِیش ھما چیز ءَ گوں ما ھم دپ اِیں، آ آشوب ءِ بابت ءَ یک انچائیں مردمے ءِ جیڑگ اَنت۔ ھمے وڑ ءَ ھرچ آشوبی چِست ءُ ایرانی ھمبراھی ءَ لھتیں جاہ ءَ مارا تاگت کارمرز بوگ ءَ گندگ ءَ کیت، کُشکّائی ھم بیت، دُزّی بیت گوں، ءُ اے ڈولیں چِست ءُ ایر کسان ءُ مزنیں کساسے ءَ ھر راج ءَ دیستگ۔ چوناھا اگاں آشوب ءِ نام ءَ گِر ئے گڑاں درستاں ساری کُشگ، جنگ ءِ اکس دیم ءَ کیت۔چُشکہ ھُکمران ءِ مردم وتی جاہ ءَ چو ارزانی ءَ گوں یلہ نہ کن اَنت ءُ آوانی دُور کنگ ءِ ھاتر ءَ تاگت کارمرز کنگی اِنت۔ھمے واستا آشوب ءِ ھاتر ءَ کار کنوکیں ٹولی وت آشوب ءِ اے اکس ءَ جوڑ کن اَنت، اے پد ءَ دگہ گپّے کہ آشوب ءِ اے اکس اِیشانی جند ءِ واستا چمّ ءِ کُنٹگ بیت، بلے آشوب ءَ چہ پیش لَس مھلوک ءَ را تاگت کارمرز کنگ ءِ واستا اے اکس ءَ دِیم ءَ دینت۔
آشوب ءَ پیسر ھما سیاسی ءُ مئاشی بے رنجی ءِ سما بیت کہ آ وت مزاجانی توک ءَ پریشانی ءِ رنجاں پیداک کنت۔پمشکا آشوب ءِ توک ءَ بھر زیروک یا ھمایت کنوک ” آشوب زندگ بات ” ءِ اوگام ءَ جنان ءَ پیسر اِے نہ جیڑ اَنت کہ آشوب آواناں ھُکمران جوڑ کنت، ایشی ءَ ابید آوانی مازگ ءَ اے ھیال کیت کہ مارا انوگیں ھُکمران ءِ پروشگ ءِ موہ رس اِیت، آشوب ءِ اے ھیال تھنا لَس مھلوک ءَ تَک اوشتوک نہ اِنت، بلکیں آشوب ءِ آزمانگ ءَ انچیں انچیں مردم چہ اِیشی ءَ اسر بیت کہ آ وت امن پسند اَنت، شائر ءُ ادیب و اے ھیال ءَ سک زوتّاں مَنّ اَنت، پرچا کہ آیاں وتی زمانگ ءِ بِے سُدّیں واھگانی گوں ما مزنیں سیادی یے بیت، اِیشی ءَ بِل ” شِیلے ” وت کہ آشوبیاں اے مشورہ ءَ دنت کہ زُلم ءِ جواب ءَ گوں سلامتی ءَ بدے، آ ھم انچو آشوب ءِ سر ءَ ھبر ءَ بید ء زُلم ءُ ھونریزی ءَ کُت نہ کنت۔اے الّمی اِنت کہ باز بر ءَ آئی ءَ را اے وڑیں آشوب ءَ چہ تُرس بہ بیت کہ آئی ءِ توک ءَ انساناں کُشگ زلوری بہ بیت، بلے ھونی ئیں مدارگاں چہ مزہ زورگ ءَ آ کسّے ءَ چہ کم نہ اِنت، شیلے چے معنی، فرانس ءِ آشوب ءَ پد پورائیں یورپ ءَ ھرچی کہ آشوبی شائرے بوتگ آوانی توک ءَ ھونریچی ءِ سرھال نوں بس اَنت، بلکیں ٹہ اِیت مارکسیت ءِ اسر ءِ چیر ءَ ھما کہ آشوبی لچّہ نبشتہ کنگ بوتگ اَنت، آ ھم چہ اِیشی ءَ ھالیگ نہ اَنت، اد ءَ تک کہ ” ڈی لوئیس، اسپینڈر، آڈن ” ءِ وڑیں پکائیں مردمانی لچّھانی توک ءَ اے ھبر گندگ ءَ کیت، وت ھمد ءَ مئے اردو شائری ءِ توک ءَ اوں ھمے ھال اِنت۔ انوگ ءَ چہ دہ سال پیسریگیں لچّھاں یات بکن اِت، آوانی توک ءَ زھم ءُ کارچ، آس ءُ ھونانی چینچو ھبر گندگ ءَ کیت، ھاس احسان دانش ءِ یک لچّھے ءِ توک ءَ و سک باز بوتگ۔۔۔ ھما لچّہ کہ شائر آشوب ءِ بابت ءَ یک وابے گند اِیت۔ لبزانک ءَ ابید آرٹ ءِ توک ءَ اوں ھمے رنگ گندگ ءَ کیت، شرتریں درور ” دلاکروا ” ئیگ اِنت، آ و یک ساھتے ءِ واستا ھم ھونریچی ءُ آشوب ءَ چہ یکّے دومی ءَ جِتا کُرت نہ کنت۔ بزانکہ اگاں ما لبزانک ءِ توک ءَ آشوب ءِ اے وڑیں اَکس ءِ دروراں بِہ پولاں گُڑا ھزارانی کساس ءَ تاک یکجاہ کُرت کناں۔
بلے چہ اِے لبزانک یک مزنیں جیڑگے دیم ءَ آؤرت کُرت کنت؟ اِیشی ءَ چہ و مارکسی مردم اوں انکار کن اَنت، لبزانک و یک نوکیں ھیالے ءِ پَٹ ءُ پول ءِ برابری اِنت ءُ آشوب ءِ اے وڑیں اکسے ءِ توک ءَ برابری ءِ ھچ جاہ پشت نہ گیتکگ۔ لبزانک نوکیں جیڑگ لوٹ اِیت پرچا کہ لبزانک بنیادی ھساب ءَ ھیال ءُ جیڑگ ءِ ھمایتی اِنت ءُ بُرز ءِ کُرتگیں ھبرانی توک ءَ ھمے گندگ ءَ کیت کہ تباھی ءِ واستا دگہ تباھی ءِ لوٹ باکی دُرستیں چیزانی سر ءَ ھاکِم اِنت ، ھمے واستا اِے اکس ءِ پُشدر ءَ یک اسر کنوکیں لبزانکے و دیم ءَ اتک کنت بلے مزنیں لبزانکے دیم ءَ اتک نہ کنت، گیشتر اے وڑیں جاورانی توک ءَ نبشتہ کنوکیں مردم لکچر دنت ، لبزانک انّاں، اے وڑیں ھبر پد ءَ آشوبی زمانگ ءِ گوزگ ءَ پد بے رنگ، سِرتگ ءُ باز جاگھاں پورو شُگلے گندگ ءَ کیت۔
”ییٹس” ءَ گُشتگ کہ مردم گوں وت ءَ اگاں جنگ بکنت گڑاں شائری ودی بیت، گوں دِگراں جنگ بہ کنت گڑا واز ءُ لچکر پیداک بیت۔ کجام وڑیں آشوبی شائری ءِ ما انوں ھبر ءَ کنگ ءَ اِیں، آئی ءِ توک ءَ جنگ و دومی ءِ ارواہ ءُ اسولانی توک ءَ اوں نہ بیت بلکیں دومی ءَ را تھنا یک چیزے پھمگ بیت۔۔۔ ءُ ھما وڑیں چیز کہ آئی ءَ ما بس پروشگ ءُ دور دیگ لوٹاں۔ ھما چیز ءَ کہ تھنا پروشگ ءُ دور دیگ لوٹ ئے آئی ءِ واستا تئی کِرد کجام ھم وڑ ءَ ساچشتی بوت نہ کنت۔ ھمینچو دیر ءَ تاں تئی دماگ ءَ لھتیں چیزاناں { انساناں یا اسولاں، چیزاں} تھنا پروشگ ءُ دور دیگ ءِ واستا پروشگ ءُ دور دیگ ءِ جزبگ ءِ سر ءَ بیت، تو مزنیں لبزانکے وجود ءَ آؤرت اوں کُرت نہ کن ئے۔ اے رویّہ وَ اوّل ءَ چہ بگیر انسانی اِنت ءُ انسان وتی انسانیت ءَ گار کنگ ءَ چہ انسانی دروشمیں چیز وجود ءَ آؤرت اوں نہ کنت۔
البت یک ھبرے زلور ممکن اِنت۔بوت کنت کہ جنگ ءِ واستا جنگ ءِ جزبگ لھم لھم ءَ جنگ ءَ را یک گچینی یا مزنیں گوں دلچسپی ءَ مشاھدہ کنگ ءِ جزبگ ءِ توک ءَ مَٹ بہ کنت ءُ اِزمکار جنگ ءُ پساد ءَ شرّیں وڑے ءَ اکس کَشّی ءَ بکنت۔ اے وڑیں جاوراں آ ھَکّ ءُ دل شوکیں لبزانک ءُ آرٹ جوڑ کُرت کنت۔ اِیشی ءِ درستاں چہ شرتریں درور ” دلاکروا ” ءِ اکس اَنت۔ برھال اے کار ءَ مردم آشوب ءَ پد و کرت کن اَنت بلے آشوب ءَ پیسر انّا۔ ھاس کہ ھما ازمکار کہ آشوبی جاوراں کُمک اوں کنگ لوٹ اِیت ءُ آئی ءِ مازگ ءِ توک ءَ ھونریچی اوں ھست۔ ما ھما اِزمکارانی مازگ ءَ آشوبی ھونریچی بئیت آئی ءِ شکسیت ءَ شَھوَت ءِ مان گیشگ ءَ چہ ھالی مہ پھم اَنت، من ءَ پد ءَ ” دلاکروا ” ءِ یک اکسے ءِ یات پیداک اِنت۔ آجوئی ءِ جنین سنگر ءِ سر ءَ اے اکس ءِ توک ءَ تھنا ” دلاکروا ” ءِ انّا اے پیمیں دراھیں آشوبی ازمکارانی نپسیاتی سرگوست ساپیں رنگے ءَ درائی کن اَنت۔ ”آجوئی ءِ دیوی ” سکّیں پراھیں ءُ توانائیں جنینے ءُ آئی ءِ دلبند شر مزن اِنت، اے وڑیں جنینے ازمکارے ءِ توجّہ ءِ بنجاہ اِنت، بلے آ وتی جسمانی ھساب ءَ اے وڑیں جنینے وتی کمان ءَ کُرت نہ کنت۔ھمے واستا آئی ءِ بے چاڑی ءُ دلوارگی، دلسپائی مساکیت ءِ توک ءَ مَٹ بیت ءُ پد ءَ آ یک جنینے مُردگانی ءُ ٹپّیانی توک ءَ بوگ ءَ ابید دگہ پیمیں جیڑ اِت نہ کنت۔ اگاں اے ڈولیں ازمکار سیاست ءِ اوں شوکینے بہ بیت گڑا آ یکدم آشوبی ھونریچی ءِ شیداھے بیت، ایشی ءِ توک ءَ ھچ بدگمانی نیست کہ جنسی مانگیشگ ءِ سبب ءَ سیاسی جنگ پہ جنگ ءَ کم بیت ءُ ازمکار ءِ ساچشت ءِ توک ءَ نپسیاتی جیڑہ کیت ءُ آئی ءَ را بے لبزانک ءُ بے ازم بوگ ءَ شہ رکّین اِیت۔ پمیشکا اے جنسی پریشانی ءِ شرّیں پھنات اوں ھست ءُ ھرابیں ھم، ایشی ءَ ابید ” دلاکروا ” ءِ اکس کامیات نہ بوتگ اِت اَنت۔
2) آشوب ءِ دگہ مانا یے انگت ءَ جُھلانک اِنت، ھما آشوبی کہ اگلمند اِنت آ اِے مانا ءَ اوّل سر ءَ چہ پوہ بیت، آ دگہ مردم آشوب ءِ گوزگ ءَ پد اِیشی ءِ جھلانکی ءَ دیست کن اَنت، اگاں ناں آ دگنیا ءِ جیڑھاں گوں اَنچو چِیر ءُ سر بنت کہ اِیشی ءِ ھچ سُدّ ءَ نہ بنت کہ آشوب چی یے ءُ چی یے نہ اِنت، آشوب ءِ راستیں مانا ھونریچی یا تباھی نہ اِنت ءُ ناکہ بس یک تُشے مٹ ءُ سٹّی یے آشوب گشگ بیت، اے وَ آشوب ءِ ارزانیں مانا اَنت، اسل آشوب و بِے ھونریچی ءَ اوں بوت کنت۔۔۔پد ءَ اوں ھون ھرچ وڑ ءَ ریچگ بیت۔ آشوب ءِ اسل مانا اِیش اِنت کہ ھما زندگی کہ بیکار اِنت مٹ کنگ بہ بیت، ءُ آئی ءِ جاگہ ءَ یک نوکیں زندے بئیت کہ نوکیں جاوراں گوں یک بہ بیت، اسلی آشوب تھنا سیاسی یا چاگردی نہ بیت بلکیں تئی اِکدارانی آشوب بیت، آشوب ناں تھنا یک چاگردے ءِ چمّ دیستگیں رنگ ءُ دروشم ءَ مَٹ کنت بلکیں آوانی دل ءُ دماگ ءَ اوں مَٹ کنت، اسلی آشوب تَبی آشوب بیت۔ اِیشی ءَ چہ یک نوکیں انسانے ودی بیت { نوکین ءَ چہ من لُکّیں مانا زورگ ءَ اوں}۔
اے وڑیں آشوبی ءِ توک ءَ لبزانک ھر وھد ءَ کُمکّار بیت، بلکیں اے وڑیں آشوب ءَ چہ چار گام دیمتر ءَ بیت،پیشتریں رَدّ ءُ بدلیانی، زلورتانی جیڑگ ءَ لبزانک پیش دار اِیت، اے بدلیانی تَبی پھناتانی نزّارگ ءَ اوں لبزانک کنت۔ وتارا آشوبی گشگ ءَ ابید لبزانک ھرچ اوّل سرین ءُ مزنیں آشوب ءِ دُژمن لیکگ بیت۔” ڈی ایچ لارنس ” ءَ و اد ءَ تک اوں گشتگ کہ ھما وھد ءَ تک لبزانتے انسانی شئور ءِ بنیادی رَدّ ءُ بدلیانی درشانی ءَ مہ کنت آ مزنیں لبزانتے جوڑ بوت نہ کنت ھالانکہ تو ” لارنس ” سیاست ءَ چہ بیزاری ءِ جار ءَ جنگ ءَ اِنت بلے آئی ءَ منّ اِتگ کہ انسان ءِ سیاسی شئور ءَ لھتیں بدلیانی درشانانی پیشدارگ ءِ سبب ءَ ”شیکسپئر” اے وڑیں مزنیں شائرے جوڑ بوتگ، ھالانکہ من ءَ شیکسپئر ءِ بابت ءَ اے وڑیں بیان کبول نہ اِنت بلے بنیادی ھساب ءَ ” لارنس ” ءَ شر گُشتگ، بلکیں ” جوئس ” ءِ نزدیک ءَ اد ءَ شئور ءِ تبدیلیان ءُ نوکیں آشوبانی نشانگ گندگ ءَ کیت۔ اے ھساب ءَ ما ” جوئس ” ءَ را اوں آشوبی لبزانتے گُشت کنیں۔ ھیر، پلھال آشوب ءِ مانا ءَ اِینچو دراجکَش نہ کنین ءُ بس سیاسی ءُ مئاشی مَٹّیاں تک لُکّ داراں، پرچا کہ ھمے بدلی گیشتر انسان ءَ درستاں چہ گیشتر سرپد بنت ءُ درستاں چہ ساپیں رنگے ءَ گندگ ءَ کاینت۔ ھر وھد ءَ اے وڑیں مٹّیانی ھبر کیت لبزانک دائم ءَ آئی ءِ واستا ھبر چست کنت۔ یک یا دہ دوازدہ لبزانت اگاں تبدیلیانی ھلاپ ءَ بہ بنت گڑا ایشی ءَ ھچ نہ بیت گیشتر ایشی ءِ ھکّ ءَ ھبر کناں۔ چونکہ لبزانک ھرچ مھلوک ءِ دستاں یک آلھے، نوکیں برابرے ءِ لوٹ ئے، پمشکا تبدیلیانی ھمایت لبزانک ءِ واستا سک باز اِنت، اے ھر وھد ءَ ھمے ھساب بوتگ ءُ ھمے ھساب ءَ بیت۔
ایشی ءِ توک ءَ ھچ شک نیست کہ لبزانتے ءِ شکسیت ءِ توک ءَ رج اِت پسندی ءِ یک پھناتے اوں بیت، ھبر ایش اِنت کہ لبزانتے تھنا اے ڈولیں چیزانی بابت ءَ نبشتہ کرت کنت کہ آ آئی ءِ نپسیاتی ءُ دماگی تجربہ ءَ اتکگ اَنت، اے ھما چیز بنت چشکہ یک ھاسیں وھدے ءَ موجود بہ بنت، ھما کہ دیم ءَ نوک وجود ءَ کاینت، ایشی ءِ بابت ءَ لبزانتے ھچ نبشتہ کرت نہ کنت پرچا کہ آ اِیشی ءِ تجربہ ءَ نیتکگ۔ آ بس ھستیں چیزاناں ھست کنگ ءِ جھد ءَ کنت، آئی ءِ اے ھیسیت در آشوبی یے ءُ یک ھدّے ءَ تک پکا اِنت۔بلے ھواری ءَ وھدے کہ ھالات انسان ءَ بدل کنگ ءَ مجبور کن اَنت گڑا لبزانک اوں ھالاتانی ھم آواز بیت۔
تبدیلیانی نیمگ ءَ اشارہ کنوکیں لبزانت دو وڑیں بنت، یک نیمگے ءِ لبزانت وَ اے وڑین اَنت کہ وڑ وڑیں راہ ءَ چہ پیش دار اَنت کہ وھد ءُ زمانگ ءِ نزام ءُ اکدار پرچا بے سوب ءُ ناکارہ اَنت، باز رند ءَ اے وڑیں لبزانتاں کوھنیں چیزاں گوں باز اِشک بیت، ءُ آ اِیشاں مٹ کنگ نہ لوٹ اَنت، بلے لبزانتے ءِ راست چاروکیں چم آئی ءَ مجبور کن اَنت کہ آ بچار اَنت کہ اے نوں کوھن بوتگ اَنت ءُ ناکارہ اَنت۔ اے وڑیں لبزانت اوں آشوب ءِ ھزمت ءَ کنگ ءَ اِنت،اے وڑیں لبزانتے ءِ آشوب، آشوب پہ جنگ ناں بلکیں آشوب پہ تئمیر اِنت۔ دومی نیمگ اِیش اَنت کہ آ زان اَنت کوھنیں اکدارانی جاگہ ءَ نوں کجام نوکیں اکدار رواج بگر اَنت، کم چہ کم آ در شئوری ءَ نوکیں اکدار ءِ نیمگ ءَ اشارہ کن اَنت۔ اے مردم اسلی آشوبی لبزانت اَنت بلے توری آوانی توک ءَ تشدد پسندی بیت یا ناں بیتز توری تو آواناں آشوبی مہ گُش اوں آشوب بے ایشانی نپسیاتی بیسہ ءَ وجود ءَ نہ اِت۔
اردو لبزانک ءَ اوں دگہ لبزانکانی ڈول ءَ اے وڑیں آشوبی مٹّیانی بزانکہ انسانی شئوری گوں مٹّیاں ھمراہ داری کتگ۔ سر سید ءِ تھریک ءِ توک ءَ اوں لھتیں آشوبی اناسر ھست اَت ،توری آ چم ءُ نزاھر ءَ (سدفیصد اصلاح) پسند گندگ ءَ پرچا نیتکگ۔ اے تھریک ءَ مسلمانانی شئور ءِ توک ءَ ھرچ تبدیلی آؤرت، آئی ءِ توک ءَ لبزانک برابر ء شریک بوتگ۔ ما بگش ایں کہ اینچو مزنیں مٹّی اوں بگند ئے لبزانک ءَ آؤرت، ایشی ءَ پد مئے شئور ءَ وتی نیمگ ءِ چَکرینگ ءِ آجت ۳۶ ءِ نزدیک ءَ اتک، آ وھد ءَ اوں لبزانک چہ سیاست ءَ انسانی نپسیاتی ھیسیت ءَ دیمتِر ءَ بوتگ، اے نپسیاتی مَٹّی تھنا ھما لبزانتاں چہ نہ بوتگ کہ ایوک ءَ شئوری راہ ءَ آشوب آرگ ءِ ھک ءَ بوتگ اَنت، بلے ایشی ءِ توک ءَ ھما لبزانت کہ آواں لبزانک ءَ را شئوری ھساب ءَ چہ آشوب ءَ جِتا کنگ ءَ اوں مزنیں دستے مان اِنت، اے وڑیں لبزانتاں وَ آشوب ءِ روہ ءَ را سیاست ءُ مئاشیات ءَ چہ اوں دیمتر ءَ برتگ ءُ زندگی ءِ کُنڈ کُنڈ ءَ تک سر کتگ۔
(3) آشوب ءِ اے دو مزنیں مانا وَ بوت اَنت، بلے ، آشوب ءِ مانا ءَ باز بر ءَ سیاست اوں وتی واستا مٹ ءُ سٹ کنت، اے ھبر ءِ درور ءَ انوگیں فرانس ءِ پلسپی ادیب ”ژاں پال سارتر” ءَ لبزانک ءُ آشوب ءِ نیام ءَ باوست کتگ ءُ دیم ءَ آؤرتگ۔ فرانس ءَ جرمنانی کبزہ ءِ دوران ءَ سک باز سیاسی مردم گوں جرمنیاں شت اَنت ءُ تپاک بوت اَنت۔ ھمے وڑ یک مردے ھست اَت کہ درائینت ئِے ، ملک ءِ ھستیں جاورانی گندگ ءَ چہ آشوب ءِ مانا ایش بیت کہ ھرچی ھما وڑ اِنت بِل اِت ئِے کہ ھما وڑ بیت۔ دومی تاریپ یک کمیونسٹے ءَ پیش کرت کہ آشوب ءِ مانا ایش اِنت کہ پیداوار گیش کنت۔ اے دو انچیں تاریپ اَنت کہ چہ ایشی ءَ آشوب ءِ پوراھیں مانا اے دیم ءُ آ دیم بیت۔ اے ھبر منّگ بیت کہ ھر وھد ءَ آشوب ءِ زلورت نہ بیت ، وھدے یک برے کوھنیں رواج ءُ اکدار ھتم بہ بنت گڑا اے الّمی بیت کہ جنگ ءُ چوپ دارگ بہ بنت ءُ نوکیں اکدار چِن ءُ لانچ کنگ بہ بیت۔ بلے اے آشوب گشگ نہ بیت پد ءَ اوں ایشی ءِ زلورت ھست۔ بلے ھبر ایش اِنت کہ لبز آشوب وت سکّیں دل کشیں لبزے، کہ ایشی ءِ بس اش کنگ ءَ چہ مردم ءَ جزبگ الّم کیت، ءُ سیاسی جمائت وتی مکسد ءَ اوں ھمے جزبگ ءُ کوکاراں چہ ھاسل کن اَنت، گڑا آ اے وڑیں کار آمدیں لبز ءَ چتور یلو بکن آں؟ بلے بگوش کہ آشوب ءَ پد یک دگہ جمائتے نوک ھکومت ءَ کیت، پمیشکا آشوب ءِ اسل مانا ایشی ءِ وتی ماد ءِ الٹ بیت، دومی نیمگ ءَ اے لبز ءَ وتی پائدگ ءِ واستا کارمرز کنگ اوں الّمی اِنت۔ نوں آشوب ءِ مانا بدل ناں بلکیں برجم دارگی اِنت، اے مئے بیستُمی کرن ءِ سیاست ءِ جادو اِنت۔ بے ایمانی وَ پیسر ءَ اوں بوتگ بلے یک لبزے ءِ مانا اے رنگ ءَ تک مٹ ءُ سٹ کنگ مردماں نہ زانتگ بوتگ۔ لبزانک آشوب ءِ ھمراہ داری ءَ ھما وھد ءَ کنت وھدے کہ زند ءَ را وت آشوب درکار بہ بیت۔ بُرز ءِ آشوب بس یک بے مانائیں لبزے پمیشکا لبزانک اوں ایشی ءِ ھمراہ داری ءَ نہ کنت۔ اگاں لبزانتے ءَ را اے گشگ بہ بیت کہ آشوب ءِ ھاجت نوں ھلاس اِنت گڑا آ اے ھبراں زار اِیت۔ بلے یک انچیں کارے کہ آ آشوبی کارے نہ اِنت ءُ آ آشوب گشگ بہ بیت آ چہ آئی ءَ ھمایت لوٹگ بہ بیت گڑا آ اد ءَ ایشی ءِ منّگ ءَ تیار نہ بیت۔ البت اے دگہ ھبرے کہ یک ملکے ءِ لبزانت پوراھیں سیاسی مردمانی گلام جوڑ بوتگ اَنت ءُ ھرچ ھبرے ھچ اینگور ءُ آنگور منّ اَنت، بلے وتی نپسیاتی تجربہ ءِ ھلاپ بوگ ھمے ھبر ءَ پدّر کنت آ یک شرّیں لبزانکے بِھ ودی کرت نکن اَنت۔ آشوب ءِ اے دراھیں مانا کم ءُ باز سیاسی اِت اَنت۔ پرچا کہ آشوب ءِ لبز درستاں چہ گیش سیاستی ءُ مئاشتی اداراھاں کارمرز بیت۔ پمیشکا سیاسی گلاں ایشی ءَ را وتی لیبوک جوڑ کرتگ ءُ آ دانشور ءُ لبزانتاں چہ اوں ھمے امیت ءَ دار اَنت کہ ما آشوب ءَ را ھرچ رنگے دِے ایں آ ھمے وڑ امیشی ءَ بزور اَنت۔ بلے لبزانک وت ءَ ایشی ءِ پرچا اے وڑ پابند بکنت؟ آشوب تانا سیاسی چیزے نہ انت۔ سیاسی ءَ چہ گیش وَ اے یک نپسیاتی تَھرے۔ گڑا ما لبزانک ءِ بابت ءَ ھبر ءِ وھد ءَ آشوب ءِ مستریں مانا یاں پرچا وتی جیڑگ مکن آں؟
اگاں آشوب ءِ مانا نوکیں جاوراں چہ مپاھمت پیدا کنگ ءِ واستا وت ءَ مَٹّ کنگ ءِ نام اِنت گڑا اے وڑیں مپاھمت ءِ زلورت وَ زندگی ءِ کسان کسانیں جاگھاں ھر وھد ءَ بیت ءُ ادب باز بر ءَ ھمے وڑیں وجدانی نکشکاری ءَ کت۔ گوں راستی ءَ یک بوگ وت یک آشوبے۔ ءُ لبزانک درستاں چہ ساری ھمے آشوب ءِ آدینک اِنت۔ بگند ئے ھمے واستا اوں اے انسان ءِ پشت گیجگ ءِ واستا الّمی اِنت۔ لبزانک ءِ آشوبی کار گوں راستی ءَ ھم کوپگ بوگ ءَ اِنت ءُ ایشی ءِ کمک راستی ءِ مٹ بوؤکیں رنگانی ھمراھی ءَ زندگی ءِ اوزار ءَ مناسب ھدّے ءَ تا بدل کنگ ءَ اِنت۔ زندگی ءِ توک ءَ تھنا سیاسی ءُ مئاشی کدّ ءَ جدلیاتی کار نہ بوھگ ءَ، بلکیں جدلیاتی کار ءِ باز میدان گندگ ءَ کیت۔ ادب جدلیاتی کار ءِ ھرچ مزن ءُ کسانیں ندارہ ءِ اھاتہ ءَ کنت۔ میر ءِ اے مشئوریں شیر ءَ دلگوش کن اِت:
“فقیرانہ آئے صدا کر چلے”
“میاں خوش رہو ہم دعا کر چکے’
اے شیر ءِ توک ،ءَ کم جدلیات گندگ پیداک اِنت؟ بلکیں اسلی جدلیات وَ ھمُک روچ ءِ انسان ءِ سیادیانی اِنت۔ میر ءِ برزا داتگیں شیر ءِ توک ءَ چہ آشوب، نپسیاتی ءُ اکلاکی آشوب چیر اِنت
بلے چیری ءِ وجہ زانگ نہ بیت۔
“تم جہاں کے ہو واں کے ہم بھی ہیں” اگاں مردم میر ءِ اے شیر ءِ جدلیات ءَ بِہ پھم اَنت گڑا چہ ایشی ءَ ھما آشوب کہ کیت، آ مارکس ءِ آشوب ءَ چہ سک باز مزن بیت۔ اے شر اِنت کہ انسانانی گیشتری اے جدلیات ءَ را نہ پھم اِیت ءُ ھمے واستا میر ءِ ھیال ءَ اتکگیں آشوب بِھ نہ اِت اوں، بلے بھرھال لبزانک ءِ کار وَ ھمیش اِنت کہ آ انسانانی دیم ءَ آشوب ءِ نوک ءَ چہ نوکتریں رنگ بیار اِیت ءُ آشوب ءِ مانا ءَ مستر ءَ چہ مستِر بکنت۔ یک مزنیں لبزانتے یک مزنیں آشوبی ءِ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-