بلوچستان ءِ دمگ کیچ دشت ءَ پاکستانی پوج ءُ بلوچ آجوئی لوٹوکیں سلاھبندیں سرمچارانی میان ءَ ٹوھیں میڑے بوتگ ، چریشی ءَ ھردو نیمگاں جانی تاوان ءِ ھال انت ۔
دمگی اھوالکارانی رد ءَ اے میڑ دشت کنچتی کراس ءِ نزیک ءَ ھما وھد ءَ بندات بوتگ وھدیکہ پاکستانی پوج ءِ چاردہ گاڑیانی کاروان ءِ گوزگ ءَ بوتگ کہ اناگت ءَ پاکستانی پوج ءُ سلاہ بندیں مردم دپ کپتگ انت ءُ گڈا ھر دو نیمگاں تیرگواری بندات بوتگ کہ تیرگواری ءِ درچ بازیں اداراں تاں برجاہ بوتگ ۔
اھوالکارانی رد ءَ میڑے میان ءَ دو بلوچ سرمچارانی نمیرانی ءِ ھال انت وھدیکہ بازیں پوجی کارمندے مرتگ ءُ زدگ بوتگ انت ۔ بلے تنی وھدی اے درگت ءَ سرجمیں کچ دیم ءَ نہ اتکگ ۔ ناکہ بلوچ سلاہ بندیں گلانی نیمگ ءَ تنی وھدی اے درگت ءَ درشان دیگ بوتگ ۔