مستونگ ءَ زورانسری بیگواھیں مردمے دیم ءَ آرگ بیتگ ءُ نوشکی ءَ یک مردمے یل بیتگ

مستونگ ءَ کاؤنٹر ٹیررازم ڈیپارٹمنٹ ( سی ٹی ڈی) ءِ دست ءَ زورانسری بیگواہ بیتگیں پریس کلب ءِ چوکیدار حاجی شاھد اھمد دیم ءَ آرگ بیتگ ءُ نوشکی ءَ چار ماھاں پیش بیگواھیں مردمے یل کنگ بیتگ –

دمگی ءِ رد ءَ دو ستمبر ءِ شپ ءَ سی ٹی ڈی ءِ کارندھاں بیڑ برتگ ءُ حاجی شاھد احمد آوار جتگ ءُ ناشناسیں جاھے ءَ برتگ۔ اے وئیل ءَ پد اھوالکار ءُ ھاندان ءِ مردماں آئی ءِ یل کنگ ءِ ھاتر ءَ یکشلیں جھد کتگ ءُ آمیدگس ءَ شتگ انت-

آمید گس ءِ پرمان ءِ پد ءَ سی ٹی ڈی ءَ آئی ءَ را سینٹرل جیل ءَ برتگ بلے سی ٹی ڈی ءِ کارندہ ءِ شکایت ءِ سر ءَ آئی ءِ ھلاپ ءَ ناشرکاری ءِ جتا جتائیں سنگینیں کیس نبشتگ کنگ بوتگ اَنت۔

ھاندان ءِ گشگ اِنت کہ شاہد احمد ءِ دیم ءَ آرگ ءَ ابید ھم جیل ءِ واکدار آئی ءَ گوں گند ءُ نند کنگ ءِ اجازت نہ دیگ ءَ اَنت کہ ایشی ءِ سبب ءَ آئی ءِ جان سلامتی ءِ ھاتر ءَ ترس انت-

ھمے وڑ ءَ چار ماہ ءَ پیش نوشکی ءِ جھمنندیں طارق بلوچ یل بیتگ ءُ وتی لوگ ءَ سر بیتگ-

کھول ءِ رد ءَ طارق بلوچ چہ لوگ ءَ چار ماہ پیش سیکورٹی پورس ءَ آوار جتگ ءُ برتگ ءُ پد ءَ آئی ءِ بارو ءَ ھچ اھوال نہ بیتگ انت ءُ آ گوستگیں شپ ءَ یل بیتگ ءُ وتی لوگ ءَ سر بیتگ-