پاکستانی پوج ءِ کُشگ بیتگیں کارندھانی نماز جنازہ ءِ بھر زیرگ ءَ تھکاری وزیر تربت ءَ سر بیتگ،اُرش ءِ واری بی ایل اے ءَ منّ اِتگ

دوشمبے ءِ روچ ءَ کیچ ءِ دمگ مند ءَ پاکستانی پوج ءِ سر ءَ بیتگیں بمب تراک ءَ کُشگ بیتگیں کارندھانی نماز جنازہ ءِ بھر زیرگ ءَ وفاقی تھکاری وزیر محسن نقوی اے وھد ءَ تربت ایف سی ھیڈکوارٹر ءَ ساڑی اِنت-

سرکاری اِھوالکار ءِ رِد ءَ کمو وھد ءَ ساری وفاقی وزیر ھاسیں بالگردے ءَ چہ ایف سی بلوچستان ساؤتھ ءِ ھیڈکوارٹر تربت ءَ سر بیتگ، آ کسانیں تر ءُ تابے ءَ پوج ءِ کارندھانی نماز جنازہ ءِ وانگ ءَ پد واتر روت-

دومی نیمگ ءَ اے اُرش ءِ زمہ واری بلوچ لبریشن آرمی ءِ جارکش جیئند بلوچ ءَ منّ اِتگ-

جارکش ءَ گوشتگ بلوچ لبریشن آرمی ءِ سرمچاراں مروچی کیچ ءِ دمگ مند ءَ شند ءِ ھند سر ءَ زورگریں پاکستانی پوج ءِ 125 ونگ ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءِ نشانگ کتگ- تراک ءَ زورگریں پوج ءِ کیپٹن وقار کاکڑ، نائیک جنید، نائیک عصمت، لانس نائیک خان محمد ءُ سپاھی زھور احمد ءَ ھوار ھشت کارندہ کشتگ اَنت-

جارکش ءَ گوشتگ کہ بی ایل اے ءِ سرمچاراں شمبے ءِ روچ ءَ مستونگ ءِ دمگ مَرو ءَ زورگریں پاکستانی پوج ءِ پیادگ کارندہ ءَ ھما وھد ءَ نشانگ کتگ وھدے آ کھر ءِ ھند سر ءَ پیشکدمی کنگ ءِ جُھد ءَ بیتگ اَنت- سرمچاراں سنگر گپتگ ءُ زورگریں پوج ءِ کارندہ نشانگ کتگ اَنت چریشی ءِ آسر ءَ آیاں تاوان چست کنگ کپتگ، وھدے کہ آ دگہ کارندہ وتی ھمراہ یل داتگ ءُ تتکگ اَنت-

جارکش ءَ گوشتگ دگہ یک کاروائی یے بلوچ لبریشن آرمی ءِ سرمچاراں جمعہ ءِ شپ ءَ نوشکی شھر ڈی سی کارگس ءُ آئی ءِ کش گوراں زورگریں پاکستانی پوج ءِ نیمگ ءَ چہ کش ءُ گوراں جتگیں کیمرہ نشانگ کتگ ءُ تباہ کتگ اَنت- اے میان ءَ زورگریں پوج ءَ کواڈ کاپٹر ءِ کارمرز کتگ، کہ سرمچاراں جتگ ءُ دور داتگ- ھمے وھدے لیویز سرمچارانی دیم ءَ اَڑان بیگ ءِ جُھد کتگ، چریشی ءَ سرمچاراں پسّھی اُرش کنان ءَ آ ھم نشانگ کتگ اَنت-

جارکش ءَ گوشتگ بلوچ لبریشن آرمی پیسر ءَ تچک کتگ گوشتگ کہ لیویز ءُ پولیس فورس ءِ بلوچ گیشتریں فورس بیگ ءِ سبب ءَ آیانی ھیال داشتگ، بلے اگاں اے فورس سرمچارانی راھاں اڑان جوڑ بنت گُڑا آیانی ھیال دارگ ھلاس کنگ بیت-

جارکش ءَ گوشتگ بلوچ لبریشن آرمی اے اُرشانی زمہ واری منّ اِتگ ءُ دُژمن ءِ سر ءَ تُرندیں اُرش ءِ کول کن ایں- بلوچ راج ءِ آجوئی ءِ وتواجھی ءَ تاں مئے سلاہ بندیں جُھد برجاہ بنت ءُ زورگریں پوج ءَ ھرچ پڑ ءَ بے سوبی ءِ پروش ءِ دیمپانی کنگ کپ اِیت-