بھرام جان بے ترا میتگ ویران اِنت
نبشتہ:کار آئشہ بلوچ
دی بلوچستان پوسٹ
بھرام جان تو زان ئے من ھرچی پہ ترا نبشتہ بکناں انگت کم اِنت منی کر ءَ چُشیں گال نیست کہ تئی ستا ءَ بکناں، بلے داں چیزے نبشتہ مکناں منی دل نہ سھڑ اِیت ھمے واستا پہ ترا دو پرشتگیں گال نبشتہ کنگ ءَ آں۔
بھرام جان وھدے من ءَ ھال رس اِت کہ ھونواریں رستر ءَ ترا اچ ما پُل اِتگ ءُ شھید کتگ منی سر ءَ آزمان لُمب اِت ءُ کارچے منی جگراں ایر کپت من نہ زانت چی بکناں بگر چہ گریوگ ءَ دست ءَ دگہ ھچ نہ بیت، بلے چی کنیں بھرام جان انی بلوچ ءِ ھرچ گِس ھمے آس ءَ سُچگ ءَ اِنت، بلے ھمینچُک ھم منی دست ءَ نہ بوت کہ تئی گڈی دیدار ءَ بیا آں۔
من نہ زاناں چتور تئی پیریں مات ءِ ارساں پھک بکناں، من نہ زاناں چتور تئی سمُّل جان ءَ بہ سھڑیناں من نہ زاناں چتور تئی گھارُکاں تسلہ بدیاں من نہ زاناں چتور تئی براتُکاں بچاراں کہ چتور تہ ءَ پرُشتگ اَنت، ترا درستانی گم پر اَت ترا درستانی ھیال گْور اَت تو مھکم اِت ءُ ترا درستانی زمہ داری سر ءَ اَت، نی تئی جاگہ ءَ کس گپت نہ کنت پُل
ما نی کجا چہ بیار ایں تئی وڑیں مھروانے ءُ مھکمیں مردمے؟
بھرام جان اے میتگ دژمناں ویران کت ءُ مارا درستاں تکو تکو ءُ یک یک کت ءُ جتا کت چہ شما دیر ءُ گستا کت میتگ ویران بوت۔
بلے اے میتگ تو پد ءَ آباد کت سینگار اِت شوک کت، ترا چہ پد میتگ پد ءَ ویران بوت تو میتگ ءِ براہ اِت ئے، تو میتگ ءِ شان اِت ئے، میتگ تو زیبا کتگ اَت نی میتگ ءَ کے آباد کنت؟ نی میتگ ءَ کے سینگار اِیت؟ کے اِنت کہ بیت میتگ ءِ براہ؟ کے اِنت کہ بیت میتگ ءِ شان؟
مدام دل ءَ ھمے ھیال کیت کہ اے ھال دروگے راستے نہ اِنت، تئی شھیدی ءِ ھال دروگے من وابے گندگ ءَ آں، بلے بھرام جان اے درست انچیں ھیال اَنت دل ءَ کاینت، اے ھال تھلیں راستے، دریگتیں راستے مہ بوتیں دریگتیں دروگے بوتیں، دریگتیں وابے بوتیں۔
بھرام جان بگر چہ یاتاں دگہ ھچ پشت نہ کپتگ نی ما ترا گوں یاتاں یات کنین ءُ زندگ بئیں، مرچی پد ءَ درستیں یات پیداک اَنت ءُ دیم ءَ گوزگ ءَ اَنت کہ چتور ھور ءَ کند اِتگ، ءُ چتور ھور ءَ لیب کتگ دریگتیں پد ءَ ھما وھد بیاتکیں۔۔۔۔
بھرام جان تو وَ شھید بوت ئے گوں ھُوراں لیب کنگ ءَ ئے، بلے مئے جگراں آس کپت اے انچیں آسے کہ مرگ ءِ نام ءَ نہ زانت ھاوند مئے دل ءَ سبرے بیارات ءُ مارا مھکم کنات ءُ دژمن ءِ دپ جور بات انچش کہ مئے گِس ءَ آس روک اِنت، انچش دژمن ءِ گِس ءَ آس روک بات، انچش کہ تئی مات ءِ جگر آپ اَنت انچش دژمن ءِ مات ءِ جگر آپ بات اَنت-
وھدے من تئی یات ءَ آن ءُ گریوگ ءَ آں یک بر ءَ دل ءَ ھمے ھیال کیت جیڑاں کہ آ روچی ایوک ءَ مئے گِس ءَ آس نہ کپتگ بلکیں دگہ دو لوگ ھم ھمے آس ءَ سُچگ ءَ اِنت ءُ دگہ دو مات ءِ جگراں آس روک اِنت، دگہ دو گھار ءِ جگر آپ اَنت، دگہ دو برات ءِ کوپگ پُرشتگ، بلکیں ھمُک روچ بلوچستان ءَ ھرچ گِس ءَ اے آس روک اِنت ءُ روک بیگ ءَ اِنت۔
ترا چہ پد دل نہ گُش اِیت ءُ پاد ھم نہ بر اَنت کہ کوہ ڈگار ءَ بہ رواں، من چار اِت نہ کناں تئی سمل ءِ جان ءِ چماں، من چار اِت نہ کناں تئی گونڈوکیں خطاب جان ءِ گونڈوکیں دیم ءَ کہ بے ترا خطاب چتور اِنت، من چار اِت نہ کناں تئی میتگ ءُ دیاراں۔ بے ترا کوہ ڈگار ھچ وش نہ اِنت ارواہ اڑے تئی شوکیں بچکنداں تئی وشیں آواز ءَ تئی وشُکیں گپاں چہ کجا بیار ایں؟
بھرام جان گلہ مہ کن کہ من تئی گڈی دیدار ءَ نیتکاں، تو شرتر سرپد ئے کہ دژمناں مارا چتور چہ شما جتا کتگ ءُ چہ شما دیر کتگ ءُ راہ در بستگ اَنت، دگہ من پہ تئی دیدار ءَ تلوستگاں۔
ترا من سھرچکیں دْروت ندر کناں ارواہ ترا شھیدی مُراد بات پُل من پھر بنداں کہ من شھیدے ءِ گھاراں تو ھست ئے ءُ تو نمیران ئے، مئے دلانی تہ ءَ ابد مان ئے۔تئی جاگہ ماں باگیں بھشت ءَ بات ءُ چہ منی نیمگ ءَ درستیں شھیداں سلام کن۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-