بلوچستان ءَ پاکستانی پوج ءُ چیریں ادارھانی چیردستی ءَ کارکنوکیں سلاہ بندیں ٹولیانی سر ءَ بلوچ آجوئی لوٹوکانی اُرش یکشل ءَ برجاہ

بلوچستان ءَ پاکستانی پوج ءُ چیریں ادارھانی چیردستی ءَ کارکنوکیں ڈیتھ اسکواڈ ءِ کارندھانی سر ءَ بلوچ آجوئی لوٹوکیں سلاہ بندانی نیمگ ءَ اُرش یکشل ءَ برجاہ ءَ اَنت-

زانگ بہ بیت ڈیتھ اسکواڈ ءِ کارندھانی سر ءَ ھمے بھتام اِنت کہ آ پاکستانی پوج ءُ آئی ءِ چیریں ادارھانی چیردستی ءَ بلوچ ورنایانی آوار جنگ، آیاں تیرانی آماچ کنگ، دُزی ءُ ڈنگی، زر گرگ ءَ اَبید دگہ چاگردی سلکاریاں ھوار اَنت –

دو روچ ساری ءَ یکیں روچ ءَ مند ءُ گومازی ءَ سے ورنا تیرگواری ءِ نشانگ کتگ ءُ کُشتگ اِت اَنت کہ دمگی مردمانی رِد ءَ کشوکانی سیادی گوں ڈیتھ اسکواڈ کارندھاں چہ بیتگ اَنت-

ھمے وڑ بلوچ آجوئی لوٹوکیں سلاہ بنداں گلاں ڈیتھ اسکواڈ ءِ کارندھانی سر ءَ وتی اُرش تُرند کتگ اَنت-

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ ھپت ستمبر ءِ بیگاہ ءَ بلوچستان لبریشن فرنٹ ءِ چیریں ونگ ءِ ھالانی دیگ ءَ تربت ءِ دمگ سنگانی سر ءَ منیر مبارکی ءِ مھمانجاہ ءَ زورگریں پاکستانی پوج ءِ چیریں ونگ ملٹری انٹیلیجنس ءِ کارندھانی یک مُچی یے بیگ ءَ اِنت اے ھال ءِ سر ءَ سرمچاراں بیگاہ ءِ چار چل ءَ منیر مبارکی مھمانجاہ ءِ سر ءَ اُرش کتگ – سرمچارانی سر بیگ ءَ لھتے دمان ءَ ساری مُچی ھلاس بیتگ ءُ ایم آئی ءِ لھتے باسک یک گاڑی ءَ دراھگ ءَ سوبمند بیتگ اَنت بلے سرمچاراں کاروائی کنان ءَ ملٹری انٹیلیجنس ءِ کارندہ مستی ھان ء منیر مبارکی ءُ معصیب ء حاصل تیرگواری کتگ ءُ کُشتگ اَنت ءُ آیانی گاڑی مانداشتگ اَنت-

جارکش ءَ گوشتگ کہ ایم آئی ءِ اے کارندہ تربت شھر ءَ بے میاریں بلوچاں، ھاسکار ورنایانی نگاہ ءِ دارگ، زورانسری آوار جنی، ءُ رسانکدر ءَ پُرکار ورنایانی لوگاں بیھار دیگ ءُ تُرسینگ ءَ ھوار بیتگ اَنت- اشی ءَ اَبید آیانی ھلاپ ءَ تربت شھر ءَ دُزی ءُ ڈنگی وڑیں میاباری ھوار بیگ ءِ تُرندیں منانک گل ءِ گور ءَ ھست اَنت کہ آیانی پشدر ءَ آ نشانگ کتگ ءُ کُشتگ اَنت-

جارکش ءَ گوشتگ کہ دگہ یک کاروائی یے ھپت ستمبر ءَ کساس شپ ءِ یازدہ ءُ دوازدہ ءِ میان ءَ بی ایل ایپ ءِ سرمچاراں سوراب ءَ سی پیک دگ، بائی پاس سر ءَ بلوچستان ءَ چہ پنجاب ءَ واستا گیس بروکیں دو بوزر گاڑی نشانگ کتگ اَنت، چریشی ءِ آسر ءَ دوئیں گاڑیاں تاوان رس اِتگ، وھدے کہ سرمچاراں دوئیں گاڑی ڈرائیور دزگیر کتگ ءُ وتی ھمراھی ءَ برتگ اَنت-

جارکش گوشتگ کہ بلوچستان لبریشن فرنٹ سنگانی سر، تربت ءَ ملیٹری انٹیلجنس ءِ دو کارندھانی کوش ءُ سوراب ءَ گیس بروکیں بوزر گاڑی نشانگ کنگ ءِ زمہ واری ءَ منّ ایں-