بلوچستان: بی این پی ءِ جار ءِ پد ءَ ھرتال، انٹرنیٹ سروس بند

بی این پی مینگل ءِ جار ءِ پد ءَ سرجمیں بلوچستان ءَ مروچی بزاں دو ستمبر ءِ ویل ءِ ھلاپ ءَ دگ بند ءُ تھتک بندیں ھرتال ءِ جار پرینگ بیتگ-

چریشی ءِ پژدر ءَ بلوچستان ءِ بنجاھی شھر شال ءَ ھوار کلات، ھزدار، نوشکی، پنجگور ءُ کیچ ءَ ھوار دگہ جاھاں ھرتال انت ءُ دگ بند، دکان ءُ دگہ واپاری بنجل ھم بند انت-

ھرتال ءِ سبب ءَ دگانی سر ءَ گاڑیانی روگ ءُ آیگ ءُ وپاری پرکای مھتل انت-

ھرتال ءِ میان ءَ شال ءِ بازیں جاھاں پولیس ءَ زھرشانی کنوکانی سر ءَ آنسو گیس شیلنگ ءُ تیرگواری کتگ انت ءُ کہ چریشی ءِ سبب ءَ بازیں جاھاں زھرشانی کنوکانی ٹپی ءُ دزگیریانی ھال ھم دیم ءَ اتکگ انت-

سرکار ءَ زھرشانیانی گر ءُ دار کنگ ءِ ھاتر ءَ بازیں شھراں انٹرنیٹ سروس بند کتگ انت ءُ پولیس ءَ زھرشانی کنوکانی سر ءَ تچک ءَ تیرگواری ھم کتگ انت-

بی این پی ءِ بنجاھی ڈپٹی سیکرٹری ملک نصیر احمد شاھوانی،ملک رفیق شاھوانی، لالا ظفر مینگل، عبدالمنان محمد حسنی ءَ ھوار بازیں باسک دزگیر کتگ انت-

ھمے وڑ ءَ شال ءَ دو ستمبر ءَ شاھوانی اسٹیڈیم ءَ بیتگیں تراک ءَ زدگ بیتگیں بی این پی ءِ باسک ڈاکٹر نور احمد مینگل ءَ ٹپانی درد نہ سگ اتگ ءُ بیران بیتگ-

زانگ بہ بیت دو ستمبر ءَ سردار عطاء مینگل ءِ سالروچ ءِ درگت ءَ برجمیں مچی ءَ یک وتکش تراکے بیتگ ات کہ چریشی ءَ پانزدہ مردم بیران ءُ سِی ءَ گیش ٹپی بوتگ ات اَنت-

چرے ویل ءِ ھلاپ ءَ بی این پی ءَ جار جتگ ات کہ ھشت ستمبر ءَ اے ویل ءِ ھلاپ ءَ دگ بند ءُ تھتک بندیں ھرتال کنگ بیت انت ءُ ایشی ءِ ھواری ءَ بازیں پاٹیاں بی این پی ءِ ھرتال ءِ پلامرزی کتگ –

ھمے وڑ ءَ مند ءَ ڈیتھ اسکواڈ ءِ تیرگواری ءَ بیران بیتگیں ازھار ءُ ملا بھرام ءِ کوش ءِ ھلاپ ءَ مروچی دومی روچ ءَ ھم ھرتال انت ءُ دکان ءُ وپاری بنجل بند انت-