اِزھار منی ارواہ
نبشتہ کار: مھاز ھمل
دی بلوچستان پوسٹ
بنی آدم ءِ سر ءَ ھر وڑیں ھزاراں وئیل کپ اِیت ھما وئیل کہ تئی گمان ءَ در بہ بنت کہ آیانی تہ ءَ لھتے سان داں اُمرے ءَ داں اِنسان ءِ مجگ ءَ ایر بنت، وتی جند ءِ ساہ ءَ اناگت ءَ سدگ ءَ گندگ ھما tragedy اِنت کہ اِنسان آئی ءَ چہ ھچبر درآتک نہ کنت۔
مردماں گوں ھبر کنگ، سیادانی پجا آرگ، کسے ءِ میتگ ءَ روگ، چُشیں چیز من ءَ کسانی ءَ چہ دوست نہ بیت ءُ تنیگتا ھم نزاناں گپ چوں دیم ءَ برگی اِنت۔ ھمے واست ءَ من وتی زند ءِ تہ ءَ باز کم مردم ءَ گوں دچار کپتگ آں ھما کمیں مردمانی تہ ءَ ھم منی تب ءِ مردم من ءَ دست نہ کپتگ من وت ھم نہ زاناں کہ من چونیں تب ءِ مردمے آں۔
اگاں کسے منی تب ءَ لگ اِتگ آیانی تہ ءَ یکے اِزھار اَت۔ اِزھار ءَ من چہ کسانی ءَ زاناں ما دوئیں یکیں میتگ ءَ لَیب ءُ گوازی کُتگ ءُ رُستگیں، یکیں جاگہ ءَ ونتگ، من چو نہ زاناں ما کدی، کجا ءُ چون دچار کپتگ ایں، اولی گپ ءُ ھبر چے بیتگ انت بلے اِزھار یکیں مردم اَت کہ منی تب ءَ سرپد ات ءُ من آئی ءِ تب ءَ، وھد گوزان ات اَنت ما سَک نزیک بوتیں ءُ مئے ھردوئینانی نیام ءَ یک سیادی یے ودی بوت ھما سیادی کہ آئی ءِ تہ ءَ گم ءُ وشی ءَ ھوار ھِچ چیز چیر مہ بیت، یک ءُ دومیگ ءِ گپ ءُ ھیالاں پوہ بَیگ ءُ چیزانی سر ءَ وتی ھیالاں درنگاز کنگ۔ برے برے من آ دیستگ ھیران بیتگ آں کہ اے چونیں مردمے کہ ھر چیز ءِ گوں ھیرتی ءَ چار اِیت ؟ءُ آئی ءَ چونیں سَگ ءُ اوپار ئِے گون ھر وڑیں جاوراں گوں بچکندگ ءَ اِنت۔مدام وتی کارانی تہ ءَ دزگٹ اَت شپ ءُ روچ دکان ءَ کپتگ اَت، بس یکیں آدینگ ءِ بیگاہ ءَ دزگٹ نہ ات ءُ ما کوہ ءَ چاہ ءِ اڈ کنگ ءَ شُتیں، اگاں گیشیں وھدے رستگ ات کتاب ءُ آرٹیکل ونت ئِے۔
آئی ءَ گوں زمین ءَ بے کساس مھر اَت ھمے مھر اَت کہ اِزاھار ءِ باسما کتگ اَت ءُ آئی ءَ زمین ءِ ھر چیز ءَ گوں مھر اَت گوں سُرمگیں کوھاں،گوں درچک ءُ داراں ، زمین ءِ سر ءَ ساہ کشوکیں مُرگ ءُ دلوتاں، مردماں گوں ھر کس ءَ مھر اَت ئِے، تو ھر وھد ءَ دیست گوانکو یے گون اَت ئِے زمین ءِ اَکس ءُ تامر کَشگ ءَ اَت آئی ءَ مدام لوٹ اِت کہ من سپر بہ کناں وتی زمین ءِ ھمک ھند ءُ جاگھاں بہ گنداں بلے پہ نیزگاری گوں زند ءِ جھل ءُ برزیاں دزگٹ اَت ھمے دزگٹیانی سبب ءَ آئی ءِ دیم ءَ وانگ ھم برجم داشت نہ کت بلے آ گوں وتی رژنائیں چماں ھزار واب گندگ ءَ اَت، آئی ءَ پہ اے ایردستیں چاگرد ءَ ھزاراں آجوئیں واھگ دل ءَ اَت۔
اِزھار کسانیں اُمر ءَ گوں زند ءِ ھر تک ءُ پھنات ءَ شرّی ءِ سر ءَ سرپد اَت آئی ءَ زانتگ اَت کہ انسان ءَ وتی اُمر نا بلکیں کردار مزن کنگی اِنت چیا کہ مرگ ءَ رند کردار زندگ بنت ءُ کردار مردم ءَ نمیران کن اَنت، آئی ءِ ھمے ھیال ءُ پگر ءَ آ مدامی نمیران کُت ءُ ھما زمین ءَ وتی امبازاں زرت کہ آئی ءَ بے کساس مھر اَت ھمے واستا ازھار ءَ وتی اِنستا ءِ بایو ءَ جتگ ات کہ-
“پھمگی اِنت زند مارا ھردوکاں”
“کِرد مارا مرگ ءَ پد زندگ بہ کنت”
مھر ھما بہ بیت کہ گُشگ مہ بیت، اے ھما مھر اِنت کہ گوں من گُشگ نہ بیگ ءَ اِنت۔ ھیال گوں پُرشتگیں لبزاں نبشتہ نہ بنت ءُ ھمے پشت کَپتگیں ھیال اَنت کہ مارا دوبر نبشتہ کَنگ ءُ دیم ءَ جنزگ ءِ سکین ءَ دے اَنت۔جان! من زاناں ترا پہ منی چاہ ءَ زھیر کنگ ءَ اِنت بلے من ءَ پہ تو۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-