بلوچستان ءَ پاکستانی پوج ءِ سر ءَ اُرشانی دْرچ یکشل ءَ برجاہ واکدار ءَ پوجیانی بیرانی ءِ گپ راست کتگ

بلوچستان ءَ پاکستانی پوج ءِ سر ءَ اُرشانی دْرچ یکشل ءَ برجاہ ءَ اِنت ءُ پاکستانی پوج ءِ وتی کارندھانی بیرانی ءِ گپ راست کتگ-

بلوچستان ءِ دمگ کیچ ءِ ھند زامران، نوانو ءَ یکشمبے ءِ روچ ءَ پاکستانی پوج ءِ سر ءَ اُرش ءَ ھپت کارندھانی بیرانی پدری-

واکدار ءَ راست کتگ گوشتگ کہ 146 ونگ، نوانو سیکٹر ءَ یک آئی ای ڈی تراکے ءِ آسر ءَ ھپت کارندہ بیران بیتگ اَنت- بیران بیتگیں کارندھانی پجّار نائیک طاہر، نائیک بلال، سپاھی تحسین، لانس نائیک رب نواز ءُ سپاھی منیر ءُ دگر ءِ نام ءَ چہ بیتگ اَنت وھدے کہ تراک ءَ دو کارندہ سپاھی زین اظہر ءُ سپاھی علی زمان ٹپی بیتگ اَنت-

دومی نیمگ ءَ اے اُرش ءِ زمہ واری بلوچ لبریشن آرمی ءَ منّ اِتگ

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشگ کی سرمچاراں زامران ءُ کلات ءَ دو جتاجتائیں اُرشاں زورگریں پاکستانی پوج ءِ دہ کارندہ کُشتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں مروچی کیچ ءِ دمگ زامران ءَ نوانو ھند ءِ سر ءَ زورگریں پاکستانی پوج ءِ کاروان ءَ ھوار یک گاڑی یے ھما وھد ءَ ریموٹ کنٹرول آئی ای ڈی اُرش ءَ نشانگ کتگ اَنت وھدے زورگریں پوج دمگ ءَ زوراکی ءَ پد واتر آیگ ءَ بیتگ- تراک ءِ آسر ءَ زورگریں پوج ءِ گاڑی سرجمی ءَ تباہ بیتگ وھدے کہ اشی ءَ سوار سرجمیں نُھ کارندہ جاہ پہ جاھی مرتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں گوستگیں روچ ءَ کلات ءَ مورگند ءِ ھند سر ءَ زورگریں پوج ءِ پوسٹ سلاہ بندیں اُرش ءِ نشانگ کتگ – اُرش ءَ زورگریں پوج ءِ یک کارندھے جاہ پہ جاھی مرتگ ءُ دگہ دو ٹپی بیتگ اَنت-

جارکش ءَ دیمتر ءَ گوشتگ کہ بلوچ لبریشن آرمی اے اُرشانی زمہ واری ءَ منّ اِیت ءُ دُژمن ءِ سر ءَ گیش تُرندیں اُرش کنگ ءِ اِھد کنت-