بلوچستان ءَ زورانسری آوار جنی ءِ دْرچ ءِ برجاھی ءِ ھمراھی ءَ زھرشانی ءُ نندانک درچ ھم برجاہ اَنت

بلوچستان ءَ زورانسری آوار جنی ءِ دْرچ ءِ برجاھی ءِ ھمراھی ءَ کراچی ءُ اسلام آباد ءَ بیگواھیں مردمانی کھول ءِ نندانک ھم برجاہ اَنت-

زانگ بہ بیت بلوچستان ءَ چُشیں روچے نہ اِنت کہ مردم بیگواہ کنگ نہ بیگ ءَ اِنت ھمکروچ زورانسری آوار جنی ءِ کیس دیم ءَ آیگ ءَ اَنت پاکستانی پوج ءُ آئی ایس آئی، سی ٹی ڈی ءُ دومی نیمگ ءَ پاکستانی پوج ءِ چیردستی ءَ کارکنوکیں ڈیتھ اسکواڈ ءِ ٹولی کارندہ مردماں آوار جنگ ءُ بیگواہ کنگ ءَ اَنت ءُ ھمے میان بازیں بیگواھیں مردمے ءِ تیرسُپتگیں لاش دزکپتگ اَنت-

ھالانی رِد ءَ بلوچستان ءِ دمگ ڈیرہ بگٹی ءَ کاؤنٹر ٹیررازم ڈپارنمنٹ ءُ چیریں ادارھانی کارندھاں علی حسن ء حاجی بگٹی ءُ کلیرو ء لیوی بگٹی آوار جنگ ءَ پد بیگواہ کتگ اَنت-

پاکستانی پوج ءَ آوار جنگ ءَ پد دوئیں مردم انگت دیم ءَ آرگ نہ بیتگ اَنت-

ھمے وڑ چہ کراچی ءِ دمگ ملیر کلا بورڈ صدیق ویلیج ءَ کاؤنٹر ٹیررازم ڈپارنمنٹ ءِ دست ءَ دزگیری ءَ پد زورانسری آوار جنی ءِ نشانگ بیتگیں صادق مروچی یل کنگ بیتگ-

زانگ بہ بیت صادق مراد گوستگیں ماہ ءَ بیست سے اگست ءَ زورانسری آوار جنی ءِ نشانگ کنگ بیتگ اَت ءُ کھول ءَ پریس کلب دیم زھرشانی کتگ ءُ آئی ءِ یل کنائینگ ءِ لوٹ کتگ اَت-

ھمے وڑ کراچی ءَ پریس کلب ءِ ڈن زورانسری بیگواھی ءِ ھلاپ ءَ جتگیں زھرشانی بُنجل سی یکمروچی ءَ پُترتگ، تُرندیں گرم ، ھکومت یکو دلجمی دیگ ءُ بے کساس دلسیاھی ءَ اَبید بیگواھیں مردمانی کھول وتی دوستانکانی یل کنائینگ ءِ لوٹ ءِ سر ءَ اوشتاتگ اَنت-

اے میان ءَ چہ ملیر ءَ زورانسری آوار جنی ءِ نشانگ بیتگیں صادق مراد ءِ یل بیگ ءُ لوگ ءَ واتری ءِ گپ زھرشانی بُنجل ءَ ھواریں کھولانی واستا یک ھدے ءَ چہ اُمیت ءِ سبب جوڑ بیتگ-

آئی ءِ یل بیگ بلوچ نودربر زاھد بلوچ ءِ پت عبدالحمید بلوچ ءِ وشی درشان کنان ءَ گوشتگ کہ صادق مراد ءِ یل بیگ مارا ھوسلہ دنت آ دگہ ورنا ھم بے میار اَنت یکروچے الّم واتر کاینت-

عبدالحمید بلوچ ءِ گوشگ اِنت کہ مئے سرجمیں بیگواھیں مردم بے میار اَنت ءُ آ بے سبب ءَ آزار جاھاں بندیگ کتگ اَنت-

آئی ءَ ھکومت ءُ ریاستی ادارھاں چہ لوٹ کتگ کہ سرجمیں بیگواھیں ورنایاں زوت یل کنگ آمیدگس ءَ پیش بہ کن اِت دانکہ آیانی سر ءَ جتگیں بھتام پدر بہ بنت-

زانگ بہ بیت کراچی ءِ جتاجتائیں دمگاں چہ بازیں بلوچ ورنایے زورانسری آوار جنی ءِ نشانگ کنگ بیتگ اَنت، آیانی تہ ءَ کلری لیاری، ماری پور ءُ لال بکھر ھاکس ءَ سیادی داروکیں زاھد بلوچ، شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رحمان بلوچ ھوار اَنت-

ھمے وڑ چہ ملیر ءِ دمگ ءَ میر بالاچ بلوچ ھم بازیں ماھاں چہ بیگواہ ءَ اِنت-

دومی نیمگ ءَ اسلام آباد ءَ بلوچ بیگواھیں مردمانی کھول ءُ بلوچ یکجھتی کمیٹی ءِ دزگیریں سروکانی کھول ءِ نندانک مروچی پنجاہ یکمروچ ءَ پُترتگ-

اے درگت ءَ کھول ءُ بلوچ یکجھتی کمیٹی ءِ نیمگ ءَ چہ یک روانکے کشگ بیتگ، اود ءَ بیگواھیں مردمانی کھول، نودربر، سول سوسائیٹی ءِ باسک ءُ جتاجتائیں پڑ ءَ سیادی داروکیں مردماں بھر زرتگ-

تُرندیں ھور ءَ اَبید زالبول، کماش ءُ چُکاں ھوار زھرشانی کنوکاں اسلام آباد ءِ دگانی سر ءَ پُرایمنیں روانکے کش اِتگ-

زھرشانی کنوکانی دست ءَ پلے کارڈز بیتگ آیانی سر ءَ چہ بلوچستان ءَ دزگیریں سیاسی رھشونانی یل کنائینگ، سیاسی ایف آئی آر ءِ ھلاس کنگ ءُ زورانسری آوار جنی بیتگیں مردمانی یل کنائینگ لوٹ نکش بیتگ اَنت-

اے درگت ءَ بلوچ بیگواھیں مردمانی کھولاں تران کنان ءَ گوشتگ کہ ھپت ھپتگ ءَ چہ گش اِیت ما ھور ، روچ ، گرم ، بیھار ءُ تُرسینگ ءَ اوپار کنگ ءَ ایں وتی دوستناکانی یل کنائینگ ءِ ھاتر ءَ توار چست کنگ ءَ ایں بلے ریاستی ادارھاں مئے لوٹانی سر ءَ دلگوشی دیگ جاہ ءَ مارا نیشنل پریس کلب ءَ روگ ءَ نہ اشتگ-

آیاں گلہ کتگ اے میان ءَ آیاں پجّاری رویشگی دیمپانی، سُر ءُ پُرانی دارگ، ءُ زھرشانی ءَ ھواریں مردماں یکشل ءَ چارگ ءُ تُرسینگ ءَ اَنت-

نندانک ءَ ھوار بیگواھیں مردمانی کھولاں اسلام آباد ءِ سول سوسائٹی ءُ دگہ پڑ مردماں چہ دزبندی کتگ کہ آ اے جُھد ءَ مئے ھمراھداری بہ کن اَنت ءُ رسانکدر ءِ بے تواری ءُ ھمکرانی نہ دلگوشی ءِ ھلاپ ءَ توار چست بہ کن اِت دانکہ آیانی دراجکشیں زھرشانی بے مانا بہ بیت-