بلوچستان ءَ پاکستانی پوج ءُ پُلپانچیں شرکتانی سر ءَ اُرشانی دْرچ چہ بلوچ آجوئی لوٹوکانی نیمگ ءَ یکشل ءَ برجاہ ءَ اِنت-
زانگ بہ بیت بلوچ آجوئی لوٹوکیں گلانی نیمگ ءَ شنگ بیتگیں درشاناں ٹھیکدار ءُ دگہ شرکت کڈن کنگ بیتگ اَنت آ اے پُلپانچیں منسوبھانی بھر مہ بنت آیانی گوشگ اِنت کہ بید بلوچ راج ءَ دگہ کس موکل دیگ نہ بیت-
آیانی اے ھم بھتام اِنت کہ بلوچ راج ءِ دیمروئی نام ءَ پوجی بند ساچی شرکت ءُ دگہ منسوبہ تھنا بلوچ راج ءِ تاوان ءَ دیگ ءَ ابید دگہ ھچ اے تھنا ھمایانی مول ءُ مراد ءِ واستا بیگ ءَ اَنت دانکہ بلوچ چُکچینی ءِ گیش کنگ ءِ ھاتر ءَ آیاں دلسیاھی دیمپانی مہ بیت-
دومی نیمگ ءَ بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ چار ستمبر 2025 ءَ مئے سرمچاراں سھبت پور ءِ دمگ جروار ءَ سرکاری جوڑ بؤکیں منسوبہ ءِ سر ءَ کار کنوکیں پوجی شرکت ءِ گاڑی تیرگواری ءِ نشانگ کتگ اَنت – اے اُرش ءِ آسر ءَ پوجی شرکت ءِ دو ایکسیویٹر مشین تباہ کتگ اَنت-
جارکش ءَ گوشتگ کہ ما دمگی ٹھیکیداراں کڈن کن ایں کہ آ ریاستی منسوبھاں چہ گستا بہ بنت، اگاں ناں آ وتی جانی ءُ مالی تاوان ءِ زمہ واری وت بنت-
ھمے وڑ بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ وتی شنگ کُتگیں درشان ءِ تہ ءَ گوشتگ کہ سے ستمبر 2025 ءَ بی ایل ایف ءِ سرمچاراں سھب ءِ ساھت دہ ءِ نزیک ءَ آواران ءُ جاھو ءِ میان ءَ مجد پیر کراس ءَ زورگریں پاکستانی پوج ءِ کاروان ءِ پھازی ءَ جوڑ کتگیں سنگر ءِ تہ ءَ یک آئی ای ڈی بمبے کل کتگ ۔ 109 ونگ ءِ دو کارمند پروٹکٹ سنگر ءَ سر بیتگ اَنت ، گڑا سرمچاراں بمب گوں ریموٹ کنٹرول ءَ تراکینتگ چہ تراک ءِ آسر ءَ فرنٹیئر کور ءِ دو کارندہ جاہ پہ جاھے مُرتگ اَنت ۔ مُرتگیں کارندھانی پجار رھمت اللّہ ءُ زبیر ءِ نام ءَ چہ بیتگ اَنت ۔
جارکش ءَ دیمتر ءَ گوشتگ کہ بلوچستان لبریشن فرنٹ جاھو ءَ زورگریں پاکستانی پوج ءِ دو کارندھانی کوش ءِ زمہ واری منّ اِیت ءُ اے کول ءَ کنت کہ داں بلوچستان ءِ آجوئی ءَ زورگریں لشکر نشانگ کنگ بیتگ۔
جارکش ءَ گُڈی ءَ گوشتگ کہ اے اُرش ءِ ویڈیو جوڑ کنگ بیتگ زوت چہ گل ءِ رسانکدری چینل آشوب ءَ شنگ کنگ بیتگ ۔