مستونگ ءَ فورسز ءِ ڈرون اُرش ءَ یک مردمے زدگ، پنجگور ءَ تیرسپتگیں لاشے دزکپتگ

بلوچستان ءِ دمگ مستونگ ءَ پورسز ءِ ڈرون اُرش ءَ یک مردمے زدگ بیتگ ءُ پنجگور ءَ تیرسپتگیں لاشے دزکپتگ-

مستونگ ءَ پاکستانی لشکر ءِ ڈرون اُرش ءَ یک مردمے ٹپیگ بوتگ ، ٹپی ءِ مردم نادراہ جاہ ءَ برگ بیتگ۔

گوستگیں شپ ءَ پاکستانی لشکر ءَ مستونگ ءِ دمگ دشت ءَ عمر ڈور ءِ ھند ءَ بی ایچ یو عمر ڈور ءِ نگھپان ءَ را ڈرون (کواڈ کاپٹر) ءَ گوں نشانگ جوڑ کتگ۔ تراک ءَ نگھپان سک ٹپی بوتگ۔

دمگ ءِ نندوکیں مردمانی گشگ ءِ رد ءَ ٹپی ءِ مردم نادراھجاہ ءَ برگ بیتگ بلے انگت ءَ اے درگت ءَ واکداراں ھچ وڑیں ھال ءُ اھوال نہ داتگ۔

زانگ بہ بیت بلوچستان ءِ جتا جتائیں جاھاں ایشی ءَ پیش ھم پورسز ءِ نیمگ ءَ لس آبادی نشانگ کنگ بیتگ انت ءُ چریشی ءِ پژدر ءَ مھلوک ءَ بازیں کچے ءَ زھرشانی ھم کتگ انت-

گوستگیں ماہ ءَ پاکستانی لشکر ءَ کردگاپ ءَ ھیلی کاپٹرانی گون ءَ شیلنگ کنگ ءَ سئے موٹر سائیکل سواریں لس مردم کشتگ انت ءُ 11 اگست ءَ گومازی ءَ لشکر ءِ مارٹر ءِ تیرگواری ءِ آسر ءَ کسان سالیں مھمد ء عبدالغفور بیران بیتگ ات-

ھمے وڑ ءَ پنجگور ءِ دمگ سوردو ءَ یک مردمے ءِ لاش دزکپتگ – لاش ءِ پجار سبزل ء لعل مھمد ءِ نام ءَ زانگ بیتگ کہ آئی ءِ اُمر 47 سال کساس بیت ءُ آ وشاپ ءِ جھمنند انت-

دمگی مردمانی رد ءَ گوستگیں شپ ءِ ساھت سَے ءَ ناشناسیں گاڑی سواریں مردماں سبزل ءِ لوگ ءَ دور کتگ ءُ آ زورانسری گون وت برتگ- چریشی ءَ پد مروچی آئی ءِ لاش دزکپتگ-

ویل ءِ سبب زانگ نہ بیتگ ءُ آوار جنوک ءُ کشوک ھم زانگ نہ بیتگ انت-

بلوچستان ءَ تیرگواری ویلاں ھمک روچ مردم بیران ءُ ٹپی بوگ ءَ انت ءُ آیانی گیشتریں کچ ءُ کساس سرکار ءِ پلامرزی ءَ ھستیں گل کہ ڈیتھ اسکواڈ ءِ نام ءَ مشھور انت آئی ءِ سر ءَ بھتام لڈگ بوگ ءَ انت-

سرکاری تکاں ڈیتھ اسکواڈ ءِ پلامرزی انگت ءَ منگ نہ بیتگ بلے لس سیاسی مھلوک ءِ گوشگ انت اے ٹولی ءَ سرکار ءِ کمک گون انت ءُ آ گیشتریں ویلاں بلوچستان ءَ ورنایاں آوار جنگ ءُ پد ءَ آیانی لاشاں چگل دیگ ءَ انت-