شال سریاب ءَ بی این پی ءِ مچی ءَ بوتگیں وتکش تراک ءِ زمہ واری داعش پاکستان ءَ من اتگ ۔ بی این پی ءُ مکران ءِ وکیلانی گلاں سَے روچ ءَ پرس دارگ ءِ جار جتگ ، بی این پی ءِ سروک اختر جان مینگل ءَ گوشتگ کہ مئے سر ءَ بوتگیں ارشاں ریاست ءِ دست مان انت ۔ ناشر کاریں گل ءِ وتکش تراک ءَ تنی وھدی 15 مردم بیران ءُ 29 ءَ گیش زدگ بوتگ انت ۔ راج دوست، انسانی ھکانی باسک ءُ نودربرگلاں اے اُرش ترندی ءَ گوں ایرجتگ ۔
بی این پی ءِ رھشون ءِ لنک ھمے نیمگ ءَ داعش ءِ پُشت ءُ پناھی ءَ بلوچستان ءِ سرکار کنگ ءَ انت نی گپ اے جاہ ءَ کیت اوشتیت ھاں دیم ءَ چوش بنت کہ داعش بلوچ مُچیانی سر ءَ وتی اُرشاں گیش ترند کنت آیانی مول ءُ مراد ھمے بوت کنت سرکار وتی بگیری ءَ چِست بیتگیں توارانی ھلاپ ءَ اے دابیں گلاں کارمرد کنت ءُ مُچیاں ایر موش کنت-
اے جستے پسو مارا ھاسیں رنگے ءَ کَسے ءِ گور ءَ دست نہ کپت بلے البت لس گمانی رنگ ءَ اے گمان کنگ بوگ ءَ انت بلوچستان ءِ مانگش اتگیں سرکار ءُ لس سیاسی بلوچ رھشونانی میان ءَ ایراد گری ءِ توک ءَ گیشی اتکگ نی اے گمان ھمے پدر کنت کہ بلوچستان ءَ سیاسی مُچیانی توک ءَ روکیں مھلوک ءَ گیش ترس ءِ آماچ کنگ ءِ ھاتر ءَ اے دابیں کاراں کارمرد کن انت ءُ بوت کنت داعش اے کارانی کنگ ءَ لس شھری ءُ سیاسی مھلوک ءَ تاوان بہ دنت پرچا گوست ءَ ھم بلوچستان ءَ گران ءُ سنگینیں توار بی وائی سی ءِ مُچیانی توک ءَ ھم آئی ءِ رھشونانی کُشگ ءِ ھاتر ءَ اتکگیں مردمانی سیادی گمانی رنگ ءَ ڈیتھ اسکواڈ ءَ بوتگ انت-
گوستگیں شپ ءَ شال ءَ شاھوانی پٹ ءِ نزیک ءَ بی این پی مچی ءِ سر ءَ بوتگیں وتکش تراک ءَ دگہ پنچ مردم بیران بوتگ انت کہ چریشی ءَ پد بیران بوتگیں مردمانی کچ 15 ءَ سربوتگ انت ۔ اے اُرش ءَ 29 ءَ گیش زدگ بوتگیں مردم سول نادراھجاہ ءَ الاج کنگ ءَ انت۔
نادراھجاہ ءِ واکدارانی گوشگ انت زدگ بوتگیں مردمانی چار ءُ ٹپاس ءَ پد ھما کہ سک باز زدگ بوتگ انت آیاں کراچی ءَ دیم دیگ ءِ شور کنگ بوتگ ۔
بی این پی ءُ مکران ءِ وکیلانی گل ءَ سے روچ ءَ پرس دارگ ءِ جار جتگ ءُ وکیلاں امیدگسی کار بائیکاٹ کتگ انت ۔
مکران ہائی کورٹ بار ایسوسی ایشن، کیچ بار ایسوسی ایشن، گوادر بار ایسوسی ایشن ءُ پنجگور بار ایسوسی ایشن ءَ ھوار مکران درسیں وکیلانی گلاں بلوچستان نیشنل پاٹی ءِ مچی ءِ سر ءَ بوتگیں وتکش تراک ترندی ءَ گوں ایرجتگ ءُ سے روچ ءَ پرس دارگ ءِ جار جتگ ۔
وکیلانی گلاں وتی یکجاھیں جار ءِ تہ ءَ گوشتگ کہ اے وئیل ءَ کیمتی ایں جان شتگ انت ءُ اے ملک ءِ تہ ءَ جمھوری ءُ پرایمنیں جھد ءِ درانی بند کنگ ءِ پندلے ۔
جار ءِ تہ ءَ گوشگ بوتگ کہ ما زھرشانی کنان ءَ سرجمیں مکران ءَ آمیدگسی کارانی سرجمی ءَ بائیکاٹ کنگ ءِ جار ءَ جن ایں ءُ اے بائیکاٹ 3، 4، 5 ستمبر ءَ تاں برجاہ بیت ۔
وکیلاں نیک دوائی کنان ءَ گوشتگ کہ مئے دوا انت نمیران بوتگیں مردم بھشت ءَ بات انت زدگ بوتگیں مردماں ھاوند زوت دراہ بہ کنت ۔
وکیلاں سرکار ءُ شال ءِ واکدارانی سر ءَ زور داتگ کہ وئیل ءَ ھواریں مردم درگیجگ بہ بنت ءُ دیمتر ءَ چشیں وئیلانی گر ءُ دار ءِ ھاتر ءَ ترندیں گامگیج زورگ بہ بیت ۔ ھمے وڑ بی این پی ءَ ھم سے روچ ءَ پرس دارگ ءِ جار جتگ ، کہ جار ءَ پد اختر جان مینگل ءِ بنکی ھنکین وڈھ ءَ بازار سرجمی ءَ بند بوتگ ۔
بلوچستان نیشنل پاٹی ءِ سروک سردار اختر جان مینگل ءُ باسکانی سر ءَ بوتگیں وتکش تراک ءِ درگت ءَ بی این پی رھشون سنا بلوچ ءَ چاگردی ترامجاھاں نبشتگ کہ وتگڑیں بلوچستان سرکار ءَ دو مراگش باکسنگ چمپئین شپ ءُ چاردہ اگست ءِ مراگشانی سر ءَ 50 کروڑ ءَ گیش کلدار ھرچ کتگ ۔
چاردہ اگست ءِ مراگشاں شال ءِ ھاتر ءَ دھ ھزار پھازگی لشکر اشتارینتگ ءُ بازیں ھپتگے ءَ سرجمیں شال بند بوتگ ۔ بلے بی این پی ءِ شاھوانی پٹ ءَ ایمنیں راجکاری مچی ءِ بوتگ کہ اود ءَ یک وتکش تراکے ءَ پانزدہ گیش نمیران ءُ سی ءَ گیش زدگ بوتگ کہ اود ءَ ھچ سیکورٹی دیگ نہ بوتگ ۔
سنا بلوچ ءَ گوشتگ کہ اے نادلگوشی راستی ءَ سرکار ءِ پندل ءَ زاھر کنت کہ چہ ھمیشی ءَ بلوچ ءُ پشتونانی رھشون ءُ ھما بیگناھیں مردم نشانگ کتگ انت کہ زلم ءُ زوراکی ءِ بگیری ءَ ایمنیں جھد ءِ سر ءَ باور کن انت ۔
دومی نیمگ ءَ بلوچستان ءِ ایڈیشنل چیف سیکٹری ھمزہ شفقات ءَ گوشتگ کہ سریاب ءِ وئیل کنٹرول ءَ ڈن بوتگ آ گرد ءُ دار کنگ نہ بوتگ وھدیکہ شال ءَ بوتگیں تراک ءَ پیسر مچی ءِ واکدار سَے رند ءَ گوشگ بوتگ انت کہ مچی ءَ ھلاس بہ کن ات بلے اے گپ سنگینی ءَ زورگ نہ بوتگ ۔
آئی گوں پولیس واکدارانی ھمراھی ءَ اھوالکاراں گوں تران کنان ءَ گوشتگ کہ وتکش تراک کنوکے امر سی سال ءَ کم بوتگ بلے تنی وھدی ارشکار ءِ پجار نہ بوتگ ۔
آئی ءَ گوشتگ کہ مچی ءِ ھاتر ءَ سیکورٹی دیگ بوتگ اگاں وئیل مچی ءِ تہ ءَ بہ بوتیں گڑا باز تاوان بوتگ ات ۔ ارشکارانی شوھاز کنگ مئے زمہ واری انت ۔ مدامی گوشگ ایں کہ شش ستمبر ءَ تاں وتی سر ءُ پراں بہ دار ات ۔
آئی ءَ اے ھم گوشتگ دوازدہ ربیع الاول درگت ءَ جار جنگ بوتگ ، دیمتر ءَ مگرب ءِ نماز ءَ پد مچیانی موکل دیگ نہ بیت ۔
اسلامک اسٹیٹ پاکستان ءَ شال ءَ بلوچستان نیشنل پاٹی ءِ مچی ءِ سر ءَ بوتگیں وتکش تراک ءِ زمہ واری من اتگ ۔
داعش ءِ نیمگ ءَ شنگ کنگ بوتگیں درشان ءِ تہ ءَ گوشگ بوتگ کہ ارشکار ءِ نام ”علی المہاجر“ انت۔ اے درشان داعش ءِ پاکستان ءِ بنجاھی رسانکدری ادارہ “اعماق“ ءُ ”خلافت“ نیمگ ءَ دیم ءَ اتکگ ۔
داعش خراسان پاکستان ءَ گوشتگ بی این پی ءِ سر ءَ ھمے واست ءَ ارش کنگ بوتگ کہ آئی ءِ راجدوستی ءُ جمھوری سیاست اسلامی کانودانی بگیری انت ۔
ھمے سال ءَ اختر مینگل ءِ سر ءَ بوتگیں اے دومی وتکش تراک انت چد ءُ پیسر مارچ ءِ ماہ ءَ مستونگ ءِ نزیک ءَ ھم آئی ءِ مچی نشانگ کنگ ءِ جھد بوتگ ۔
گوستگیں شپ ءَ شال ءِ وتکش تراک ءَ پد سردار اختر مینگل ءَ بی بی سی اردو ءَ گوں تران کنان ءَ گوشتگ کہ آئی ءِ سر ءَ بوتگیں اے اُرش اولی نہ انت چد ءُ پیسر کہ آئی ءَ ڈاکٹر ماھرنگ ءُ بلوچ یکجھتی کمیٹی ءِ ایندگہ زالبول ءُ رھشونانی دزگیری ءِ بگیری ءَ مستونگ ءِ دمگ لک پاس ءَ نندانک جتگ گڑا ھما وھد ءَ ھم یک وتکش کنوکے ءَ آ نشانگ کنگ ءِ جھد کتگ انت ۔
آئی ءَ گوشتگ کہ سرکار ناکہ وتکش کنوک داشتگ ءُ ناکہ آ وئیل ءِ شری ءَ پٹ ءُ پول کتگ ۔ آئی ءَ گوشتگ کہ لک پاس ءِ وھد ءَ مئے سنگت وتکش کنوک دیستگ بلے روچ مروچی مئے سنگت جست کنگ نہ بوتگ انت کہ اُرش کار چونینے بوتگ چی رنگے گد پر بیتگ ئے۔
آئی ءَ گوشتگ کہ زیکیں وئیل ءَ پیسر ھم مچی کنگ ءَ مئے دیم ءَ اڑاند بوتگ انت موکل ءِ نداتگ برے گوشتگ ءِ کہ مرچی موکل رس ایت کدی گوشتگ ئے باندا ھمے میان برزی تبک ءِ سرکاری مردمے ءِ کلوہ منی سر ءَ اتکگ کہ شما پھریز بہ کن ات پرچاکہ تاکتوریں مردمے شمئے بگیری ءَ تیاری کنگ ءَ انت ۔
اختر مینگل گوش ایت گڑا من ھما کاسد ءَ گوشتگ کہ بہ رو وتی سرکاری مردم ءَ بہ گش اگاں شمارا مئے پکر بہ بوتیں گڑا منی ءُ منی سنگتانی سرکاری سیکورٹی پچ نہ گپتگ ات ۔
بی این پی ءِ رھشون ءَ گوشتگ ما ھما زورآورانی نشانگ ءَ ایں کہ آیانی زلم ءُ زوراکیانی بگیری ءَ ما توار چست کنگ ءَ انت بلے اگاں ما رک ایں گڑا اے مئے مردمانی دوایانی سوب ایں ۔
زانگ بہ بیت بلوچستان نیشنل پاٹی ءِ نیمگ ءَ گوستگیں شپ ءَ بوتگیں مچی پاٹی ءِ سروک سردار عطا ء اللہ مینگل ءِ چارمی بیرانی سالروچ ءِ درگت ءَ برجم دارگ بوتگ ۔ کہ مچی ءِ گڈی ءَ یک وتکش کنوکے ءَ پاٹی ءِ رھشونانی نزیک ءَ وت ءَ تراکینتگ ۔
وئیل ءَ بازیں مردمے بیران بوتگ وھدیکہ بازینے انگت زدگ انت ڈاکٹرانی گوشگ انت بیت کنت گیشتر مردم بیران بہ بنت ۔
کاؤنٹر ٹررازم ڈیپارٹمنٹ ءَ شاھوانی پٹ ءَ ڈن بوتگیں وتکش تراک ءِ ارزی ناشناسیں مردمے ءِ نام ءَ نبشتہ کنگ بوتگ ۔
جارکش ءِ رد ءَ وتکش کنوک ءِ جون ءُ چنڈ دستیگ کنگ بوتگ انت کہ فارنزک ٹیسٹ ءِ ھاتر ءَ دیم دیگ بوتگ