بلوچستان ءَ دامگ ءُ نیٹورکانی بندگ بیگ ءَ اَبید بلوچ آجوئی لوٹوکیں سلاہ بندیں گلانی اُرشانی دْرچ یکشل ءَ برجاہ اَنت

بلوچستان ءِ جتاجتائیں دمگاں دامگ ءُ نیٹورکانی بند بیگ ءَ اَبید بلوچ آجوئی لوٹوکانی اُرشانی دْرچ یکشل ءَ برجاہ ءَ اَنت-

بلوچستان ءِ سرکار ءَ شش اگست ءَ سرجمیں ھند ءُ دمگانی موبائل نیٹورک بند کتگ انت ءُ داں سِی ءُ یک اگست ءَ نیٹ پچ کنگ بیتگ انت بلے سرکار ءِ اے بندش ءَ ابید ھم اود ءَ اُرشانی تہ ءَ کمی نا بلکیں گیشی گندگ ءَ اتکگ انت-

لس مھلوک ءِ گوشگ انت اگست بلوچستان ءَ گچینی ماھانی توک ءَ زانگ بیت انت ھمے ماہ ءَ سال دوھزار ءُ شش ءَ بلوچستان ءِ رھشون نواب اکبر بگٹی ءِ سر ءَ اُرش کنگ ءُ آ نمیران کنگ بیتگ – ھمے ماہ ءَ گوستگیں سال ءَ نواب اکبر بگٹی ءِ سالروچ ءَ بی ایل اے ءَ آپریشن ھیروپ ءِ جار پرینتگ ءُ یکیں وھد ءَ بازیں جاھاں اُرش کتگ ءُ اود ءَ راہ دگ بستگ ءُ مستریں اُرش بیلہ ءَ پوجی ھیڈکوارٹر ءِ سر ءَ کنگ بیتگ ءُ چریشی ءَ داں اے اُرش دو روچاں برجاہ بیتگ- ھمے ترس ءُ پھزداری ءَ سرکار ءَ اگست ءِ ماہ ءَ سرجمیں نیٹورک بند کتگ بیتگ انت-

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ جتاجتائیں اُرشانی زمہ واری منّ اِتگ اَنت-

بلوچ لبریشن آرمی ءَ وتی یک شنگ کتگیں درشانے ءِ تہ ءَ گوشتگ مئے سرمچاراں کیچ ءِ دمگ زامران ءَ ارچنان ءِ ھند ءَ زورگریں پاکستانی پوج ءِ پوسٹ ءِ نزیک ءَ واٹر سپلائی ءِ سر ءَ آئی ای ڈی یے پٹ کتگ- سرمچاراں زورگریں پوج ءِ دو کارندہ ھما وھد ءَ نشانگ کتگ اَنت وھدے آ اے دمگ ءَ سر بیتگ اَنت – تراک ءَ یک کارندھے مرتگ وھدے کہ دومی ٹپی بیتگ-

آئی ءَ دیمتر ءَ گوشتگ کیچ ءِ دمگ گورکوپ، جمک ءَ بلوچ لبریشن آرمی ءِ سرمچاراں زورگریں پوج ءِ بمب ڈسپوزل اسکواڈ ءِ کارندہ ریموٹ کنٹرول آئی ای ڈی اُرش ءَ نشانگ کتگ اَنت یک کارندھے مرتگ ءُ دگہ یکے سک ٹپی بیتگ-

بی ایل اے ءِ جارکش ءَ گوشتگ مئے سرمچاراں گوستگیں شپ ءَ شال ءِ دمگ میاں غنڈی ءِ نزیک ءَ مڈی بروکیں یک گاڑی یے نشانگ کتگ ءُ مانداشتگ –

آئی ءَ گوشتگ بی ایل اے ءِ سرمچاراں ھرنائی ءِ دمگ شاھرگ ، کھوسٹ ءَ گیس پلانٹ ءِ سائٹ اُرش ءِ نشانگ کتگ کہ اود ءَ سرمچاراں گیس ٹینکرز تراک ءَ چہ تباہ کتگ-

آئی ءَ دیمتر ءَ گوشتگ دگہ یک کاروائی یے بلوچ لبریشن آرمی ءِ سرمچاراں ھاران ءِ دمگ برشونکی ءَ یک پولیس چوکی یے سر ءَ کنٹرول کتگ، اود ءَ ساڑی کارندہ دزگیر کتگ ءُ پد ءَ یل داتگ اَنت-

دومی نیمگ ءَ بلوچ آجوئی لوٹوکیں گل بلوچستان لبریشن فرنٹ ءَ وتی شنگ کتگیں درشان ءِ تہ ءَ گوشتگ سی اگست ءَ بلوچستان لبریشن فرنٹ ءِ سرمچاراں مشکے ءِ دمگ سنیڑی ءَ شپ 9:30 ءَ پاکستانی پوج ءِ بُنجل ءُ آئی ءِ ھمراھی ھمگرنچ سلاہ بندیں ٹولی ( ڈیتھ اسکواڈ) ءِ بُنجل یکیں وھد ءَ اُرش ءِ نشانگ کتگ اَنت- سرمچاراں مزنیں سلاہ کامرز کتگ ءُ دُژمن نشانگ کتگ، چریشی ءِ آسر ءَ ریاستی پلامرزی ٹولی ڈیتھ اسکواڈ ءِ یک کارندھے مرتگ ءُ پوجی بُنجل ءَ ھم تاوان رس اِتگ-

آئی ءَ دیمتر ءَ گوشتگ ھمے روچ ءَ مستونگ کھڈکوچہ ءِ نزیک ءَ سرمچاراں مڈی چہ سرریچ گاڑیانی کاروان سر ءَ اُرش – تیرگواری ءِ آسر ءَ کاروان ءِ سے گاڑیانی ٹائر تباہ بیتگ اَنت- چریشی ءَ آیانی سُر ءُ پُر اسرمند بیتگ اَنت- ھمے روچ ءَ گرو ءِ ھند ءِ سر ءَ ھم مڈیاں چہ سرریچ یک دگہ گاڑی یے نشانگ کتگ ءُ ٹائر نارکارہ کتگ، بلے ڈرائیور انسانی ہمدردی ءَ چہ یل داتگ-

بی ایل ایف ءِ جارکش ءَ دیمتر ءَ گوشتگ سی یک اگست ءَ مشکے ءِ دمگ اوگار ءَ نیمروچ ءِ ساھت یک ءَ بی ایل ایف ءِ سرمچاراں پاکستانی پوج ءِ یک گاڑی ءِ سر ءَ سنگر گپتگ ءُ اُرش کتگ – گاڑی بُنجل ءَ انچش درتکگ ءُ نشانگ کتگ چریشی ءِ آسر ءَ چار پوجی مرتگ اَنت – وئیل ءَ پد دگہ جھلی ءُ بُرزی پوجی کارندھاں سرمچارانی ھلاپ ءَ آپریش ءِ واستا وئیلجاہ نیمگ ءَ سُر ءُ پُر ئِے کتگ بلے سرمچاراں شوربندی رِد ءَ دمگ ءَ چہ دراھگ ءَ سوبمند بیتگ اَنت-

درشانانی گُڈی ءَ دوئیں آجوئی لوٹوکیں گلاں اُرشانی زمہ واری منّ اِتگ اَنت گوشتگ داں بلوچستان ءِ وتواجھی ءَ پاکستانی پوج ءُ آیانی شریکدارانی اُرش برجاہ بنت-