بلوچستان ءَ بیگواھیانی جیڑہ، کراچی ءَ ایچ آر سی پی ءِ نیاد، بلوچ کھولاں بھر زرتگ

بلوچستان ءَ گوستگیں دو دھکاں بیگواھیانی یک ٹوھیں جیڑھے بندات بیتگ کہ اود ءَ ھمک مھلوک وتی دل ءَ یک تُرسے ءِ زندے سما کنت، اے دوئیں دھکاں بلوچستان ءَ انسانی ھکانی گلانی رد ءَ ھزارانی ھساب ءَ بلوچ ورنا، استاد، ڈاکٹر، ءُ ھمک تک ءَ بندوکیں مردم گار کنگ یا کُشگ ءُ آیانی لاش چگل دیگ بیتگ انت –

اَچ بلوچستان ءَ اے جاور گندگ ءَ ھم کاینت کہ اود ءَ بازیں زھگ وتی پتانی ودار، گوھار براتانی ودار، زال وتی جودانی ودار ءَ نشتگ ءُ آیانی وداریگ انت چوشکہ چوشیں جاوراں اود ءَ گندگ ءَ کیت بازیں کھول یا مات ھمے ودارانی میان ءَ وتی زند ءَ آسر کن انت ءُ دنیا ءَ رکُست بنت-

چَرے بیگواھیانی درچ تھنا ایوک ءَ بلوچستان ءَ نا بلکیں ھَر ھما دمگاں بلوچ وانگ یا آباد انت اود ءَ ھم بلوچ اَچ وتی زند ءَ رکگ بوگ ءَ انت- بیگواھیانی ویلانی گیش بوگ ءَ کھول بلوچستان ءَ ھوار پاکستان ءِ دگہ جاھاں ھم زھرشانی، نندانک، سمینار ءُ دگہ دگہ انسانی ھکانی پِڑاں برجم بیتگیں نیاداں ھوار انت ءُ وتی دردانی درشان کنگ ءَ گندگ بوگ ءَ انت-

گوستگیں روچ ءَ ھیومن رائٹس کمیشن آف پاکستان ءِ نیمگ ءَ گوستگیں روچ ءَ کراچی ءَ زورانسری آوار جنی ءِ سانمندانی میان استمانی روچ برجم دارگ بیتگ-

اے مراگش ءِ سروکی سادیہ بلوچ ءَ کتگ وھدے کہ انسانی ھکانی رھشون ڈاکٹر توصیف، زالبول فاؤنڈیشن ءِ ڈائریکٹر مھناز رحمان ءُ سنیئر اِھوالکار سھیل سانگی ءَ تران کتگ-

اے مراگش ءَ بیگواھیں زاھد بلوچ ، سرفراز بلوچ، شیراز بلوچ ءُ سیلان بلوچ ءِ کھول ءَ ھم وتی درد ءُ ھم درشان کتگ اَنت ءُ آ بازیں روچے بیت کہ وتی دوستناکانی یل کنائینگ ءِ ھاتر ءَ ماں کراچی پریس کلب ءِ دیم ءَ نندانک ءَ نشتگ اَنت بلے تنی وھدے ھچ وڑیں گامگیچ زیرگ نہ بیتگ –

ھمے میان ءَ بلوچ یکجھتی کمیٹی ءِ بُنجاھی ڈپٹی آرگنائزر لالا وھاب بلوچ، عثمان بلوچ ، زاھد بگٹی ءُ خالق جونیجو ءَ ھم مراگش ءَ بھر زرتگ ءُ سانمندیں کھولاں گوں ھمدردی درشان کتگ-

ایچ آر سی پی ءَ کوام متھدہ ءِ تر گردیں ٹولی ءَ گوں لوٹ کتگ کہ آ بئیت پاکستان ءَ جاوراں ھالاں تچکی ءَ بچار اَنت سانمندیں کھولانی آجوئی لیکہ ءُ پُرایمنیں زھرشانی ءِ ھک ءَ مُھر کنگ ءِ ماھول ءَ کارمرزی ءِ زمانت ءَ بدنت-

کمیشن ءَ زور داتگ کہ حکومت زمہ واری اِنت اے جیڑہ ءَ دلگوش گور بہ کنت ءُ جوانیں گامگیجے بزور اِیت-

ھمے وڑ اسلام آباد ءَ بیگواھیں مردمانی کھولانی زھرشانی نندانک ءَ مروچی چل ءُ ھپتمی روچ ءَ ھم برجاہ بیتگ-

اے زھرشانی نندانک ءَ بی وائی سی ءِ سروک ڈاکٹر ماہ رنگ بلوچ ءِ گھار نادیہ بلوچ، بیگواھیں آصف ءُ رشید ءِ گھار سائرہ بلوچ، بیگواھیں راشد حسین ءِ گھازرتک ماہ زیب بلوچ ءَ ھوار بی وائی سی ءِ رھشون سمی دین بلوچ ءَ اَبید دگہ بیگواھیں مردمانی کھول ھوار اَنت –

زانگ بہ بیت اسلام آباد ءِ زھرشانی نندانک ءَ ساڑی سائرہ بلوچ ءِ برات آسپ ءُ رشید ءَ مروچی ھپت سال سرجم بیتگ کہ آ بیگواہ ءَ اَنت ھمے میان ءَ سائرہ بلوچ آیانی بیگواھی ءِ درگت ءَ تران کتگ ءُ آیانی یل کنائینگ ءِ لوٹ کتگ-